රණවිරු සැමරුම මැයි 19 වෙනිදා… දෙමළ මුස්ලිම් රණවිරුවන්ට ප්රමුඛතාවක්….!
May 15, 2026 at 10:10 am | by emanisa.lk
මෙවර රණවිරු සැමරුම් උත්සවයේ සුවිශේෂීතා කිහිපයක් ඇති බව රණවිරු සේවා අධිකාරියේ සභාපති විශ්රාමික බ්රිගේඩියර් එස්.බී.කොහොන පවසයි.
රට වෙනුවෙන් දිවි පිදූ රණවිරුවන්ගේ පවුල්වල සාමාජිකයන්ට මෙවර සැමරුමේ උපරිම අවස්ථාව ලබාදීම ප්රමුඛ අරමුණක් බව කී රණවිරු සේවා අධිකාරියේ සභාපතිවරයා ඒ නිසා වෙනදාට වඩා රණවිරු පවුල්වල සාමාජිකයන්ගේ සහභාගීත්වය වැඩිකර තිබෙන බව සඳහන් කළේය.
මෙවර රණවිරු සැමරුමේ තවත් විශේෂත්වයක් ලෙස උතුරු නැගෙනහිර ප්රදේශවලින් යුද්ධයට එක්වී රටේ නිදහස වෙනුවෙන් සටන් කළ ද්රවිඩ සහ මුස්ලිම් රණවිරුවන්ගේ ඥාතීන්ටද රණවිරු සැමරුමට ආරාධනා කර තිබෙන බව සභාපතිවරයා පැවසීය.
ඒ අනුව උතුරු නැගෙනහිර රණවිරු පවුල් තිහක් පමණ මෙවර රණවිරු සමරුමට සහභාගී වීමට නියමිතව ඇතැයි රණවිරු සේවා අධිකාරියේ සභාපතිවරයා පැවසීය.
දාහත් වැනි ජාතික රණවිරු සැමරුම් උත්සවය ජනාධිපති අනුර කුමාර දිසානායක මහතාගේ ප්රධානත්වයෙන් බත්තරමුල්ල රණවිරු ස්මාරකය අභියසදී අඟහරුවාදා (19) පැවැත්වේ.
