වත්මන් ආණ්ඩුව මෙරටට බලපෑ දරුණු සුළි කුණාටු තත්ත්වය පිළිබඳ දරුණු අනතුරු ඇඟවීම් නොතකා හරිමින් ආපදාව සිදුවීමට ඉඩ දුන් බවට හිටපු පාර්ලිමේන්තු මන්ත්‍රී නිමල් පියතිස්ස චෝදනා කරයි.

මහජන නියෝජිතයෙකු ලෙස නුවරඑළිය දිස්ත්‍රික්කයේ වසර 20කට අධික අත්දැකීම් ඇති තමන් මේ තත්ත්වය අත්දකින බව ද හෙතෙම අවධාරණය කරයි.

පසුගිය දින කිහිපය තුළ ඇද හැළුණු ධාරාණිපාත වර්ෂාපතනය හේතුවෙන් ජලාශ පිටාර ගැලීම සහ නාය යෑම්වලින් මුළු රටම පීඩාවට පත් වූ බවත්, විශේෂයෙන්ම කඳුකර ප්‍රදේශ ඉතා බරපතළ ඛේදවාචකයකට මුහුණ දුන් බවත් ඔහු පෙන්වා දුන්නේය. මේ ආපදාවෙන් මානව සම්පත මෙන්ම දේපළ විශාල වශයෙන් අහිමි වීම හේතුවෙන් ජන ජීවිතය සම්පූර්ණයෙන්ම ඉතා බරපතළ ලෙස අස්ථාවර වී අරාජික වූ බවද ඔහු සඳහන් කළේය.

ඕනෑම ආණ්ඩුවක් මෙවැනි අනතුරු ඇඟවීම් කරන විට ඊට මුහුණ දීම සඳහා වැඩපිළිවෙළක් සකස් කරන බව පියතිස්ස මහතා සිහිපත් කළේය. කාලගුණ දෙපාර්තමේන්තුව විශේෂ අනාවැකි නිකුත් කළ බවත්, ජාත්‍යන්තර කාලගුණ දෙපාර්තමේන්තු, BBC රූපවාහිනිය, ඉන්දියානු කාලගුණ දෙපාර්තමේන්තු වැනි විවිධ මාධ්‍ය ආයතන මඟින් වේලාසනින් මේ පිළිබඳව අනතුරු ඇඟවීම් කළ බවත් ඔහු පැහැදිලි කළේය.

කොත්මලේ ජාලාශය භාරව සිටි ජ්‍යෙෂ්ඨ ඉංජිනේරුවන් තුන්දෙනෙකු ඉවත් කර ජනතා විමුක්ති පෙරමුණට හිතවත් ආධුනික ඉංජිනේරුන් ඊට පත් කර තිබූ බවට තොරතුරු ඇතැයිද ‍හෙතෙස එහිදී සඳහන් කළේය. පූර්ව කාලගුණ අනතුරු ඇඟවීම් කර තිබුණ ද ජලය ඉහළම මට්ටමට එන තෙක් බලා සිටියා මිස ක්‍රමානුකූලව ජලාශයේ ජලය අඩු කිරීමේ ක්‍රියාවලියකට ඔවුන් යොමු නොවූ බවට ද හෙතෙම චෝදනා කළේය.

මෙහිදී 2005 අංක 13 දරන ආපදා කළමනාකරණ පනත ශක්තිමත් පනතක් බවත්, එවැනි තත්ත්වයක් වාර්තා වූ විට ආපදා තත්ත්වය ප්‍රකාශයට පත් කිරීමේ බලය ජනාධිපතිවරයාට පැවරී ඇති බවත් ඔහු අවධාරණය කළේය.

මෑත ඉතිහාසයේ අත්දැකීම් උපුටා දක්වමින් නිමල් පියතිස්ස කියා සිටියේ, ගෝඨාභය රාජපක්ෂ ජනාධිපතිවරයාගේ ආණ්ඩුව පැවති සමයේදී මෙවැනි වාර්තා කිරීමක් ලැබුණු විට ආණ්ඩුව ක්ෂණිකව ආපදා කළමනාකරණ කමිටුව කැඳවා අදාළ සැලැස්ම සකස් කළ බවයි.

එවකට වාරිමාර්ග ඇමති චමල් රාජපක්ෂ එම සැලැස්ම සකස් කර, සුළි කුණාටුව පැමිණීමට පෙර පාර්ලිමේන්තුවේදී ප්‍රකාශයක් කරමින්, පැහැදිලි කළ බවද ඔහු සිහිපත් කළේය. එම සැලැස්ම යටතේ ජලාශවල ජල ධාරිතාව අඩු කිරීම සහ අවතැන් වන අය පිළිබඳව වැඩපිළිවෙළ සකස් කර තිබුණි.

නමුත්, වත්මන් ආණ්ඩුව මෙවැනි අත්දැකීම් තිබියදීත්, මිලිමීටර් 400ක හෝ 500ක වැනි වැසි ධාරිතාවක් සහිත දරුණු සුළි කුණාටුවක් එන බවට අනතුර අඟවා තිබියදීත්, ඒ බව දැන දැනම, ඒ පිළිබඳව කිසිවක් නොතකා, මේ ආපදාව වීමට ඉඩහැරියා. ආපදා කළමනාකරණ පනත යටතේ සැලැස්ම සකස් කිරීමේ පූර්ණ බලතල කමිටුවට හිමිවන අතර, 2030 දක්වාම එම පනතේ බලය ප්‍රකාරව වැඩ කිරීමට හැකියාව තිබෙන බවද මන්ත්‍රීවරයා ප්‍රකාශ කළේය.