පොහොට්ටු ඇමැතිකම් ගලවා ශ්රීලනිපයට දීලා..! කැබිනට් සංශෝධනයට පොහොට්ටුවේ දැඩි විරෝධය…!
October 23, 2023 at 3:53 pm | by emanisa.lk
අද (23) සිදුකළ කැබිනට් සංශෝධනය නිසා පොදුජන පෙරමුණ කනස්සල්ලට පත්ව ඇතැයි එම පක්ෂයේ මහ ලේකම් සාගර කාරියවසම් පවසයි.
“කෙහෙළිය ඇමතිතුමාට විරුද්ධව බොරු චෝදනා නැගුවා. ඒ සියල්ල බොරුවක් බව ඔප්පු වුණා. නමුත් ජනාධිපතිතුමා තීරණය කරන්න ඇති මෙවැනි තත්ත්වයක් යටතේ ඒ සම්බන්ධයෙන් යම්කිසි වෙනසක් සිදුකරන එක හොඳයි කියලා. ඒ අනුව රමේෂ් පතිරණ මහතා වෘත්තීයෙන් වෛද්යවරයෙක් වන එතුමා සෞඛ්ය ඇමති ලෙස පත්කරලා තියෙනවා.
කෙසේ වෙතත් අපේ යම්කිසි කනස්සල්ලක් තියෙනවා. ඒ සම්බන්ධයෙන් ජනාධිපතිතුමාව අපි දැනුම්වත් කළා. මොකද පාර්ලිමේන්තුවේ ජනාධිපතිතුමාට රජය ගෙනියන්න ශක්තිය දෙන්නේ ශ්රී ලංකා පොදුජන පෙරමුණ. ශ්රී ලංකා පොදුජන පෙරමුණේ මන්ත්රීවරු තමා අති බහුතරයක් මේ ශක්තිය ලබාදෙන්නේ.
ශ්රී ලංකා නිදහස් පක්ෂයේ මන්ත්රීවරු 5දෙනයි ඉන්නේ. නමුත් මෙතනිනුත් ඇමති ධුරයක් ගලවලා ශ්රී ලංකා නිදහස් පක්ෂයට දීලා රාජ්ය ඇමති ධුරයකුත් අලුතින් ඒකට දීම ගැන අපි සතුටු නෑ. ඒක වැරදි දෙයක්. වැරදි දෙයට වැරදියි කියන්නත් අපි බය වෙන්නේ නෑ. ජනාධිපතිතුමා වුණත් වැරදි දේ කරනවා නම් වැරදියි. ජනාධිපතිතුමාට ඒක නොකර ඉන්න තිබුණා. ඒ ගැන අපි පක්ෂය විදියට දැඩි විරෝධය පළ කරනවා.”
මාධ්ය හමුවකට එක්වෙමින් ඒ මහතා වැඩිදුරටත් පවසා සිටියේ එම තීරණය ජනාධිපතිවරයා ගත් වැරදි තීරණයක් බවය.
