වාණිජමය කටයුතු සඳහා ආරක්ෂක විධිවිධාන සැපයීම වෙනුවෙන් ගාස්තු අය කිරීම පොලිස් දෙපාර්තමේන්තුව විසින් ආරම්භ කර ඇත.

පොලිස් දෙපාර්තමේන්තුවට දැරීමට සිදුවන පිරිවැය සැලකිල්ලට ගනිමින්, එම මුදල් වාණිජමය කටයුතු සඳහා යොදවන නිලධාරීන්ගේ අතිකාල සහ දීමනා ගෙවීම් සඳහා යොදා ගන්නා බව පොලිස් මාධ්‍ය ප්‍රකාශක මිනුර සේනාරත් මහතා ‘සන්ඩේ ටයිම්ස්’ පුවත්පතට පවසා ඇත.

මීට පෙර දෙපාර්තමේන්තුව විසින් චක්‍රලේඛයක් නිකුත් කර තිබූ බවත්, වර්තමාන පොලිස්පතිවරයා විසින්ම එම නියෝගයට අනුකූලව ගාස්තු අය කිරීමට උපදෙස් ලබා දී ඇති බවත් ඔහු සඳහන් කළේය.

කෙසේ වෙතත්, මහ ජනතාවට නොමිලේ ප්‍රවේශ විය හැකි කටයුතු සඳහා පොලිස් ආරක්ෂාව දිගටම නොමිලේ ලබා දෙන බවද ඔහු අවධාරණය කළේය.

මෙම නව තීරණය යටතේ ගාස්තු අය කිරීමට මුලින්ම පියවර ගෙන ඇත්තේ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාව (BMICH) වෙතින් වන අතර, ඔවුන්ගෙන් මාසික ගෙවීමක් ඉල්ලා ඇත.

රාජ්‍ය හා පෞද්ගලික සිදුවීම් සඳහා ස්ථානයක් වන BMICH වෙත, දිනපතා සේවයේ නියුතු පොලිස් නිලධාරීන් 262ක් වෙනුවෙන් මාසිකව රුපියල් මිලියන 3.2ක මුදලක් ගෙවන ලෙස දැනුම් දී තිබේ.

VVIP, විදේශීය රාජ්‍ය තාන්ත්‍රිකයන් සහ අනෙකුත් ප්‍රභූන් සහභාගී වන රාජ්‍ය හා පෞද්ගලික උත්සව කටයුතු සඳහා ආරක්ෂාව සැපයීම පිණිස 2003 වසරේදී මෙම ස්ථානයේ ස්ථිර පොලිස් ස්ථානයක් පිහිටුවා ඇත.

මේ අතර, මෑතකදී අවසන් වූ පොත් ප්‍රදර්ශනය සඳහා පොලිසිය විසින් සපයන ලද ආරක්ෂක සේවා හදිසියේ ඉවත් කරගෙන ඇත්තේ, BMICH කළමනාකාරිත්වය හෝ සිදුවීම් සංවිධායකයන් විසින් අදාළ ගාස්තු ගෙවා නොමැති හෙයිනි. එහි ප්‍රතිඵලයක් ලෙස, මිලියන 1.5ක පමණ පිරිසක් සහභාගී වූ සහ VVIPවරුන් පවා පැමිණි එම පොත් ප්‍රදර්ශනයේ ප්‍රධාන කොටස පොලිස් ආරක්ෂාවකින් තොරව පැවැත්විණි.

මෙම ගැටලුව BMICH කළමනාකාරීත්ව මට්ටමින් සාකච්ඡා කිරීමට අපේක්ෂා කරන බවට ‘සන්ඩේ ටයිම්ස්’ පුවත්පත වාර්තා කරයි.