මධ්‍යම අධිවේගී මාර්ගයේ කඩවත සිට මිරිගම දක්වා කොටසේ ඉදිකිරීම් කටයුතු ඒකාබද්ධ අරමුදලෙන් මුදල් අනුමත වූ වහාම ආරම්භ කරන බව ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍යාංශයේ ලේකම් කේ.ඩී.එස්. රුවන් චන්දු මහතා පවසයි.

ජනාධිපති අනුර දිසානායක මහතාගේ ප්‍රධානත්වයෙන් ජනාධිපති කාර්යාලයේ පැවැති ප්‍රවාහන හා මහා මාර්ග අමාත්‍යාංශ ප්‍රගති සමාලෝචන රැස්වීමේදී එම තීරණය ගත් බව හෙතෙම සඳහන් කරයි.

රුවන් චන්ද්‍ර මහතා සඳහන් කළේ, එම අධිවේගී මාර්ගයේ ඉදිකිරීම් කටයුතු සඳහා ඒකාබද්ධ අරමුදලින් රුපියල් මිලියන 7500ක මුදලක් ඉල්ලා කැබිනට් පත්‍රිකාවක් ඉදිරිපත් කිරීමට නියමිත අතර අදාළ මුදල් අනුමත වූ වහාම එහි වැඩ ආරම්භ කරන ලෙස කොන්ත්‍රාත්කරුට දැනුම් දෙන බව අමාත්‍යාංශ ලේකම්වරයා ප්‍රකාශ කළේය.

මධ්‍යම අධිවේගී මාර්ගයේ කිලෝමීටර් 37ක් වන කඩවත සිට මිරිගම දක්වා කොටසේ වැඩ මේ වන විට 36% ක ප්‍රමාණයක් අවසන් කර ඇති අතර එම කොටස ඉදිවු පසුව කුරුණෑගල සිට මත්තලට සහ කටුනායකටත් අධිවේගී මාර්ගය ඔස්සේ ගමන් කළ හැකිය.