සභාපතිකම ගත්තේ ජනාධිපතිතුමාගේ ආරාධනාවටයි… ක්රිකට් අභිමානය නැංවීම එකම අරමුණයි…! – එරාන් වික්රමරත්න….
April 30, 2026 at 11:53 am | by emanisa.lk
ශ්රී ලංකා ක්රිකට් ක්රීඩාවේ පරිවර්තනීය වෙනසක් ඇති කිරීම සඳහා පත්කළ ශ්රී ලංකා ක්රිකට් ප්රතිසංස්කරණ කමිටුවේ සභාපතිත්වය තමන් භාරගත් බව හිටපු පාර්ලිමේන්තු මන්ත්රී එරාන් වික්රමරත්න නිවේදනය කරයි.
ජනාධිපති අනුර කුමාර දිසානායක මහතා සහ ක්රීඩා අමාත්ය සුනිල් කුමාර ගමගේ මහතා කළ ආරාධනයකට අනුව තමන් මෙම ධුරය භාරගත් බවත්, ඒ සම්බන්ධයෙන් හිටපු ක්රිකට් ක්රීඩකයන් සහ නායකයන් සමඟ දීර්ඝ වශයෙන් සාකච්ඡා කළ බවත් ඒ මහතා පවසයි.
ඒ අනුව ඊයේ (29) සිට ක්රියාත්මක වන පරිදි එම වගකීම භාරගත් බව විශේෂ ප්රකාශයක් නිකුත් කරමින් ඔහු සඳහන් කළේය.
ශ්රී ලාංකීය ක්රිකට් ක්රීඩාවේ අභිමානය සහ කුසලතාව යළි ස්ථාපිත කිරීම මෙම කමිටුවේ එකම සහ අවංක අරමුණ බව වික්රමරත්න මහතා මෙහිදී අවධාරණය කළේය.
ක්රිකට් ක්රීඩාවේ විශිෂ්ටයන්, ආයතනික කළමනාකරණ විශේෂඥයන් සහ නීති ක්ෂේත්රයේ ප්රවීණයන්ගෙන් සැදුම්ලත් නව දෙනෙකුගෙන් යුත් මෙම කමිටුව මෙහෙයවීමට ලැබීම ගෞරවයක් බව වික්රමරත්න මහතා පවසයි.
ජාත්යන්තර ක්රිකට් කවුන්සිලයේ (ICC) නීතිරීතිවලට අනුකූලව නව ව්යවස්ථාවක් හඳුන්වා දීම, විනිවිදභාවය තහවුරු කිරීම සහ දූෂණ විරෝධී ක්රමවේද හරහා මහජන විශ්වාසය යළි ගොඩනැගීම, ජාත්යන්තර මට්ටමේ පහසුකම් සහ දිරිගැන්වීමේ ක්රමවේද හරහා ජාතික කණ්ඩායම් ශක්තිමත් කර, ශ්රී ලංකාව ජාත්යන්තර ශ්රේණිගත කිරීම්වල ඉහළට ඔසවා තැබීම කමිටුවේ මූලික අවධානය යොමු වන ප්රධාන කරුණු බව සභාපතිවරයා පෙන්වා දෙයි.
පාසල් සහ සමාජ මට්ටමේ සිටම ක්රිකට් ක්රීඩාව සමඟ සමීපව කටයුතු කළ අයෙකු ලෙස, මෙය ගෞරවනීය මෙන්ම බැරෑරුම් වගකීමක් ලෙස සලකන බවත්, ක්රීඩා ලෝලීන්ගේ සහයෝගය සහ නිර්මාණාත්මක විවේචන මධ්යයේ තිරසාර ප්රතිඵල අත්කර දීමට කැපවන බවත් එරාන් වික්රමරත්න මහතා වැඩිදුරටත් කියා සිටියේය.
