ලංකාවේ භයානකම ත්‍රස්ත කල්ලිය අදටත් සිටින්නේ අනුර කුමාර සමග යැයි කීමට තමන් බිය විය යුතු දැයි බොදු බල සේනා සංවිධානය මහ ලේකම් පූජ්‍ය ගලගොඩඅත්තේ ඥානසාර හිමි ප්‍රශ්න කරයි.

වර්තමාන ආණ්ඩුවේ බොහෝ දෙනා මුස්ලිම් අන්තවාදය පෝෂණය කිරීමට විශාල දායකත්වයක් දැරූ බවත් පැවසූ උන්වහන්සේ ලංකාවේ ක්‍රියාත්මක ඉස්ලාමීය අන්තවාදී කල්හි රැසක් වර්තමාන ආණ්ඩුවට සහාය ලබා දෙමින් සිටින බවද උන්වහන්සේ චෝදනා කරති.

බොදු බල සේනා සංවිධානයක් කිසිවෙකුගේ කොන්ත්‍රාත්තුවක් කළේ නම් ඒ බව ඔප්පු කරන්නැයි ආණ්ඩුවට අභියෝග කරන බවද එහිමියෝ කියා සිටියහ. බන්ධනාගාරගතව සිට ඇප මත නිදහස් වීමෙන් පසු මාධ්‍ය හමුවක් අමතමින් එහිමියන් මේ බව කියා සිටියහ.

පාස්කු ඉරිදා දිනයේ මෙරටට ප්‍රහාරයක් එල්ල වීමේ තර්ජනයක් ඇති බවට ඊට පෙර මැල්කම් රංජිත් කාදිනල් අගරදගුරුතුමන්ට දැනුම් දුන් නමුත් එය එම අනතුරු ඇඟවීම නොසලකා හැරි බවත් ඥානසාර හිමියෝ පැවසූහ.

පාස්කු ප්‍රහාරයට පෙර සිටම අගරදගුරුතුමන් හමුවී දීර්ඝ සාකච්ඡා පැවැත්වූ බවත් සිදුවිය හැකි තර්ජනයන් පිළිබඳව අනතුරු ඇඟවූ නමුත් එම අනතුරු ඇඟවීම නොතකා හැරි බවටද උන් වහන්සේ චෝදනා කළහ.

“ප්‍රහාරයට පෙර සිටම අපි කාදිනල්තුමා හමුවී ඔහු සමඟ දීර්ඝ සාකච්ඡා පැවැත්වූ අතර, සිදුවිය හැකි තර්ජනය පිළිබඳව ඔහුට අනතුරු ඇඟවූවා. කෙසේ වෙතත්, ඔහු අපගේ අනතුරු ඇඟවීම් නොසලකා හැරියා. බොදුබල සේනා සංවිධානයේ මහ ලේකම්වරයා ලෙස, ප්‍රහාරය පිළිබඳව අදාළ නිලධාරීන්ට දැනුම් දීමට අපට බලය තිබුණා, නමුත් රටේ ආරක්ෂක හමුදා පාලනය කිරීමට අපට බලයක් තිබුණේ නැහැ. බුද්ධි අංශවලට පවා ප්‍රවේශ විය නොහැකි රහස් තොරතුරු රාශියක් අපට ලැබුණා. මම 2014 සිට ප්‍රහාරය ගැන අනතුරු අඟවමින් සිටියා.

ඒ කාලයේ මම අදාළ රජයේ නායකයින්ට ලිපි 17ක් යැව්වා. රට තුළ තවත් අන්තවාදී කණ්ඩායම් කිහිපයක් මතුවීම පිළිබඳව ද මම කනස්සල්ල පළ කළා. ගෝඨාභය රාජපක්ෂ මහතාගේ රජය යටතේ පිහිටුවන ලද ‘එක රටක්-එක නීතියක්’ සඳහා වූ ජනාධිපති කාර්ය සාධක බලකාය හරහා අපි අඛණ්ඩ ආගමික අන්තවාදී කණ්ඩායම් පිළිබඳ පුළුල් තොරතුරු හෙළි කළා. අපි මේ සියලු තොරතුරු ස්වාධීනව, රජයේ කිසිදු උදව්වක් නොමැතිව රැස් කළා. අපි එය කළේ රටේ ජනවාර්ගික අඛණ්ඩතාව ආරක්ෂා කිරීමේ අවශ්‍යතා සඳහා. අවසානයේ අපි වාර්තාව භාර දුන්නා, නමුත් අවාසනාවකට, කිසිදු ක්‍රියාමාර්ගයක් ගත්තේ නැහැ.”