ආර්ථික අර්බුදයට IMF විසඳුම මෙන්න…! අධික පාඩු ලබන රාජ්‍ය ආයතන 39ක් ප්‍රතිව්‍යුහගත කිරීමට සූදානම්!
March 24, 2022 at 11:59 am | by emanisa.lk
අධික පාඩුවක් ලබන සංස්ථා සහ රජයේ ආයතන 39ක් ප්‍රතිව්‍යුහගත කිරීමට රජය තීරණය කර ඇතැයි අනාවරණය වෙයි.
මෙම රාජ්‍ය ආයතන ප්‍රතිව්‍යුහගත කිරීම පිළිබඳ මුදල් අමාත්‍යාංශය විසින් ජනාධිපති ගෝඨාභය රාජපක්ෂ වෙත කළ දැනුම්දීමකට අනුව එම කටයුතු සිදුකෙරෙන බව රජයේ ඉහළ පෙළේ ආරංචි මාර්ග සඳහන් කළේය.
ඒ අනුව අදාළ ආයතන වෙත ජනාධිපති අරමුදල මහා භාණ්ඩාගාරය, මහ බැංකුව සහ මුදල් අමාත්‍යාංශය මඟින් වෙන් කෙරෙන ප්‍රතිපාදන සීමා කෙරෙන අතර, අනවශ්‍ය වියදම් පිළිබඳ සොයා බලා ඒවාට අදාළ සියලු ව්‍යාපෘති නතර කර දමනු ඇතැයි වාර්තා වේ.
මෙම රාජ්‍ය ආයතන 39 ඇතුළත් අමාත්‍යාංශ භාර කැබිනට් අමාත්‍යවරුන් සහ රාජ්‍ය අමාත්‍යවරුන් වෙත මේ පිළිබඳව නිල නොවන මට්ටමින් මුදල් අමාත්‍ය බැසිල් රාජපක්ෂ දැනුම් දී ඇති බව ද රජයේ ආරංචි මාර්ග සඳහන් කළේය. මුදල් අමාත්‍ය බැසිල් රාජපක්ෂ කළ දැනුම්දීමකට අදාළ අමාත්‍යාංශ ලේකම්වරුන් වෙත නිල වශයෙන් දැනුම්දීම සඳහා නව චක්‍රලේඛයක් සකස් කරමින් පවතින බව සඳහන් වේ.
ජාත්‍යන්තර අරමුදල විසින් ශ්‍රී ලංකාවට පනවා ඇති ණය කොන්දේසි යටතේ පාඩු ලබන රාජ්‍ය ආයතන ප්‍රතිව්‍යුහගත කෙරෙන බව එක්සත් ජාතික පක්ෂය පවසයි. ඒ අනුව ඉදිරියේදී එම ආයතනවල අනවශ්‍ය සේවක කප්පාදුවට අමතර දීමනා අත්හිටුවීම, පාඩු ලබන ව්‍යාපෘති නතර කර දැමීම අනිවාර්යයෙන් සිදුවන බවද පැවැසීය.
ප්‍රතිව්‍යුහගත කිරීමට නියමිත රාජ්‍ය ආයතන 39ක් අතර විදේශ සම්පත් දෙපාර්තමේන්තුව, ජාතික වැටුප් කොමිසම, සේවා නියුක්තිකයන්ගේ භාරකාර අරමුදල, ශ්‍රී ලංකා සංචාරක ප්‍රවර්ධන කාර්යාංශය, ජාතික සත්වෝද්‍යාන දෙපාර්තමේන්තුව, ශ්‍රී ලංකා දුම්රිය දෙපාර්තමේන්තුව, ශ්‍රී ලංකා මධ්‍යම ගමනා ගමන මණ්ඩලය, මෝටර් රථ ප්‍රවාහන දෙපාර්තමේන්තුව, සිවිල් ගුවන් සේවා අධිකාරිය, සීමාසහිත ගුවන් තොටුපොළ හා ගුවන් සේවා (ශ්‍රී ලංකා) සමාගම, විදේශගත රාජ්‍ය දූත මණ්ඩලය, කම්කරු දෙපාර්තමේන්තුව, සේවක අර්ථසාධක අරමුදල, ජාතික වෘත්තීය සුරක්ෂිතා සහ සෞඛ්‍ය ආයතනය, මාර්ග නඩත්තු භාර අරමුදල, ජාතික ජලසම්පාදන හා ජලාපවහන මණ්ඩලය, ශ්‍රී ලංකා ප්‍රමිති ආයතනය, රාජ්‍ය ඔෂධ නිෂ්පාදන සංස්ථාව, දුම්කොළ සහ මද්‍යසාර පිළිබඳ ජාතික අධිකාරිය, රාජ්‍ය මූල්‍ය ප්‍රතිපත්ති දෙපාර්තමේන්තුව, රාජ්‍ය මුදල් දෙපාර්තමේන්තුව, දේශීය ආදායම් දෙපාර්තමේන්තුව, ශ්‍රී ලංකා රේගුව, සුරාබදු දෙපාර්තමේන්තුව, වාණිජ දෙපාර්තමේන්තුව, පාරිභෝගික කටයුතු පිළිබඳ අධිකරිය, සීමාසහිත ලංකා සතොස, සීමා සහිත ලංකා සිමෙන්ති සමාගම, ලංකා ධීවර සංස්ථාව, ශ්‍රී ලංකා තේ මණ්ඩලය, පොල් වගාකිරීමේ මණ්ඩලය, ශ්‍රී ලංකා විදුලිබල මණ්ඩලය, වී අලෙවි මණ්ඩලය, සීමාසහිත ශ්‍රී ලන්කන් එයාර් ලයින් සහ එහි පාලිත සමාගම, සියලුම රාජ්‍ය බැංකු හා ඒවායේ පාලිත සමාගම්, විශ්‍රාම වැටුප් දෙපාර්තමේන්තුව, රාජ්‍ය සේවා විශ්‍රාමිකයන්ගේ භාර අරමුදල, ශ්‍රී ලංකා වරාය අධිකාරිය සහ එහි පාලිත සමාගම් හා ඒ ආශ්‍රිත සමාගම්, තැපැල් දෙපාර්තමේන්තුව සහ ලංකා ඛනිජ තෙල් නීතිගත සංස්ථාව ඇතුළත් බව වාර්තා වේ.
ශ්‍රී ලංකාව මීට ඉහතදී ජාත්‍යන්තර අරමුදලෙන් ණය ගත් අවස්ථාවල දී ද පාඩු ලබන රාජ්‍ය ආයතන ප්‍රතිව්‍යුහගත කළද ඒවා නිසි ලෙස ක්‍රියාත්මක නොවුණේ රාජ්‍ය ආයතනවල සේවකයන්ගේ වෘත්තීය සමිතිවලින් පැන නැඟුණු විරෝධතා නිසා බව ආර්ථික විශ්ලේෂකයන් පෙන්වා දී තිබේ. මේ වන විට ලංකාවේ රාජ්‍ය සේවකයින් සංඛ්‍යාව ලක්ෂ 18ක් පමණ වන අතර රාජ්‍ය ආදායමින් 28%ක් වැය වන්නේ මෙම පිරිසට වැටුප් දීමනා ආදිය ගෙවීම සඳහා ය. අකාර්යක්ෂම රාජ්‍ය සේවය මේ වන විට රටට මහත් බරක් වී ඇති අතර සෙසු ජනතාවගෙන් බදු අයකර රාජ්‍ය සේවකයින් නඩත්තු කිරීමට සිදුව ඇත.
