මාලිමා ආණ්ඩු ඇමැති මණ්ඩලේට 225න් 222ක් ගන්නේ නෑ..! – අනුර…
February 23, 2024 at 6:47 pm | by emanisa.lk
මේ වන විට රටේ පිරිසක් තමන්ගේ ආණ්ඩුවේ කැබිනට් තනතුරු පිළිබඳව විමසීම් කරන අබව ජාතික ජන බලවේගයේ නායක අනුර දිසානායක පවසයි.
ඔහු පෙන්වා දෙන්නේ මීළඟට මේ රටේ පත්වෙන කැබිනට් මණ්ඩලය යනු වෙනස් අත්දැකීමක් මෙරට දේශපාලනයට ගෙනෙන, සාමූහික වගකීම දරන කැබිනට් මණ්ඩලයක් වනු ඇති බවයි.
“දැන් හැමෝම ඇමති මණ්ඩලයට පිරිසක් ඉන්නවද කියලා අපෙන් අහන්න පටන් අරගෙන තියෙනවා. ඒ ප්‍රශ්නය අහන්නේ කවුද අපිත් එක්ක ඉන්නේ කියන එක මතයි.
මහින්දගෙන් ඒ ප්‍රශ්නය අහන්නේ නැත්තේ මහින්ද වටා එක කණ්ඩායමක් ඉන්න නිසයි. සජිත්ගෙන් ඒ ප්‍රශ්නය අහන්න අවශ්‍ය නැහැ සජිත් වටාත් එහෙම කණ්ඩායමක් ඉන්න බව පෙනෙනවා. ඒ ඔක්කොම දැනටමත් පාර්ලිමේන්තු නියෝජනය ඇති අය.
හැබැයි පාර්ලිමේන්තුව ඇතුලේ දැනට අපේ ඉන්නේ තුන් දෙනයි.
දැන් මේ රටේ ජනතාවගේ මතය මොකක්ද. මේ ඉන්න 225ම ප්‍රතික්ෂේප කරන නව ආණ්ඩුවක්නම් ඒකේ හැඟවුම තමයි මේ පාර්ලිමේන්තුවේ ඉන්න බහුතරයකට මේ වැඩේ කරන්න බැහැ කියන එක.
ඉන්න 225 ඇතුලේ අපේ ඉන්නේ තුන් දෙනෙක් විතරක් නිසා අපේ කැබිනට් මණ්ඩලයේ බහුතර ලෙස පත් වෙන්නේ අද ඉන්න 222 නැතුව එයින් පිටත් ඉන්න අයගෙන් කියන එක සත්‍යයක්.
අපේ රටේ බලය, ඒ කියන්නේ රටේ ජනාධිපති අගමැති කැබිනට් මණ්ඩලයේ විෂයන් තනි මිනිහෙක් කේන්ද්‍ර කරලා ගොඩනගන්න හදනවා. අපි ඊට වෙනස්ව මේ ගැන හිතනවා. සැලසුම් කරලා තියෙනවා.
අපි අපෙන් පත්වෙන එක්කෙනෙක් විෂයන් සඳහා කැබිනට ඇමතිවරයෙක් විදිහට පත් කරනවා. ඊට අමතරව ඒ ඒ විෂයන් සඳහා කැබිනට් ඇමතිවරයාත් සමඟ විෂය පිළිබඳ ප්‍රාමාණික දැනුම ඇති තව පිරිසක් එක්වෙන උපදේශක සභාවක් හදනවා.
මම දැනට උදාහරණයක් විදිහට අධ්‍යාපනය, සෞඛ්‍ය සහ ආර්ථිකය කියන විෂයන් තුන ගැන විතරක් කියන්නම්.
සෞඛ්‍ය පිළිබඳව අපිත් එක්ක ඉන්නවා ජාතික ජන බලවේගයේ මහ ලේකම් වෛද්‍ය නිහාල් අබේසිංහ. ඔහු විශේෂඥ වෛද්‍යවරයෙක්. සෞඛ්‍ය ක්ෂේත්‍රය පිළිබඳව ජාත්‍යන්තර අත්දැකීම ඇති කෙනෙක්. ඒ වගේම රාගම වෛද්‍ය පීඨයේ මහාචාර්ය ක්‍රිශාන්ත අබේසිංහ, අපේ හිටපු පාර්ලිමේන්තු මන්ත්‍රී වෛද්‍ය නලින්ද ජයතිස්ස වැනි කණ්ඩායමක් ඉන්නවා. ඒ වගේ කණ්ඩායමක් සෞඛ්‍ය අමාත්‍යංශය මෙහෙයවීම සඳහා අපි පත්කරනවා. ඒ කණ්ඩායමෙන් එක් කෙනෙක් අපි අමාත්‍යවරයා ලෙස පත්කරනවා.
