පූජ්‍ය ගලගොඩඅත්තේ ඥානසාර හිමියන්ට ජනාධිපති සමාව ලබා දෙන ලෙස ඉල්ලා කොළඹ විහාරමහාදේවි උද්‍යානයේ භික්ෂූන් වහන්සේලා ප්‍රමුඛ පිරිසක් විසින් පවත්වනු ලබන සත්‍යග්‍රහය විසුරුවා හැරීමේ නියෝගයක් ලබා ගැනීම සඳහා පොලිසිය අධිකරණය හමුවේ නැවත කරුණු දැක්වීමට සූදානම් වන බව Sunday Times පුවත්පත වාර්තා කරයි.

උද්‍යාන භූමියේ රැඳී සිටින පිරිස හේතුවෙන් මහජන සාමයට දැඩි බාධාවක් එල්ල විය හැකි බව පවසමින් මෙම නව අධිකරණ ඉල්ලීම සිදු කිරීමට නියමිත බව ජ්‍යෙෂ්ඨ පොලිස් නිලධාරියෙකු උපුටා දක්වමින් එම පුවත්පත සඳහන් කර තිබේ.

විහාරමහාදේවි උද්‍යාන පරිශ්‍රයේ මෙවැනි ක්‍රියාකාරකම් පැවැත්වීම සඳහා කොළඹ මහ නගර සභාවෙන් නිසි අවසරයක් ලබා නොගැනීම, උද්‍යානයට පැමිණෙන විවේකී සුවය පතන මහජනතාවට මොවුන්ගේ රැඳී සිටීමෙන් සිදුවන බාධා මෙන්ම පසුගියදා පිහි දෙකක් ළඟ තබාගෙන සිටි පුද්ගලයෙකු එම ස්ථානයේදී අත්අඩංගුවට පත්වීම පදනම් කරගනිමින්, මෙම විරෝධතාව තවදුරටත් ඉදිරියට ගියහොත් ප්‍රචණ්ඩකාරී තත්ත්වයක් ඇතිවීමේ දැඩි ඉඩකඩක් පවතින බව පොලිසිය පෙන්වා දෙනු ඇත.

උද්‍යාන භූමිය අත්පත් කරගෙන සිටීම වැළැක්වීම සඳහා ඉකුත් සඳුදා දින පොලිසිය විසින් මහේස්ත්‍රාත් අධිකරණ නියෝගයක් ලබාගෙන තිබුණද, විරෝධතාකරුවන් අත්අඩංගුවට ගැනීම සඳහා වරෙන්තු නිකුත් කිරීම අධිකරණය විසින් මෙතෙක් ප්‍රතික්ෂේප කර තිබූ බැවින් පිරිස දිගින් දිගටම එහි රැඳී සිටියහ.

කෙසේ වෙතත්, උද්‍යාන භූමියේ රැඳී සිටින පුද්ගලයින්ගේ නම් ලැයිස්තුවක් සකස් කර අධිකරණයට ඉදිරිපත් කර අත්අඩංගුවට ගැනීමේ වරෙන්තු ලබා ගැනීමට බලාපොරොත්තු වන බවත්, පෙර අධිකරණ නියෝගය නොසලකා හැරීම සම්බන්ධයෙන් ඔවුන්ට එරෙහිව අධිකරණයට අපහාස කිරීමේ චෝදනා එල්ල විය හැකි බවත් අදාළ පොලිස් නිලධාරියා සඳහන් කර ඇත. හෙටින් පසුව මෙම විරෝධතාකරුවන්ට එහි රැඳී සිටීමට නොහැකි වනු ඇති බව ද ඔහු විශ්වාසය පළ කර තිබේ.

මේ අතර, සුළු පිරිසක් විසින් උද්‍යානයේ කොටසක් අත්පත් කරගනිමින් මහජනතාව ඒකරාශී කර ගැනීම සම්බන්ධයෙන් කොළඹ නාගරික කොමසාරිස්වරයා විසින් ද කුරුඳුවත්ත පොලිසිය වෙත නිල වශයෙන් පැමිණිල්ලක් ඉදිරිපත් කර ඇතැයි Sunday Times වැඩි දුරටත් අනාවරණය කරයි.