යෝජිත 21 වැනි ආණ්ඩුක්‍රම ව්‍යවස්ථා සංශෝධනය සම්මත කළහොත් දැනට පවතින ආර්ථික අර්බුදය දේශපාලන අර්බුදයක් දක්වා වර්ධනය වන බවට නිතීඥ කනිෂ්ක විතාරණ අනතුරු අඟවයි.

ඔහු මේ බව ශ්‍රේෂ්ඨාධිකරණයේ දී අද (30) ප්‍රකාශ කළේය.

දේශප්‍රේමී ජාතික පෙරමුණේ මහ ලේකම්වරයා වෙනුවෙන් අධිකරණයේ පෙනී සිටි නිතීඥවරයා මෙලෙස ප්‍රකාශ කළේ යෝජිත 21 වැනි සංශෝධනයට එරෙහිව ගොනු කර ඇති පෙත්සම් පහක් අද (30) විභාගයට ගත් අවස්ථාවේදීය.

ආචාර්ය ගුණදාස අමරසේකර, ජාතික ඒකාබද්ධ කමිටුවේ සම සභාපති ලුතිනන් කර්නල් අනිල් අමරසේකර, එක්සත් ලංකා මහ සභා පක්ෂයේ ලේකම් ජයන්ත කුලතුංග ඇතුළු පස් දෙනකු විසින් මෙම පෙත්සම් ශ්‍රේෂ්ඨාධිකරණය හමුවේ ගොනුකරනු ලැබ තිබිණි.

අගවිනිසුරු ජයන්ත ජයසූරිය, ජනක් ද සිල්වා සහ අර්ජුන ඔබේසේකරගෙන් සමන්විත ශ්‍රේෂ්ඨාධිකරණ විනිසුරු මඩුල්ලක් හමුවේ මෙම පෙත්සම් අද (30) කැඳවිණි.

දේශප්‍රේමී ජාතික පෙරමුණේ මහ ලේකම් නිතීඥ නුවන් බෙල්ලන්තුඩාව වෙනුවෙන් අධිකරණයේ පෙනී සිටි නිතීඥ කණීෂ්ක විතාරණ කරුණු දක්වමින් සදහන් කර සිටියේ, මෙම යෝජිත පනත් කෙටුම්පතෙහි 4 වන ඡේදය අනුව විධාය ජනාධිපතිවරයා මහජන ඡන්දයෙන් තේරී පත්වීමට ඇති අයිතිය අහිමි කර ඇති බවය.

මෙම පනත් කෙටුම්පතෙහි 7 වැනි ඡේදය අනුව අග්‍රාමාත්‍යවරයා සමග ජනාධිපතිවරයා කටයුතු කිරිමට ප්‍රතිපාදන සැලසීමෙන් ජනාධිපතිවරයාගේ බලතල කප්පාදු වී ඇති බවත් මේ හේතුවෙන් බලය බෙදීමේ න්‍යාය උල්ලංඝනය වන අතර මෙය සම්මත කළහොත් දැනට පවතින ආර්ථික අර්බුදය දේශපාලන අර්බුදයක් දක්වා පරිවර්තනය වන බවත් නිතීඥවරයා සඳහන් කළේය.