විවිධ අපරාධ සහ නීති විරෝධී ක්‍රියා සම්බන්ධයෙන් සැකපිට අත්අඩංගුවට ගෙන පොලිස් භාරයේ රඳවා සිටින පුද්ගලයන්ට කිසියම් හෝ පහරදීමක් හෝ ශාරීරික වධහිංසාවක් සිදුවුවහොත් එහි සෘජු වගකීම අදාළ පොලිස් ස්ථානාධිපතිවරයා හෝ මූලස්ථාන පොලිස් පරීක්ෂකවරයා විසින් භාරගත යුතු බවට නියෝග නිකුත් කර ඇත.

මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල මහතා ලබාදුන් විශේෂ උපදෙස් මාලාවකට අනුව දිවයින පුරා පිහිටි පොලිස් ස්ථාන වෙත මෙම දැඩි පණිවිඩය නිකුත් කර තිබේ.

මේ පිළිබඳව කළ විමසීමකදී අදහස් දක්වා ඇති අමාත්‍ය ආනන්ද විජේපාල සඳහන් කර ඇත්තේ, අත්අඩංගුවට ගන්නා සැකකරුවන් සම්බන්ධයෙන් ක්‍රියාකිරීමේදී පිළිපැදිය යුතු නිසි නීතිමය ක්‍රියාපටිපාටිය යළි තරයේ සිහිපත් කරමින්, දිවයිනේ සියලුම පොලිස් ස්ථානාධිපතිවරුන් සහ මූලස්ථාන ප්‍රධාන පොලිස් පරීක්ෂකවරුන් ‘සූම්’ තාක්ෂණය ඔස්සේ උපදෙස් ලබාදීමට පියවර ගන්නා බවයි.

පොලිස් අත්අඩංගුවේ පසුවන කිසිදු පුරවැසියෙකුට පහරදීම් හෝ වෙනත් අමානුෂික හිරිහැර සිදුකිරීම රජය කිසිසේත්ම අනුමත නොකරන බව අවධාරණය කළ අමාත්‍යවරයා, එවැනි නීතිවිරෝධී ක්‍රියාවන්හි නිරත වන නිලධාරීන්ට එරෙහිව තරාතිරම නොබලා දැඩිව නීතිය ක්‍රියාත්මක කරන බවද අවධාරණය කළේය.

මෑතකදී හෝමාගම පොලිස් ස්ථානයේ අත්අඩංගුවේ පසුවූ තරුණයෙකු අවාසනාවන්ත ලෙස මියයාමේ සිදුවීම සම්බන්ධයෙන් අදහස් දැක්වූ අමාත්‍යවරයා, ඊට අදාළව චෝදනා එල්ල වී ඇති පොලිස් නිලධාරීන්ට එරෙහිව කඩිනමින් අවශ්‍ය විනය හා නීතිමය පියවර ගෙන ඇති බව පෙන්වා දුන්නේය. එම පොලිස් ස්ථානය තුළදී අදාළ තරුණයාට යම් පහරදීමක් සිදුව ඇති බවට මූලික තොරතුරු ලැබී ඇති බවත්, ඒ පිළිබඳ අධිකරණ වෛද්‍ය වාර්තා සහ අනෙකුත් සාක්ෂි පදනම් කරගනිමින් අධිකරණය හමුවේ ඉදිරි නීතිමය කටයුතු සිදුකරන බවත් හෙතෙම ප්‍රකාශ කළේය.