ඓතිහාසික දෙවිනුවර උත්පලවණ්ණා ශ්‍රී විෂ්ණු මහා දේවාලයේ 769 වන වාර්ෂික ඇසළ මහා පෙරහැර මංගල්‍යයට අදාළ කාවඩි නර්තන පෙරහැර ඉවත් කිරීමට පොලිස්පති ප්‍රියන්ත වීරසූරිය මහතා විසින් මාතර දිස්ත්‍රික් ලේකම්වරයාට නිර්දේශ කර ඇත.

2026 ජුලි 25 දින ලිපියක් යොමු කරමින් පොලිස්පතිවරයා සඳහන් කර ඇත්තේ ජාතික බුද්ධි ප්‍රධානී, රාජ්‍ය බුද්ධි සේවාව, පොලිස් විශේෂ කාර්යාංශය සහ දකුණු පළාත් ජ්‍යෙෂ්ඨ නියෝජ්‍ය පොලිස්පතිවරයා ලබා දී ඇති බුද්ධි තක්සේරු වාර්තා සැලකිල්ලට ගනිමින් මෙම තීරණයට එළඹි බවයි.

‍ඒ අනුව ක්‍රියාත්මක වූ මාතර දිස්ත්‍රික් ලේකම් චන්දන තිලකරත්න 2026 ජුලි 26 දින දෙවිනුවර බස්නායක නිලමේ ආරච්චිගේ තිළිණ මධුශංක වෙත ලිපියක් යොමු කරමින් පෙරහැරේ කාවාඩි නර්තන අංගය ඉවත් කිරිමට නියෝග කර ඇත.

බුද්ධි වාර්තාවලට අනුව මෙවර කාවඩි කණ්ඩායම් තෝරා ගත් ආකාරය පදනම් කරගෙන සංවිධානාත්මක අපරාධකරුවන් වන ‘දෙහි බාලේ මල්ලී’ සහ ‘උණාකුරුවේ ශාන්ත’ යන පාර්ශ්ව අතර දැඩි මතභේදකාරී තත්ත්වයක් හටගෙන ඇත.

2025 වසරේදී විනය විරෝධී ලෙස හැසිරුණු කාවඩි කණ්ඩායම් කිහිපයක් මෙවර ඉවත් කිරීමට පියවර ගැනීමත් සමඟ මෙම තත්ත්වය උග්‍ර වී තිබේ. විදේශගතව සිටින ‘කංජිපානි ඉම්රාන්’ නැමැති අපරාධකරු, තමන්ගේ පාර්ශ්වයේ කාවඩි කණ්ඩායම්වලට අවස්ථාව නොදුනහොත් පෙරහැර පැවැත්වෙන දින පුද්ගලයන් 10 දෙනෙකු ඝාතනය කරන බවටත්, බස්නායක නිලමේවරයා මරා දමන බවටත් වට්ස්ඇප් (WhatsApp) ඔස්සේ තර්ජනය කර ඇත. ඊට ප්‍රතිචාර වශයෙන් ‘දෙහි බාලේ මල්ලී’ නැමැත්තා ද තර්ජනාත්මක හඬපට නිකුත් කර ඇති අතර, මෙම තර්ජනාත්මක හඬපට ප්‍රධාන මාධ්‍ය සහ සමාජ මාධ්‍ය ඔස්සේ ද ප්‍රචාරය විය.

මෙවර කාවඩි පෙරහැර නැරඹීමට 40,000කට අධික පිරිසක් පැමිණෙනු ඇතැයි අපේක්ෂා කරන අතර මෙම නර්තන අංගය සඳහා සංවිධානාත්මක අපරාධකරුවන්ගේ අනුගාමිකයන් සහභාගී වීමට ඉඩකඩ පවතී. එහිදී පිරිස් අතර ගැටුමක් ඇති වුවහොත් හෝ ඩ්‍රෝන (Drones) තාක්ෂණය භාවිත කරමින් කිසියම් ප්‍රහාරයක් එල්ල වුවහොත් විශාල ජීවිත හානියක් සහ මහජන කැළඹීමක් ඇති විය හැකි බවට බුද්ධි අංශ අනතුරු අඟවා ඇත.

එසේම, දෙවිනුවර ඇසළ පෙරහැර දෙස් විදෙස් සංචාරකයන්ගේ දැඩි ආකර්ෂණයට ලක්වන උත්සවයක් බැවින්, පාතාල ක්‍රියාකාරකම් හේතුවෙන් යම් අනපේක්ෂිත සිදුවීමක් සිදු වුවහොත් එය ජාත්‍යන්තර වශයෙන් රටට මහත් අපකීර්තියක් මෙන්ම සංචාරක ව්‍යාපාරයට ද දැඩි බලපෑමක් එල්ල කරනු ඇත.

වසර 769 ක දීර්ඝ ඉතිහාසයක් ඇති දෙවිනුවර පෙරහැරට කාවඩි නර්තනය ඇතුළත් වී ඇත්තේ මීට වසර 40 කට පමණ පෙර සිට වන අතර, එය පෙරහැරේ මූලික සංස්කෘතික අංගයක් නොවන බව ද පොලිසිය පෙන්වා දෙයි. මෑත කාලයේ කාවඩි නර්තනයේ යෙදෙන පිරිස්වලින් 80% ක් පමණ මත්පැන් සහ මත්ද්‍රව්‍ය භාවිත කර අශෝභන ලෙස හැසිරීම නිසා මහජනතාවගේ දැඩි අප්‍රසාදයක් ද ගොඩනැඟී ඇත.