අපේ රටේ උපායමාර්ගික භූගෝලීය වැදගත්කම නිසා වර්තමානයේ රට මුහුණ දී ඇති අර්බුදකාරී තත්ත්වයෙන් පළ ප්‍රයෝජන ගැනීමට කලාපීය සහ ලෝක බලවතුන් උත්සාහ කරන බව හමුදාපති සරත් ෆොන්සේකා පවසයි. ඇමරිකා එක්සත් ජනපදය සමග ආරක්ෂක ගිවිසුමකට යාම පිළිබඳ තමා එකඟ නොවන බව ද එය තමන්ගේ සියලු දේපළ කිසිවකුට ලියා දී සිය දිවි නසා ගැනීමක් බව ද ඔහු පෙන්වා දෙයි.

ශ්‍රී ලංකා ආණ්ඩුව ඇමරිකා එක්සත් ජනපදය සමග අත්සන් කිරීමට යන ආරක්ෂක ගිවිසුම මේ වන විට බොහෝ පාර්ශවවල දැඩි විවේචනයට ලක් වී ඇති අතර ලංකාවේ සිටින ඇමරිකානු ආරක්ෂක නිලධාරීන් ලංකාවේ නීතියට නොව ඇමරිකානු නීතියට යටත් වන බවට ද ඔවුන් පරික්ෂා කිරීමකින් තොරව අපේ රටට ඕනෑම දෙයක් රැගෙන ඒමට ද අවසර දිය යුතු බවට එහි වගන්ති ඇතුළත් යැයි ද චෝදනා නැඟෙයි.