පසුගියදා නිකුත් කරන ලද හදිසි නීති රෙගුලාසිවල ඇතැම් විධිවිධාන ආණ්ඩුක්‍රම ව්‍යවස්ථාවට අනුකූල නොවන බවට නිරීක්ෂණය කර ඇති බව ශ්‍රී ලංකා මානව හිමිකම් කොමිසම පවසයි.

කොමිසමේ කොමසාරිස් නීතිඥ නිමල් ජී. පුංචිහේවා ප්‍රකාශ කළේ, ලබන සතියේ දී මේ පිළිබඳව ජනාධිපති අනුර කුමාර දිසානායක මහතා වෙත දැනුම් දෙන බවයි.

නීතිඥ පුංචිහේවා අවධාරණය කළේ, රෙගුලාසිවල ඇතැම් වගන්ති ගැටළු සහගත බව පෙනෙන අතර හදිසි නීති බලතල ආණ්ඩුක්‍රම ව්‍යවස්ථාවේ සීමාවන් තුළ ක්‍රියාත්මක කළ යුතු බවයි.

ඔහු වැඩිදුරටත් පැවසුවේ, දැනට ක්‍රියාත්මක වන රෙගුලාසිවල ඇතැම් කොටස් ස්වාභාවික විපතකට අදාළ හදිසි අවස්ථාවකදී නොව සන්නද්ධ ගැටුම් කාලවලදී භාවිත කරන පියවරවලට සමාන බවයි.

මහජන ආරක්ෂක ආඥා පනත (1959 අංක 8 දරන පනතින් සංශෝධිත) මගින් හදිසි අවස්ථා පැනවීමට ඉඩ සලසන නමුත්, ඒවා ඒ ඒ තත්ත්වයට ගැළපෙන පරිදි සකස් කළ යුතු බව නිමල් පුංචිහේවා පෙන්වා දුන්නේය.