බෙදුම්වාදීන්ගේ සහ ආගමික අන්තවාදීන්ගේ බෝම්බ පිපිරීම්වලින්  දුක් කරදර ව්ඳී ජනතාවට  අද ගෑස් සිලින්ඩර පිපිරීමෙන් එවැනිම දුක් කරදර විඳීමට සිදුවී ඇතැයි  විපක්ෂ නායක සජිත් ප්‍රේමදාස  පාර්ලිමේන්තුවේදී අද (30)පැවැසීය.

ගෑස්  සංයුතියේ වෙනසක් නිසා මෙලෙස පුපුරා යන බව විද්වතුන් මත පළ කර ඇතැයිද  හෙතෙම  සඳහන් කළේය.

ඔහු මෙසේ පැවසුවේ ස්ථාවර නියෝග 27(2) යටතේ ප්‍රශ්නයක් මතු කරමිනි.

විපක්ෂනායකවරයා මෙම ප්‍රශ්නය මතු කරමින් මෙසේද සඳහන් කළේය.

ශ්‍රී ලංකාවේ මිලියන 6කට ආසන්න ගෘහස්ථ පාරිභෝගිකයන් සංඛ්‍යාවක් තම දෛනික අවශ්‍යතා සඳහා ගෑස් පරිභෝජනය කරනු ලබන බව වාර්තා වේ. මෙම සියලුම පාරිභෝගිකයන් සඳහා ගෑස් සැපයීම සිදු කරනු ලබන්නේ සමාගම් දෙකක් විසින්ය. පසුගිය කාලසීමාව තුළ වැලිගම, අලව්ව, රත්නපුර, කොළඹ, කොට්ටාව හා නිකවැරටිය යන ප්‍රදේශවල දිගින් දිගටම සිදු වූ ගෑස් ආශ්‍රිත පිපිරීම් සමග ලංකාවේ ගෘහස්ථ ගෑස් භාවිතය සම්බන්ධයෙන් භීතියක් ජනතාව තුළ හටගෙන තිබේ. මේ සම්බන්ධයෙන් මා  පසුගිය සෙනසුරාදා දින එනම්, 2021 නොවැම්බර් 26 දින පාර්ලිමේන්තුවේ අවධානය යොමු කළ අතර, ඒ සම්බන්ධයෙන්  රාජ්‍ය අමාත්‍ය ලසන්ත අලගියවන්න මහතා විසින්  යම් කරුණු පැහැදිලි කිරීමක් කරන ලදී. එම පැහැදිලි කිරීම ප්‍රමාණවත් නොවන බැවින්, පාරිභෝගික සුරක්ෂිතතාවයට, රටේ ගෘහණියන්ගේ හා නිවැසියන්ගේ ආරක්ෂාව වෙනුවෙන්,  නිවැරදි හා වගකීම් සහගත තොරතුරු ලබා ගැනීමට මෙම ගැටලුව ස්ථාවර නියෝග 27 (2) ප්‍රශ්නයක් යටතේ ඉදිරිපත් කිරීමට අපේක්ෂා කළෙමි.

මෙහි මූලාරම්භය සිදු වනුයේ, මෙම වසරේ මුල් භාගයේ දී ලීටර 18 ක හයිබ්‍රිඩ් නමින් හඳුන්වාගත් ගෑස් සිලින්ඩරයක් හඳුන්වාදීමත් සමග ය. පාරිභෝගික ජනතාව නොමඟ යවමින්, අධික ලාභයක් ලැබීම සඳහා මෙම වංචනික ක්‍රියාව සිදු කර ඇත.  එසේම, පාරිභෝගික අධිකාරිය හෝ වෙනයම් අදාල රාජ්‍ය ආයතනයක් හෝ නිසි පරිදි දැනුම්වත් කර මෙය සිදු නොකළ හෙයින් එම ක්‍රියාව නැවැත්වූ බවත්, එම ගෑස් වෙළඳපොළෙන් ඉවත් කළ බවත් රාජ්‍ය අමාත්‍යතුමා පසුගිය සෙනසුරාදා පාර්ලිමේන්තුවේදී පැවසීය. රාජ්‍ය අමාත්‍යතුමාට අනුව එම වංචනික ක්‍රියාව අවසන් විය. එය සිදුකළ පුද්ගලයන්ට එරෙහිව නඩු පවරා ඇත.

කෙසේ වෙතත් ගෑස් කාන්දු වීම් මගින් පිපුරුම් අනතුරු රටපුරා වාර්තා වේ. ලීටර 18 ගෑස් සිලින්ඩර වංචාවේ දී අනාවරණය වූ එක් ප්‍රධානතම ගැටලුවක් වනුයේ, සංයුතිය වෙනස් කොට ගෑස් සිලින්ඩරයේ බර අඩු කිරීමයි. දෙවැනි බරපතලම ගැටලුව වූයේ, අප වැනි ඝර්ම කලාපීය රටකට කිසිසේත් ම නොගැලපෙන සංයුතියකට ගෑස් සිලින්ඩරයේ ප්‍රොපේන්, බියුටේන් මිශ්‍රණ ප්‍රතිශත වෙනස් කිරීමයි. එනම්, රාජ්‍ය අමාත්‍යතුමා මෙම සභාවට පැහැදිලි කළ අයුරින් මෙම වංචාව සදහා ගෑස් සිලින්ඩරයක එතෙක් පැවති බියුටේන් හා ප්‍රොපේන් සංයුතිය 70:30 සිට 50:50 දක්වා වෙනස් කර ඇත.