ලංවීම බෝනස් දෙන්න ඕන සේවක කාර්යක්ෂමතාව මත… සේවයෙන් නිදහස් වෘත්තීය සමිතිකාරයන්ට බෝනස් දිය යුතු නෑ…! – කාංචන..
November 28, 2024 at 11:54 am | by emanisa.lk
විදුලි බල මණ්ඩලය ලාභ ලැබුව ද පාඩු ලැබුව ද සේවකයන්ට ප්‍රසාද දීමනා ගෙවීමේ ක්‍රමය තමා වෙනස් කළ හිටපු බලශක්ති අමාත්‍ය කාංචන විජේසේකර පවසයි.
හිටපු ඇමැතිවරයා පෙන්වා දෙන්නේ විදුලි බල මණ්ඩල සේවක කාර්යක්ෂමතාව සහ ඔවුන් දරන අවදානම මත ප්‍රසාද දීමනා ගෙවීමේ ක්‍රමයක් සකස් කොට තමන් කැබිනට් අනුමැතිය ද ලබා ගත් බවයි.
එහෙයින් රංජන් ජයලාල් ප්‍රකාශ කරන පරිදි සියලු ම සේවකයන්ට එකම ආකාරයට බෝනස් දිය නොහැකි බව ද ඔහු අවධාරණය කරයි.
හිටපු ඇමැතිවරයා ප්‍රකාශ කරන්නේ අවුරුද්දේ 365 දවසම වෘත්තීය සමිති කටයුතු සඳහා යැයි සේවයෙන් නිදහස්ව සිටින අයකුට ප්‍රසාද දීමනා දිය යුතු නැති බවයි.
එසේම ප්‍රසාද දීමනා ගෙවීමට පෙර සැප්තැම්බර් මස සිදුකළ යුතුව තිබූ විදුලි බිල සංශෝධනය කළ යුතු බවත් එසේ නොමැති නම් එම මුදල ද සමග සුවිශාල ලාභයක් පෙන්විය හැකි බවත් ඔහු සඳහන් කරයි.
පෞද්ගලික ගුවන්විදුලි නාලිකාවක් සමග සාකච්ඡාවකට එකතු වෙමින් කාංචන විජේසේකර මේ බව කීය.
