අවුරුද්ද චාරිත්‍ර වාරිත්‍රවලට සීමා වෙයි…! අවුරුදු උත්සව පොළ සැනකෙළි සඳහා අවසර නෑ…..! සංචරණ සීමා පනවන්නත් සූදානම්…!
March 29, 2021 at 9:42 am | by emanisa.lk
සිංහල හා හින්දු අලුත් අවුරුදු සමයේ දී අවුරුදු උත්සව, පොළ හා වසන්ත සැනකෙලි සඳහා අනුමැතිය ලබානොදීමට සෞඛ්‍ය අමාත්‍යාංශය තීරණය කර ඇත.
අවුරුදු චාරිත්‍ර වාරිත්‍ර පමණක් නිවාසවලදී කිරීමට අනුමැතිය ලබාදෙන අතර ගමන් බිමන් සීමා කරන ලෙසද ජනතාවගෙන් ඉල්ලා සිටීමට අමාත්‍යාංශයේ අවධානය යොමුව තිබේ. ජනතාව අනවශ්‍ය පරිදි ගමන් බිමන් යාම පාලනය කිරීම සඳහා අවශ්‍ය වුවහොත් සංචරණ සීමා පැනවීමට ද අමාත්‍යාංශය සාකච්ඡා කර ඇත.
අවුරුදු සමයේ කොළඹ සිට ගම්බිම් කරා යන සියලුම පුද්ගලයන්ගේ තොරතුරු ලබාගන්නා ලෙස සෞඛ්‍ය අමාත්‍යාංශයේ සෞඛ්‍ය වෛද්‍ය නිලධාරී කාර්යාලවලට සහ මහජන සෞඛ්‍ය පරීක්ෂකවරුන්ට දැනුම් දීමට නියමිතය. ඇතැම් අවස්ථාවලදී ගම් මට්ටමින් එලෙස පැමිණෙන පුද්ගලයන්ගේ රැපිට් ඇන්ටිජන් පරීක්ෂණ හෝ පී.සී.ආර්. පරීක්ෂණද කිරීමට සැලසුම් කර ඇත.
සෞඛ්‍ය අමාත්‍යාංශය දැනට සකස් කර ඇති මෙම සෞඛ්‍ය මාර්ගෝපදේශ කොවිඩ් මර්දන කාර්ය සාධක බළකායට අද (29 වැනිදා) ඉදිරිපත් කිරීමට නියමිතය. එහි දී කරන සංශෝධනද ඇතුළත්ව අවුරුදු සමය වෙනුවෙන් කොවිඩ් මාර්ගෝපදේශ මාලාව නිකුත් කිරීමට සෞඛ්‍ය අමාත්‍යාංශය සූදානම් වෙයි.
