IMF වැඩපිළිවෙළ සාර්ථකයි…2025 ආර්ථිකය සුබ අතට….! – මහ බැංකු අධිපති….
November 28, 2024 at 9:32 am | by emanisa.lk
මෙරට ආර්ථිකය 2025 වසරේ දී සුබදායී තත්ත්වයකට පත්වනු ඇතැයි ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ මහතා පවසයි.
ජාත්‍යන්තර මූල්‍ය අරමුදල සමඟ ඉදිරි වැඩපිළිවෙළ සහ මෙරට ආර්ථික සැලසුම් සම්බන්ධයෙන් දැනුම්වත් කිරීම සඳහා ශ්‍රී ලංකා මහ බැංකුවේ දී පැවැති මාධ්‍ය හමුවට එක්වෙමින් ඒ මහතා මේ බව සදහන් කළේය.
මහ බැංකුවේ අධිපතිවරයා පෙන්වා දුන්නේ ජාත්‍යන්තර මූල්‍ය අරමුදල සමඟ පවත්නා වැඩපිළිවෙළේ තෙවැනි සමාලෝචනය මාණ්ඩලික මට්ටමේ එකඟතාවකට සාර්ථකව එළඹීමට හැකිව තිබෙන බැවින් රජය ඉදිරිපත් කරන අයවැය ජාත්‍යන්තර මූල්‍ය අරමුදල විසින් සම්මත කිරීමෙන් අනතුරුව ශ්‍රී ලංකාවට ලැබිය යුතු මුදල ඉතා ඉක්මණින් ලබාගැනීමට හැකිවනු ඇති බවයි.
මේ වන විට ජාත්‍යන්තර මූල්‍ය අරමුදල සමඟ ප්‍රතිපත්තිමය එකඟතාවකට පැමිණ තිබෙන බව පෙන්වාදුන් ඒ මහතා වසර දෙකක කාලයක් පුරා පවත්වාගෙන ගිය රාජ්‍ය ණය ප්‍රතිව්‍යුහගතකරණ වැඩපිළිවෙළ අවසන් අදියරට පැමිණ තිබෙන බව ද මේ වන විට ණයහිමියන් සමඟ මූලික එකඟතාවන්ට පැමිණ තිබෙන බව ද පැවසීය.
