මට ඕන අලුත් නායකයින්ට අවස්ථාව දෙන්න! – රනිල්
June 16, 2020 at 2:32 pm | by emanisa.lk
ජාතික නායකත්වයක් බිහිවන්නේ නම් එය බිහිවන්නේ එක්සත් ජාතික පක්ෂය තුළින් පමණක් බව එහි නායක රනිල් වික්‍රමසිංහ පවසයි.
ඔහු මේ බව පැවසුවේ සිරිකොත එක්සත් ජාතික පක්ෂ මූලස්ථානයේ ඊයේ (15) පැවති හමුවකදීය.
එක්සත් ජාතික පක්ෂයට අනුබද්ධිත ‘ග්‍රීන් බ්ලඩ්’ සංවිධානයේ නියෝජිතයින් සහ පක්ෂ නායක රනිල් වික්‍රමසිංහ අතර හමුවක් ඊයේ සිරිකොත පක්ෂ මූලස්ථානයේදී පැවැත්වුණි.
එහිදී වැඩිදුරටත් අදහස් දක්වමින් එක්සත් ජාකිත පක්ෂ නායක රනිල් වික්‍රමසිංහ මෙසේද පැවසීය.
“මට අවශ්‍යයි නව නායකයින්ට අවස්ථාව ලබාදෙන්න. නමුත්, අප එකක් සිහි තබාගත යුතුයි. ඒ තමයි නව පරම්පරාවට මේ රටේ දේශපාලන ක්‍රමය පිළිබඳ විශ්වාසය බිඳිලා තිබෙනවා. මාස කීපයකට පසු ඔවුන් කිව්වේ පාර්ලිමේන්තුවේ 225 දියවන්නාවට දැමිය යුතුයි කියලා.
ඵලදායි නව ආරම්භයක් ඔවුන් බලාපොරොත්තු වෙනවා. පසුගිය ජනාධිපතිවරණයේදී දේශපාලන ධාරාවෙන් තොර පුද්ගලයෙකු ජනාධිපතිවරයා ලෙස තෝරා ගත්තත් එහි ප්‍රතිඵල මෙතෙක් අත්වී නැහැ.
නව මුහුණු වගේම පැරණි මුහුණු තිබෙනවා. ඔබ පැරණි මුහුණුවලට අකමැතිනම් එය පසෙකින් තබා නවකයෙක් තෝරාගන්න.“