අධ්‍යාපන ක්ෂේත්‍රය සඳහා රුහුණු විශ්ව විද්‍යාලයේ මහාචාර්ය උපාලි පන්නිල, ආචාර්ය හරිනි අමරසූරිය, ආචාර්ය අනුර කරුණාතිලක වැනි කණ්ඩායමක්ම අපිත් එක්ක ඉන්නවා. ඒ කණ්ඩායමෙන් අධ්‍යාපනය කියන පුළුල් විෂය සඳහා කැබිනට් අමාත්‍යවරයෙක් හෝ අමාත්‍යවරියක් පත්වෙනවා.
ආර්ථික කියන විෂය සැලකීමේ දී අපි දැනටමත් අපේ ආර්ථික කවුන්සිලය ප්‍රකාශයට පත්කරලා තියෙන බව කවුරුත් දන්නවා. මහාචාර්ය අනිල් ජයන්ත, මහාචාර්ය සීතා බණ්ඩාර, මහාචාර්ය හර්ෂණ සූරියප්පෙරුම, හිටපු පාර්ලිමේන්තු මන්ත්‍රී සුනිල් හඳුන්නෙත්ති වගේම වසන්ත සමරසිංහ වැනි කණ්ඩායමක් ම ඉන්නවා. මේ අය අතරින් එක්කෙනෙක් අමාත්‍යවරයා ලෙස පත්කරනවා. අනෙක් අය සාමූහිකව කණ්ඩායමක් විදිහට ආර්ථික විෂය බාර අමාත්‍යාංශය මෙහෙයවනවා.
ඒ වගේමයි ආරක්ෂාව පිළිබඳව වන කැබිනට් වගකීමත්. දැන් මුළු රටම දන්නවා ජාතික ජන බලවේගයේ ප්‍රභලතම කණ්ඩායම් විදිහට ගොඩනැගිලා තියෙන අදිටන සාමූහිකය ගැන. එතන ඉන්නවා ඒ විෂය පිළිබඳව කලාපීය සීමාව පවා ඉක්මවා ගිය, ජාත්‍යන්තර අත්දැකීම් ඇති, විෂයානුබද්ධ දැනුම ඇති විශාල පිරිසක්. ඒ සමඟම ආරක්ෂාව කියන විෂය පිළිබඳව ප්‍රාමාණික දැනුම ඇති කීර්තිමත් සිවිල් පුරවැසියන් ගණනාවක් ම අපිත් එක්ක ඉන්නවා. අනෙක් විෂයන් දෙක වගේම ඒ කණ්ඩායමෙන් එක් කෙනෙක් අපේ ආණ්ඩුවේ දී ආරක්ෂාව විෂය පිළිබඳව කැබිනට් අමාත්‍යවරයා ලෙස පත් කරනවා. ඔහුත් සමඟ අනෙක් පිරිස සාමූහිකව ඒ විෂයේ වගකීම දරනවා.
කෙනෙකුට මේ ක්‍රමය අරුම පුදුම දෙයක් වෙන්න පුළුවන්. සමහරු මේ පැහැදිලි කිරීමත් සමඟ කළබල වෙන්නත් පුළුවන්. මොකද අපි 76 වසරක ඉතිහාසය පුරා දැකලා තිබුණේ වෙනස් ක්‍රමයක් නිසා. ජනතාව අපිත් එක්ක එකතුවෙලා අපිව ජයග්‍රහණය කරන්නේ පරණ දේ ම කරනවා බලන්න නෙමෙයි. ජනතාවගේ බලාපොරොත්තුව සාමූහික ජයග්‍රහණයක්. සාමූහිකව වගකියන වෙනස්, අලුත් පාලනයක්.
සාම්ප්‍රදායික අමාත්‍යවරයෙක්, අමාත්‍යධුරයක් වෙනුවට ඒ ඒ විෂයන් පිළිබඳව පරිචයක් ඇති, අධ්‍යනයක් තිබෙන, ඒ ඒ විෂයන් පිළිබඳව ගැඹුරු බුද්ධිමය අවබෝධයක් තිබෙන කණ්ඩායමක් වගේම ඇත්ත දේශපාලන උවමනාවක් තියෙන කණ්ඩායමක් අපේ පාලනයක දී අමාත්‍යාංශවල වගකීම් දරාවි.
අපි විසින් සිදු කරන කාර්යය පිළිබඳව විශ්වාසයක් සහ දැක්මක් තිබෙන, අවංක සහ ධෛර්යය සම්පන්න කණ්ඩායම් අපිට ඉන්නවා. ඒ නිසා මම හිතනවා ශ්‍රී ලංකාවේ ගොඩනැගෙන ශක්තිමත් ම කැබිනට් මණ්ඩලය වගේම ඒ ඒ විෂයන් සඳහා සුදුසුම කැබිනට් මණ්ඩලය ඊළඟට දකින්න පුළුවන් කියන එක” බව අනුර දිසානායක මහතා පවසයි.
