ඇඳිරි නීතිය පැනවිය යුතු නෑ! කොරෝනා සමාජගත වීමේ අවදානමක් නෑ!
July 15, 2020 at 2:27 pm | by emanisa.lk
මේ මෙහොතේ රටට ඇඳිරි නීතිය පැනවීමේ අවශ්‍යතාවක් නොමැති බව සෞඛ්‍ය සේවා අධ්‍යක්ෂක ජනරාල් විශේෂඥ වෛද්‍ය අනිල් ජාසිංහ සඳහන් කරයි.
මේ වන විට කොරෝනා වෛරසය ආසාදනය වූ රෝගීන් රටපුරා ව්‍යාප්ත වීමේ ප්‍රවණතාවක් නොමැති බවත් යම් ගැටළුවක් පැන නැගුනොත් ඊට අවශ්‍ය අයුරින් පියවර ගන්නා බව සෞඛ්‍ය වෛද්‍ය අධ්‍යක්ෂක ජනරාල්වරයා කියා සිටී.
මේ වන විට කන්දකාඩු පුනුරුත්ථාපන මධ්‍යස්ථානයේ ඇතිවූ කොරෝනා වෛරස පොකුරෙන් රෝගීන් 532ක් වාර්තා වී ඇති බව සෞඛ්‍ය සේවා අධ්‍යක්ෂක ජනරාල්වරයා කියා සිටියේය.
එලෙස වාර්තාවූ පුද්ගලයින් ගෙන් 25 දෙනෙකු කන්දකාඩු පුනරුත්ථාපන මධ්‍යස්ථානයේ සේවය කළ පුද්ගලයින්ගේ නිවෙස්වල පුද්ගලයින් වන බව ද සෞඛ්‍ය සේවා අධ්‍යක්ෂක ජනරාල්වරයා පවසයි.
නව කොරෝනා වෛරසයේ රෝග ව්‍යාප්තිය සම්බන්ධයෙන් කිසිදු පුවතක් සැඟවීමට අවශ්‍ය නොවන බවත් සෑම තොරතුරක්ම ජනතාවට ලබා දෙන බවත් සෞඛ්‍ය අධ්‍යක්ෂක ජනරාල්වරයා කියා සිටියේය.
කන්දකාඩු පුනරුත්ථාපන මධ්‍යස්ථානයේ කොරෝනා පොකුරත් සමග PCR පරීක්ෂණ 3000ක් සිදුකොට එහි ප්‍රථිපල ලැබී ඇති බවත් ඉදිරියේදී දිවයිනේ ස්ථාන රැසක දී PCR පරීක්ෂණ සිදුකරනු ලබන බවද සෞඛ්‍ය සේවා අධ්‍යක්ෂක ජනරාල් විශේෂඥ වෛද්‍ය අනිල් ජාසිංහ සඳහන් කළේය.
