බැරෑරුම් සූත්‍රවලට යන්න කලින් රනිල් වික්‍රමසිංහ බෞද්ධයකු ලෙස පන්සිල් පද පහෙන් දෙවන පදය රැකිය යුතු බව ජවිපෙ නායක අනුර කුමාර දිසානායක අවධාරණය කරයි.

සැබවින් ම, රනිල් වික්‍රමසිංහ යනු අභියෝග භාරගත් පුද්ගලයෙක් නොව වංචනිකයන් රැකීමේ අභියෝගය භාරගත් පුද්ගලයෙක් යැයි ද මන්ත්‍රීවරයා චෝදනා කළේය.

“රනිල් හැම ප්‍රකාශයකදී ම කියනවා මේ කිසි අභියෝගයක් කවුරුවත් භාරගත්තේ නැහැ, මමයි භාර ගත්තේ කියලා. ඇත්තට ම රනිල් අභියෝගය භාර ගත්තේ නැහැ. තෝරා ගත්තා. ඒ වංචනිකයන් බේරා ගැනීමට කළ තෝරා ගැනීමක්.

රනිල් පාර්ලිමේන්තුවේ ජනාධිපති ලෙස තෝරා ගන්න ඡන්ද විමසීමේදී රාජපක්ෂ කඳවුර දේශපාලනිකව බිත්තියට හේත්තු වෙලා තිබ්බේ. අරගලය තුළ වංචා දූෂණ සහ වංචනිකයන්ට එරෙහි ප්‍රබල මතයක් තිබුණා. ඉතින් රනිල් තෝරා ගත්තේ ඒ වංචනිකයන්, ආර්ථික ඝාතකයන් බේරා ගැනීම සඳහා කළ තෝරා ගැනීමක්.

රනිල් කූඨදන්ත සූත්‍රය මතු කළා. මෙවැනි බැරෑරුම් සූත්‍රවලට යන්න කලින් මම රනිල් වික්‍රමසිංහට කියනවා බෞද්ධයෙකු ලෙස පන්සිල් පද පහෙන් දෙවන පදය මුලින් ම රකින්න කියලා. එහෙම වුණා නම් මේ රටේ මහ බැංකුව කොල්ල කන්නෙත් නැහැ. ඒ වගේ ම එතුමාගේ නඩේටත් කියනවා ඒ දෙවන සිල් පදය රකින්න කියලා. ඒ වගේ ම එතුමා කිව්වා මළ මිනී මතින් බලය ගන්න යන කතාවක්. මළ මිනී මතින් බලය ගන්නට කටයුතු කළේ කවුද කියලා එතුමාගේ හෘද සාක්ෂියෙන් ඇහුවොත් හොඳයි.

විශේෂයෙන් ම, අපේ රට තිබෙන්නේ දැඩි අර්බුදයක. ජාත්‍යන්තර සහය තියෙනව ලු. ඒත් ජාත්‍යන්තරය මොකක් ද කියන්නේ? ලංකාවේ විශාල වංචා දූෂණ තියෙනවා. ඒවාට නීතිය ක්‍රියාත්මක කරලා අයි.එම්.එෆ් යන්න කියලා අමෙරිකානු සෙනෙට් සභාව කියනවා. ඒ වගේ ම ලෝක බැංකුව සල්ලි දෙන ගමන් කියනවා ඒ සල්ලි භාර ගන්නේ කවුද කියලා හොයන්න එවනවා කියලා. ඔන්න අපේ රටට තියෙන පිළිගැනීම.

විශේෂයෙන් ම, අපි ඩොලර් මිලියන 2800ක ණය ගෙවීම පැහැර හැරලා තියනවා. මේ කාරණාත් එක්ක ජාත්‍යන්තරය අප දිහා බලන විදිහ ඉතා ම අවාසිසහගතයි. අඩු ම තරමේ දේශීය ණයවත් ගෙවනව ද කියලා පැහැදිලිව කියන්න.”