කොළඹ නගරයේ කැලි කසළ ගැටලුවක් පවතින නමුත් එය නගර සභාවට තනිවම විසඳිය නොහැකි බව කොළඹ මහ නගර සභාවේ නගරාධිපතිනි ව්‍රායි කැලී බල්තසාර් ප්‍රකාශ කරයි.

නගරය පිරිසිදුව තබා ගැනීමට ජනතාවගේ සහයෝගය සහ එකමුතුභාවය අවශ්‍ය බවද ඇය පෙන්වා දෙයි.

කසළ එකතු කිරීම නගර සභාව විසින් ඉටුකරන සේවාවක් වුවද, රජයේ සහ අනෙකුත් ආයතන සතු හිස් ඉඩම් පිරිසිදුව පවත්වා ගැනීමද ඉතා වැදගත්ය. එවැනි ඉඩම් බොහෝ විට අනවසර කසළ බැහැර කිරීමේ ස්ථාන බවට පත්වන බැවින්, ඒවා නඩත්තු කිරීම සියලු දෙනාගේ වගකීමකි.

එමෙන්ම, ජනවාරි මාසයේ අවසානයේ සිට අප කසළ භාරදෙන Waste-to-Energy බලාගාරය වරින් වර අර්ධ වශයෙන් හෝ සම්පූර්ණයෙන් වසා දැමීම නිසා කසළ එකතු කිරීමේ සහ බැහැර කිරීමේ කටයුතුවලට බාධා එල්ල වී තිබේ.

එසේ වුවද, අපගේ කණ්ඩායම් නගරය පිරිසිදුව තබා ගැනීමට හැකි උපරිමයෙන් කටයුතු කරමින් සිටී.
තවත් ප්‍රධාන ගැටලුවක් වන්නේ කසළ නිසි ලෙස වෙන් නොකිරීමයි. අපට භාරගත හැක්කේ නිසි ලෙස වෙන් කළ කසළ පමණක් වන අතර, බොහෝ අවස්ථාවල අප වෙත ලැබෙන්නේ මිශ්‍ර කසළයි. එබැවින් නිවෙස් මට්ටමින් කසළ නිසි ලෙස වෙන් කිරීම අප සැමගේ වගකීමකි.

මෙම සාකච්ඡාවේදී සියලු ආයතන එක්ව අනවසර කසළ බැහැර කිරීම වැළැක්වීම, පොදු ඉඩම් පිරිසිදුව පවත්වා ගැනීම සහ නගරය වඩාත් පිරිසිදු හා සෞඛ්‍ය සම්පන්න තැනක් බවට පත් කිරීම සඳහා ක්‍රියාකාරී ඉලක්කවලට එකඟ විය. පිරිසිදු කොළඹක් ගොඩනඟන්න අප සැමගේ සහයෝගය අවශ්‍යයි.

FB