වහාබ් මුස්ලිම් අන්තවාදය යළි හිස ඔසවයි…! පල්ලියේ නිදහස සැමරූ මුස්ලිම්වරුන්ට ප්‍රහාරයක්..! ජාතික කොඩිය බිම දමා පාගයි..! සහරාන් සිද්ධියේ දී වගේ ම පොලිසිය මර නින්දේ…!
February 6, 2022 at 10:36 am | by emanisa.lk
පෙරේදා (04) දුම්මලසූරිය යගම්වෙල අරිකාමන් ග්‍රාමයේ මස්ජිදුල් අක්බාර් ජුම්මා පල්ලියේ නිදහස් දින සැමරුම් උත්සවයක් පවත්වා ඇත.
ඊට සමගාමීව සර්වාගමික සංහිඳියා මධ්‍යස්ථානයක් ද එහි විවෘත කිරීමට සංවිධායක මණ්ඩලය විසින් කටයුතු කර ඇත. මේ උත්සවය සංවිධානය කරන ලද්දේ සමස්ත ලංකා සූෆි ආධ්‍යාත්මික සම්මේලනය සහ එම සම්මේලනයේ දුම්මල සූරිය ශාඛාව විසිනි.
මේ පල්ලියේ පිහිටි ඉපැරණි සාන්තුවරයින්ගේ සොහොන් හෙවත් ෂියාරම් කිහිපයක් සහරාන් ඇතුළු වහබ්වාදීන් විසින් මීට පෙර කඩාබිඳ විනාශ කර දමා තිබිණි. මීට පෙර අවස්ථා කීපයකදී ද ප්‍රදේශයේ සාම්ප්‍රදායික මුස්ලිම් වරුන්ගේ සංස්කෘතික කටයුතු වලට එරෙහිව කටයුතු කිරීම සම්බන්ධයෙන් වහාබ්වාදීන්ට එරෙහිව දුම්මල සූරිය පොලිසියට පැමිණිලි රාශියක් ඉදිරිපත් කර තිබේ. ඊයේ නිදහස් දිනය සමරන අවස්ථාව වන විට අන්තවාදීන් විසින් විනාශ කළ ෂියාරම් නැවත ප්‍රතිසංස්කරණය කිරීමට ද ප්‍රදේශයේ සාම්ප්‍රදායික මුස්ලිම්වරු කටයුතු කර තිබේ.
ප්‍රධාන පෙළේ ආගමික නායකයින්, ශ්‍රී ලංකා මහජන පක්ෂයේ නායක, පාර්ලිමේන්තු මන්ත්‍රී අසංක නවරත්න මහතා සහ ලුතිනන් කර්නල්වරයෙකු සහභාගි වූ මෙම නිදහස් දින රැස්වීමෙන් අනතුරුව ඒ ස්ථානයට පැමිණි වහාබ් අන්තවාදීන් පිරිසක් උත්සවය සංවිධානය කළ සාම්ප්‍රදායික මුස්ලිම් වරුන්ට පහර දී තුවාල සිදුකර ඇත. අරිකාමම් ග්‍රාමයට නුදුරු ඇතුන්ගහකොටුව නම් ග්‍රාමය වහබ් අන්තවාදීන්ගේ කේන්ද්‍රස්ථානයක් වන බව කියැවේ.
නිදහස් දිනයට පෙර දිනයේ එහි රැස්වූ දෙසීයක පමණ අන්තවාදීන් පිරිසක් මෙම නිදහස් උළෙලට පහරදීමට ද සැලසුම් කර ඇතැයි දැනගන්නට තිබේ. ආරක්ෂක අංශ මීට සම්බන්ධ වීම නිසා පසුව එය වැළකී ගොස් ඇත.
දුම්මලසූරිය පොලිසියෙන් මේ වන විට අදාළ පල්ලියට ආරක්ෂාව ලබාදී ඇතත් පහර දුන් අයගේ නම් ගම් ආදිය පවසා තිබියදීත් කිසිදු සැකකරුවෙකු අත්අඩංගුවට ගැනීමට මෙතෙක් අපොහොසත් වී ඇත. පොලිසිය මුස්ලිම් අන්තවාදය සම්බන්ධයෙන් තම සුපුරුදු නිවට සෙයියාව ප්‍රදර්ශනය කරමින් මෙය එකම ආගමේ කණ්ඩායම් දෙකක් අතර ගැටුමක් වන බැවින් එය සාමකාමීව විසඳා ගන්නා ලෙස පවසා තිබේ.
මෙය ඉස්ලාම් ආගමික කණ්ඩායම් දෙකක් අතර අභ්‍යන්තර ගැටුමක් නොවේ. වහබ්වාදීන් විසින් සුෆි මුස්ලිම්වරුන්ට සිදුකරන ලද පහර දීමකි. ඊට හේතු වී ඇත්තේ සාම්ප්‍රදායික මුස්ලිම්වරු විසින් අනෙකුත් ආගමික නායකයින් සමග එකතු වී ජාතික නිදහස් දිනය සැමරීමයි.
