ශ්‍රී ලාංකික විද්‍යාඥයන් විසින් නිෂ්පාදනය කළ රාවණා 01 චන්ද්‍රිකාව ඊයේ (18) අභ්‍යවකාශගත කෙරිණි. එම චන්ද්‍රිකාව ද රැගත් සිග්නස් රොකට්ටුව ජාත්‍යන්තර අභ්‍යකාශ මධ්‍යස්ථානය කරා ශ්‍රී ලංකා වේලාවෙන් අළුයම 2.16ට නික්මිනි. එය නිෂ්පාදනය කළේ තරිඳු දයාරත්න සහ දුලානි චාමිකා විතානගේ යන විද්‍යාඥයන්ය.

මෙම රොකට්ටුව නිෂ්පාදනය සඳහා කිසිදු දේශපාලකයකු කිසිදු උදව්වක් මේ වන විට සිදු කර නොමැති බව අනාවරණය විය. අගමැතිවරයා හමු වී සහාය පැතුව ද මෙතෙක් යහපත් ප්‍රතිචාරයක් නොලැබුණු බව තරිඳුගේ මව ප්‍රකාශ කළාය.

කෙසේ වුවද නැනෝ තාක්ෂණය සුහුරු තාක්ෂණය ආදීය පිළිබඳ නිතර කතා කරන ආණ්ඩුවේ ප්‍රබල ඇමතිවරයකු එය තමන්ගේ මගපෙන්වීම සහ අනුදැනුම මත සිදු කළ කාර්යයක් බව කියාපෑම සඳහා පසුගිය සමයේ සිය ගෝල බාලයන් ලවා සමාජජාලාවල මෙහෙයුමක් ආරම්භ කර තිබිණි.