කෙටි කලකට හෝ රටේ පාලන බලය ලබාගන්නා ලෙසට විවිධ පාර්ශ්වයන්ගෙන් ඉල්ලීම් ඉදිරිපත් වී ඇති බවත් ඊට තමන් ප‍්‍රතිචාර දක්වා ඇති බවටත් සමාජ මාධ්‍යයන්හි පළවන වාර්තාවල කිසිදු සත්‍යතාවක් නැතැයි යුද හමුදාපති ලූතිතන් ජෙනරාල් මහේෂ් සේනානායක පවසයි.

ශ‍්‍රී ලංකා යුද හමුදාව යනු වෘත්තීය විනය ගරුක හමුදාවක් බවත් කිසිදු නීත්‍යානුකූල නොවන කටයුත්තකට යුද හමුදාව සම්බන්ධ නොවන බවත් ඔහු අවධාරණය කරයි.

රටේ ජනතාව යුද හමුදාව පිළිගෙන ඇති බවත් ජනතාවගේත් රටේත් ආරක්ෂාව සැපයීම යුද හමුදාවේ ප‍්‍රමුඛ වගකීම බවත් හමුදාපතිවරයා පෙන්වා දෙයි.

ශ‍්‍රී ලංකා යුද හමුදාව, සේනාධිනායකයා ලෙස ජනාධිපතිවරයාගේ නියෝග අනුව රටෙහි ව්‍යවස්ථාවට ගරු කරමින් කටයුතු කරන බවත් සේනාධිනායකයාට හෝ ව්‍යවස්ථාවට කිසිදු විටෙක එරෙහිව කටයුතු නොකරන බවත් යුද හමුදාපති ලුතිතන් ජෙනරාල් මහේෂ් සේනානායක සඳහන් කරයි.