මෙය ජාතික ආරක්ෂාව සම්බන්ධයෙන් බරපතළ තත්ත්වයක් වන අතර මීට පෙර කාත්තන්කුඩියේ ද මෙවැනි තත්ත්වයක් පැවතී ඇත. පාස්කු ප්‍රහාරය සිදු කිරීම ට පෙර කාත්තන්කුඩියේ සාම්ප්‍රදායික මුස්ලිම්වරු විසින් වහබ්වාදී සහරාන්ට එරෙහිව පැමිණිලි අනූ ගණනක් කාතන්කුඩි පොලිසියට සිදුකර ඇති බව දැනගන්නට තිබේ.
එහෙත් සහරාන් පාස්කු ප්‍රහාරය සිදු කර තමනුත් සියදිවි නසා ගන්නා තෙක්ම ශ්‍රී ලංකා පොලිසිය, බුද්ධි අංශ සහ වගකිය යුතු ආරක්ෂක අංශ නිදි වැදී සිටියහ. එහි ප්‍රතිඵලය වූයේ සිය ගණනක් ජීවිත අහිමි වී ජාතික ආරක්ෂාව තර්ජනයට ලක්වී, ශ්‍රී ලංකාවේ ආරක්ෂක අංශ, ජාතික වශයෙන් සහ ජාත්‍යන්තර වශයෙන් විහිළුවකට ලක් වීමයි.
ඊයේ දිනයේ සිදු වූ මේ නින්දිත ප්‍රහාරය සඳහා පැමිණි මූලධර්මවාදීන් පවසා ඇත්තේ මුස්ලිම් ආගමික සිද්ධස්ථානයකට බෞද්ධ භික්ෂූන් වහන්සේලා ඇතුළු සර්වාගමික නායකයින් කැඳවූයේ ඇයි ද යන්නයි. එමෙන්ම ඒ උත්සවය සඳහා සාම්ප්‍රදායික උඩරට නැටුම් යොදා ගත්තේ ඇයිද යන්නයි. එමෙන්ම ජාතික කොඩිය ගලවා පාගා ඊට අපහාස කිරීමට ද වහබ්වාදීන් කටයුතු කර තිබේ. මීට පෙර ද වහාබ් අන්තවාදීන් විසින් ජාතික කොඩියට ගරු නොකළ යුතු බව ප්‍රසිද්ධියේ ප්‍රකාශ කර ඇත.
මෙරට සිටි දේශපාලන නායකයින්ගේ සහ ආරක්ෂක අංශවල වගකිවයුත්තන්ගේ නිවට කම නිසා දෙමළ කොටි ත්‍රස්තවාදීන් වසර 30 ක කාලයක් තිස්සේ මෙරට වාසය කළ සිංහල දෙමළ මුස්ලිම් ජන ජීවිතය කඩාකප්පල් කිරීමට කටයුතු කළහ. වහබ්වාදය සම්බන්ධයෙන් දක්වන මේ නිවට නියාලු ස්වභාවය අනාගතයේදී එවැනිම තත්ත්වයක් රටේ ඇති වීමට බොහෝ දුරට ඉඩ තිබේ.
වෙන මොනවා නැතත් වර්තමාන ජනාධිපති ගෝඨාභය රාජපක්ෂ මහතාගෙන් මෙරට සියලු ජනතාව බලාපොරොත්තු වූ මූලිකම දෙය වන්නේ රටේ ජාතික ආරක්ෂාව තහවුරු කිරීමයි. වසර දහස් ගණනක් පුරා දේශීයත්වයට අනුගත වෙමින් කටයුතු කළ සාම්ප්‍රදායික මුස්ලිම් සහෝදරයින්ගේ ජීවිත සහ සංස්කෘතිය ආරක්ෂා කරදීමට අපට හැකියාවක් නැති බව ඔවුන්ට දැනෙන්නට ඉඩ නොතැබිය යුතුය. ඔවුන්ගේ ධෛර්යය සිඳී යෑමට ඉඩ නොතැබිය යුතුය. ආරක්ෂක අංශවල නිවටකම නිසා ඔවුන්ගේ ධෛර්යය සිඳී ගොස් අප කෙරෙහි ඇති විශ්වාසය පලුදු වී යෑමට ඉඩ තිබේ.
සහරාන් මියගිය ද සහරාන් වැනි මූලධර්මවාදී ඉස්ලාම් තරුණයින් දහස් ගණනක් මේ භූමිය තුළ ක්‍රියාත්මක වෙමින් සිටිති. මේ පිළිබඳව මෙරට දේශපාලන පක්ෂ නායකයින් රාජ්‍ය නොවන සංවිධානවල අය, සමාජ ක්‍රියාකාරිකයින් වැනි අය කෙසේ වෙතත් ආරක්ෂක අංශවල බලධාරීන්ගේ නොදැනුම්වත් බව භයානක අනාගතයක පෙර නිමිත්තක් බව පැහැදිලිව ප්‍රකාශ කළ යුතුය. හැකි ඉක්මනින් වරදකරුවන් අත්අඩංගුවට ගෙන නීතිය ක්‍රියාත්මක කිරීමට ශ්‍රී ලංකා පොලීසිය සහ දුම්මල සූරිය පොලිස් ස්ථානාධිපතිවරයා ඇතුළු පිරිස කටයුතු කළ යුතුය.
ජ්‍යේෂ්ඨ කථිකාචාර්ය සුමේධ වීරවර්ධන
