වෘත්තීය සමිති කියන විදිහට වැඩ කළොත් රට ඇෆ්ගනිස්ථානෙට වඩා පහළට වැටෙනවා…! – ජනපති….
April 4, 2023 at 8:49 am | by emanisa.lk
18 වන වතාවටත් ජාත්‍යන්තර මූල්‍ය අරමුදල වෙත යාමට තමා කිසිසේත්ම බලාපොරොත්තු නොවන බව ජනාධිපති රනිල් වික්‍රමසිංහ පවසයි.
ඕනෑම ප්‍රශ්නයකට විසඳුමක් දිය හැක්කේ ජාත්‍යන්තර මූල්‍ය අරමුදලෙහි රාමුව තුළ පමණක් බව කී ජනාධිපතිවරයා, එයින් පිට යන්න හැකියාවක් නැතැයි ද මාස හයක රාමුවක් ලබා දී තිබෙන අතර වැඩ කටයුතු කළ යුත්තේ ඒ රාමුව තුළ පමණක් බව ද සඳහන් කළේය.
රාජ්‍ය ආයතන පෞද්ගලිකරණය කරන්න එපා යැයි වෘත්තීය සමිති ප්‍රකාශ කළ ද ඒවාට වියදම් කරන මුදල්වලින් තුනෙන් එකක් විශ්වවිද්‍යාලවලට සහ පාසල්වලට දුන්නා නම් මීට වඩා දියුණුවක් තිබෙන බවත් පැවසූ ජනාධිපතිවරයා, වෘත්තීය සමිතිවලට ඕන විදිහට වැඩ කරන්න බැරි බව ද කීය.
යළිත් ඇෆ්ගනිස්තානයෙන් පිටුපස්සට ශ්‍රී ලංකාව වැටෙන්න දෙන්න බැරි බව ද ජනාධිපතිවරයා කීය. ත්‍රස්තවාදය වැළැක්වීමේ පනත් කෙටුම්පත, සත්‍ය හා ප්‍රතිසන්ධාන කොමිසම සහ දූෂණ විරෝධී පනත් කෙටුම්පත යන කෙටුම්පත් තුන ම ජුනි මාසය වන විට පාර්ලිමේන්තුවට ඉදිරිපත් කරන බව ද ජනාධිපතිවරයා සඳහන් කළේය.
ජාත්‍යන්තර මූල්‍ය අරමුදල සමඟ වන ගිවිසුම පාර්ලිමේන්තුවට ඉදිරිපත් කර ඊට සහාය දෙනවාද? නැද්ද? යන්න පිළිබඳව ඡන්ද විමසීමක් සිදු කිරීමට බලාපොරොත්තු වන බවත් අනතුරුව එම එකඟතාවයේ ඇති ප්‍රධාන කරුණු නීතියක් ලෙස ගෙන ඒමට කටයුතු කරන බවත් ජනාධිපතිවරයා පැවසීය.
ජනාධිපති රනිල් වික්‍රමසිංහ මේ බව සඳහන් කළේ ජාත්‍යන්තර මූල්‍ය අරමුදලේ වැඩසටහන පිළිබඳ විශ්වවිද්‍යාල ආර්ථික විද්‍යා අධ්‍යනාංශයන්හි ආචාර්යවරුන් දැනුම්වත් සඳහා මුදල් අමාත්‍යාංශ ශ්‍රවණාගාරයේ පැවැති හමුව අමතමිණි.
