ජනතාව ප්‍රතික්ෂේප කළ පිරිස් පණ ගැට ගහ ගැනීම සඳහා සන්ධාන ගතවීම් සිදුකරමින් සිටියද ඒ කිසිදු සන්ධානයකට ජාතික ජනබල වේගය එකතු වන්නේ නැතැයි ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා පවසයි.

පැලවත්ත පක්ෂ කාර්යාලයේ අද (29) පැවැති මාධ්‍ය හමුවකදී හෙතෙම මේ බව පැවසීය.

මේ රටේ දැවැන්තම සන්ධානය වන ජනතාව සමඟ ජාතික ජනබලවේගය මේ වන විට විශාල ලෙස සන්ධාන ගතවී ඇතැයි පැවසු ලේකම්වරයා දිනෙන් දින ඒ සන්ධානයට ජනතාව ඒකරාශි වන බව පෙනෙන්නට ඇතැයි ද පැවසීය.

ලාභ සහ ජනප්‍රිය දේශපාලන සටන් පාඨවලට ජනතාව රැවටුණු යුගය නිමාකරමින් සමාජයේ ගැඹුරු වෙනස්කම් සඳහා ජනතාව පෙරට එමින් සිටින බව ද හෙතෙම කීය.

ඉදිරි මැතිවරණවල පරාජය පිළිබඳව බියට පත්ව ඇති පාලකයන් දුෂිත කණ්ඩායම් විවිධ උපක්‍රම භාවිත කිරිමට පටන්ගෙන ඇතැයිද කී ලේකම්වරයා ඒ අනුව රංචු ගැසෙමින් නව පෙනුමකින් ජනතාව තව දුරටත් රැවටිය හැකිදැයි මාන බලනබවද පැවසීය.

රටක් බංකොළොත් පිරිසකට නැවත රට දියුණු කළ⁣ නොහැකි බව පැවසු ඒ මහතා ජන්ද මඟ හැරිම සඳහා බොරුවට වැඩපිළිවෙළවල් හදන බවද කීය.

විධායක ජනාධිපති ක්‍රමය ⁣ අහෝසි කිරිම කඩිමුඩියේ කළ නොහැක්කක් බව පෙන්වා දුන් ටිල්වින් සිල්වා මහතා ජාතික ජනබලවේගයේ ආණ්ඩුවක් යටතේ නව ව්‍යවස්ථාවක් සම්පාදනය කර ඒ කරුණ ඉටුකිරීම අනිවාර්යයෙන් ම කරන බව ද කීය.