ආගමික සංස්කෘතික උරුමයන් ආරක්ෂා කිරීමට කැපවී සිටිනවා…! – අගමැතිනිය…
May 22, 2025 at 1:02 pm | by emanisa.lk
ආගමික හා සංස්කෘතික උරුමයන් ආරක්ෂා කිරීමට රජය කැපවී සිටින බව අග්රාමාත්ය ආචාර්ය හරිනි අමරසූරිය පවසයි.
පුජ්ය කුරුපිට ධම්මානන්ද හිමියන්ගේ සංකල්පයක් අනුව පාදුක්ක බුද්ධ ශ්රාවක සත්කාරක මධ්යස්ථානය සංවිධානය කළ විශ්වවිද්යාල භික්ෂූන් වහන්සේලා 60 නමක් සඳහා ඉලෙක්ට්රොනික ත්රිපිටක පිටපත සහිත ටැබ් පරිගණක සහ විහාරස්ථාන වෙත ත්රිපිටක ග්රන්ථ පරිත්යාග කිරීම වෙනුවෙන් ඊයේ (21) අරලියගහ මන්දිරයේ පැවති උත්සවයකට එක්වෙමින් අග්රාමාත්යවරිය මේ බව ප්රකාශ කළාය.
“ධර්මයේ පැවැත්ම වෙනුවෙන් මෙවැනි වැඩසටහන් සිදුකිරීම ඉතාමත් කාලෝචිතයි. වර්තමානයේ සිදුවන වේගවත් තාක්ෂණික දියුණුව, අධ්යාත්මික සම්ප්රදායන් ආරක්ෂා කිරීමට අභියෝගයක්. නමුත් මෙම වැඩසටහනෙන් පැහැදිලි වෙනවා තාක්ෂණය සහ නවෝත්පාදන, බෞද්ධ දර්ශනය ඉගැන්වීම්ට, සුරැකීමට සහ ප්රචාරය කිරීමට කොතරම් අර්ථවත් ලෙස යොදාගත හැකිද කියලා.
ත්රිපිටකය හුදෙක් ධර්ම ග්රන්ථ එකතුවක් පමණක් නොවෙයි. එය බෞද්ධ ශිෂ්ටාචාරයේ සදාචාරාත්මක, දාර්ශනික හා අධ්යාත්මික පදනමයි. මෙම පූජනීය ධර්ම ග්රන්ථවලට තරුණ සංඝයා වහන්සේලාට වඩාත් ඉක්මනින් ප්රවේශ වීමට හැකිවීම තුළින් සංඝ පරම්පරාව අතර සබැඳියාව ශක්තිමත් වෙනවා. ඒ වගේම වර්තමාන ලෝකය තුළ ධර්මය හැදෑරීමට, ප්රගුණ කිරීමට සහ ජීවිතයට බුද්ධ ධර්මය ළගා කර ගැනීමට අවස්ථාව සැලසෙනවා.
මෙවැනි ව්යාපෘතිවලට සහය දැක්වීමට වගේම ආගමික හා සංස්කෘතික උරුමයන් ආරක්ෂා කිරීමට රජය කැපවී සිටිනවා. බුද්ධ ශ්රාවක සත්කාරක මධ්යස්ථානය වැනි ආයතන පෝෂණය කිරීම අපේ සමාජයේ සදාචාරාත්මක හා අධ්යාත්මික යහපැවැත්මට අත්යවශ්ය දෙයක් ලෙසයි රජය සලකන්නේ.”
