ම්ලේච්ඡ පාස්කු ප්රහාරයට වගකිව යුතු කිසිවෙකුට නීතියෙන් ගැළවීමක් නෑ….! – ජනපති….
April 4, 2021 at 8:56 am | by emanisa.lk
2019 වසරේ පාස්කු දින එල්ල වූ ආකාරයේ ත්රස්ත ප්රහාර නැවත ඇති වීම සඳහා ඉඩ නොතබන බව ජනාධිපති ගෝඨාභය රාජපක්ෂ පණිවිඩයක් නිකුත් කරමින් අවධාරණය කරයි.
පාස්කුව ලෝකවාසී කිතුණු ජනතාවගේ උතුම්ම මංගල්යයයි. පාස්කු මංගල්යයේ අර්ථය පාපයෙන් ගැලවීමයි. ජන්ම පාපයෙන් නිදහස් ව, කළ වැරදි ගැන පසුතැවිලි වෙමින් නව දිවියක් ආරම්භ කිරීම ඉන් තවදුරටත් අරුත් ගැන්වෙයි.
ලොවපුරා විසිර පැතිර සිටින කිතුනුවෝ අළු බදාදා ආරම්භ වන, දින 40 ක කාල පරිච්ඡේදයක් ක්රිස්තූන් වහන්සේගේ දුක් ප්රාප්තිය සහ මරණය සිහිකරමින් ආධ්යාත්මික වතාවත්හි නිරත වෙති. පාස්කු ඉරුදින ඔවුහු උන්වහන්සේ උත්ථානවීමේ විජයග්රාහී මොහොත මහත් ප්රීතියෙන් සමරති.
කිතුනු ජනතාව මේ කාලය තුළ ක්රිස්තූන් වහන්සේ මානව සංහතිය පාපයෙන් මුදාගැනීමේ චේතනාවෙන් කුරුසියේ දුක්විඳ ඉතා වේදනාකාරී මරණය පරාජයකර නැවත නැගිට විමුක්තිය අත්කරදීම මෙනෙහි කරති.
ශ්රී ලාංකේය කිතුණු ජනතාව අසීමිත ගෞරවයෙන් හා භක්තිවන්තව සමරන පාස්කු සමය අන්තවාදී ම්ලේච්ඡ ප්රහාරයකට වරෙක ගොදුරු විය. ඉන් බිඳුණු හදවත්වල වේදනාව අදටත් මැකී ගොස් නැත. ඒ පාපී ක්රියාවට වැරදිකරුවන් වන පුද්ගලයන්ට සහ කණ්ඩායම්වලට නීතියෙන් ගැලවීමට අප කිසිදු ඉඩක් තබන්නේ නැත. එසේම නැවත එවන් ඛේදාන්තයන්ට කවර හෝ අවසරයක් නොලැබෙන පරිදි ජාතික ආරක්ෂාව තහවුරු කිරීමට රජය වග වී සිටී.
ජේසුස් වහන්සේ එදා දේශනා කළ මානව විමුක්තිය සමාජයට ශක්තියකි. අද ලෝකය හමුවේ මුහුණපෑමට සිදුවන බහුවිධ තාඩන පීඩන පරාජයකර නැගීසිටීමටත් ප්රේමයෙන් දයාවෙන්යුතු මානව හිතවාදී සමාජයක් තුළ ජීවත්වීමටත් මේ පාස්කු සමය ආශීර්වාදයක් කරගනිමු.
සැමට සාමකාමී පාස්කු මංගල්යයක් වේවා !
මේ අතර, පාස්කු දිනය වෙනුවෙන් පණිවිඩයක් නිකුත් කරමින් අග්රාමාත්ය මහින්ද රාජපක්ෂ මහතා පෙන්වා දෙන්නේ පාස්කු ප්රහාරයේ වින්දිතයන් වූ සැමට සාධාරණය ඉටුවන තෙක් කිතුණු ජනතාවගේ ඉවසීම විශිෂ්ට බවය.
මෙම මිලේච්ඡ ප්රහාරය එදා මෙන්ම අදත් තරයේ හෙළාදකින අතර ප්රහාරයෙන් ජීවිත අහිමි වූ කිතුණු ජනතාවගේ පවුල්වල සාමාජිකයින්ට මෙන්ම සමස්ත කිතුණු ජනතාවට සංවේගය පළකරන බව අග්රාමාත්යවරයා පවසයි.
එමෙන්ම පාස්කු දින ත්රස්ත ප්රහාරයට වගකිවයුත්තන් නීතිය හමුවට ගෙන ඒමේ පරීක්ෂණ රජයක් ලෙස මේ දක්වා අඛණ්ඩව ඉටුකර තිබෙන බවද අග්රාමාත්යවරයා එහිදී පෙන්වාදී තිබේ.
