මේ ආණ්ඩුව සුද්දාගේ ආණ්ඩුවට වඩා භයානකයි… ඉවත් කළේ සමස්ත මහා සංඝ රත්නයේ සිවුරයි…!
October 7, 2026 at 3:54 pm | by emanisa.lk
බ්‍රිතාන්‍ය යටත්විජිත සමයේදී පවා මහා සංඝරත්නයට යම් ගෞරවයක් හිමිව තිබූ නමුත් වත්මන් රජය එම තත්ත්වය ඉක්මවා යමින් බුදු දහම සහ භික්ෂු සම්ප්‍රදාය මර්දනය කිරීමට කටයුතු කරමින් සිටින බවට ජාතික නිදහස් පෙරමුණේ නායක විමල් වීරවංශ චෝදනා කරයි.
බ්‍රිතාන්‍ය යටත්විජිත පාලන සමයේදී ද මහා සංඝරත්නය සම්බන්ධයෙන් නීතිය ක්‍රියාත්මක කිරීමේදී සහ දඬුවම් ලබා දීමේදී උන්වහන්සේලාට නිසි ගෞරවය ලබා දුන් බව ඔහු සඳහන් කළේය.
1942 වසරේදී බ්‍රිතාන්‍ය අධිරාජ්‍යවාදයට එරෙහිව ප්‍රකාශ නිකුත් කළ කීර්තිමත් සටන්කාමී භික්ෂුවක වූ උඩකැන්දවල සරණංකර හිමියන් අත්අඩංගුවට ගත් අවස්ථාවේදී, උන්වහන්සේ සිය සිවුර ඉවත් කිරීමට විරුද්ධ වූ අතර, බ්‍රිතාන්‍ය පාලකයින් එය පිළිගත් බව ඔහු උදාහරණයක් ලෙස පෙන්වා දුන්නේය.
නමුත් වත්මන් පාලනය බ්‍රිතාන්‍ය යුගයටත් වඩා එහාට යමින්, මෙරට භික්ෂු සම්ප්‍රදාය කෙලෙසමින් බෞද්ධ නීතිය යටපත් කිරීමට කටයුතු කරමින් සිටින බවට ඔහු චෝදනා කළේය. ගලගොඩඅත්තේ ඥානසාර හිමියන්ගේ සිවුර ඉවත් කිරීම සමස්ත මහා සංඝරත්නයේම සිවුර ඉවත් කිරීමක් ලෙස සැලකිය යුතු බව හෙතෙම අවධාරණය කළේය.
