කොරෝනා වෛරසය ආසාදනය වී මිය යන පුද්ගලයින්ගේ දේහ සම්බන්ධයෙන් රජයේ අදහස කුමක්දැයි රටට සෘජුව ප්‍රකාශ කරන ලෙස පේරාදෙණිය ගැටඹේ රාජෝපවනාරාමාධිපති පූජ්‍ය කැප්පෙටියාගොඩ සිරිවිමල නා හිමි ජනාධිපතිවරයාගෙන් ඉල්ලා සිටියි.

නිවේදනයක් නිකුත්කරමින් උන්වහන්සේ එම ඉල්ලීම සිදුකර තිබේ.

“මෙතෙක් අනුගමනය කළ පොදු නීතියෙන් බැහැර වී, ඉස්ලාමීය මළ සිරුරු භූමදානය කිරීමට අවසර දී ඇතැයි යන ආරංචියත්, එය සනාථ කරමින් ප්‍රබල කැබිනට් ඇමතිවරයකු විසින් කළ ප්‍රකාශය නිසාත් අපි තරමක කනස්සල්ලකට පත්ව සිටිමු. සතර දිගින් පැනනැගි විරෝධය හමුවේ හකුළාගත් එම තීන්දුව අද නැතත්, තවත් මාස දෙකකින් හෝ නැවත ක්‍රියාවට නැංවීමට මේ රජයට කිසිදු සදාචාරාත්මක අයිතියක් නැතැයි අවධාරණය කර සිටිමි.

ඒ, රුවන්වැලි මහ සෑ මළුවේ, දුටුගැමුණු පිළිරුව අභියසදී ජනාධිපතිතුමන් විසින් පිළිබිඹු කළ අභිමානනීය ප්‍රතිරූපය කෙළෙසාගැනීමක් වන අතර, 69 ලක්ෂයකට අධික සිංහල බෞද්ධ බහුතර ජනතාවක් විසින් ආණ්ඩුව කෙරෙහි තැබූ විශ්වාසය, විද්‍යාත්මක නොවූ කරුණක් නිසා අබමල් රේණුවකින් හෝ පළුදු වනු දැකීම අපගේ කැමැත්ත නොවන බැවිනි. ඔබතුමන් ඉල්ලූ පරිදි අති බහුතර බලයකින් විධායක බලයද, 2/3 බහුතර බලයකින් ව්‍යවස්ථාදායකයද ලබාදුන් ජනතාව විසින් තම ප්‍රාර්ථනා පූර්ණය කරන අධිකරණයක් සකසා ගනීවි යැයි බලාපොරොත්තු වුව ද එවැන්නක් සිදුවූයේ නැතැයිද බොහෝ දෙනකු දරන මතයක් වී තිබේ.

එබැවින් තවමත් මේ රටේ සිංහල බෞද්ධ බහුතරය බලාපොරොත්තු තබා ඇති ගෝඨාභය රාජපක්ෂ ජනාධිපතිතුමාගෙන් ඉල්ලා සිටින්නේ අන්තවාදී බලවේගයන්ගේ අතාර්ථික හා අවිද්‍යාත්මක ඉල්ලීම්වලට සවන් දී තීන්දු ගැනීමට කැබිනට් මණ්ඩලයට ඉඩ නොදිය යුතු බවත්, එසේ කළහොත් සිංහල බෞද්ධ බහුතරය මෙන්ම හින්දු හා කතෝලික භක්තිකයන් ද තම තමන්ගේ සංස්කෘතික අයිතීන් ඉල්ලා පාරට බැසීමට ඇති ඉඩකඩ ඇහිරීමට දුරදක්නා නුවණින් කටයුතු කරන ලෙස ය.

රජයේ අදහස මේ යැයි ඔබතුමන් විසින් සෘජුව ප්‍රකාශ කරන්නේ නම්, මැති ඇමැතිවරුන් විසින් අත්තනෝමතිකව කරන මත ප්‍රකාශ නිසා රටම අවුල්වීමට ඇති ඉඩකඩ ඇහිරී යනු ඇත. එක රටක් එක නීතියක් මෙන්ම එක රජෙකුගේ සෘජු පාලනයක් ජනතා අපේක්ෂාව බව අවධාරණය කර සිටීමට කැමැත්තෙමි.”