ප්‍රමාද වූ මධ්‍යම අධිවේගී මාර්ග ව්‍යාපෘතියේ පළමු අදියර, එනම් කඩවත සිට මීරිගම දක්වා වූ කොටස, ලබන බදාදා (17) ජනාධිපති අනුර කුමාර දිසානායක මහතාගේ ප්‍රධානත්වයෙන් නැවත ආරම්භ කිරීමට නියමිත බව රජයේ ප්‍රවෘත්ති දෙපාර්තමේන්තුව නිවේදනය කරයි.

කෙසේ වෙතත්, මෙම ව්‍යාපෘතිය සඳහා රජයට දැරීමට සිදුවන 15% ක කොටස වන අමෙරිකානු ඩොලර් මිලියන 500ක මුදල සපයාගන්නා ආකාරය පිළිබඳව පවතින අවිනිශ්චිතතාව මතභේදයට තුඩු දී ඇතැයි Sunday morning වාර්තා කරයි

මාර්ග සංවර්ධන අධිකාරිය සහ භාණ්ඩාගාරය ප්‍රකාශ කළේ මේ මුදල් සපයාගන්නා ආකාරය ගැන නිශ්චිත අදහසක් නොමැති බවයි. ආරංචි මාර්ගවලට අනුව, මේ මුදල නව ණය මගින් සපයා ගැනීමට සති කිහිපයකට පෙර සාකච්ඡා වී ඇති බව සඳහන් වුවත්, මේ වන විටත් අරමුදල් සපයා ගැනීමේ ප්‍රභවය පිළිබඳව පැහැදිළි බවක් නැත.

මාර්ග සංවර්ධන අධිකාරිය තහවුරු කළේ, චීනයේ Exim බැංකුව සමඟ නැවත සාකච්ඡා කිරීමෙන් පසුව ඩොලර් මිලියන 500ක ණයක් ලබා දීමට එකඟ වී ඇති බවයි. නමුත් ව්‍යාපෘතියේ සම්පූර්ණ පිරිවැය සඳහා රජයෙන් ද ඩොලර් මිලියන 500ක් ලබා දිය යුතුය.

මුල් 2019 ගිවිසුම යටතේ ලබා දීමට නියමිතව තිබූ ණය මුදල ඩොලර් මිලියන 989ක් වූ නමුත්, 2022 දී ශ්‍රී ලංකාවේ ණය පැහැර හැරීම හේතුවෙන් ඉදිකිරීම් කටයුතු නතර විය. ඒ වන විට මුදල් මුදා හැර තිබුණේ ඩොලර් මිලියන 51.5ක් පමණි. දීර්ඝ සාකච්ඡාවලින් පසු එක්සීම් බැංකුව යළි ණය දීමට එකඟ වුවද, පෙර එකඟ වූ ඩොලර් මිලියන 938ක ශේෂ මුදල වෙනුවට ඩොලර් මිලියන 500ක් පමණක් ලබා දෙන අතර එය ද චීන යුආන්වලින් (RMB) ලබා දෙනු ඇත. මේ නිසා රජයට ඩොලර් මිලියන 438ක හිඟයක් පියවීමට සිදුව තිබේ.

අවස්ථා කිහිපයකදීම කඩවත-මීරිගම කොටසේ ඇස්තමේන්තුගත පිරිවැය ඉහළ ගොස් ඇත. එය 2020 වන විට රුපියල් බිලියන 158 සිට රුපියල් බිලියන 194 දක්වා ඉහළ ගියේ ණය ප්‍රමාදයන් හේතුවෙනි.

දේශීය ඉදිකිරීම් සමාගම් පවසන්නේ, ව්‍යාපෘතිය භාරව සිටින මෙටලර්ජිකල් කෝපරේෂන් ඔෆ් චයිනා ලිමිටඩ් සමඟ ඇති කොන්ත්‍රාත්තුව අවලංගු කර, විවෘත ටෙන්ඩර් කැඳවන්නේ නම් පිරිවැය අඩු කර ගත හැකි බවයි. කෙසේ වෙතත්, එම යෝජනාව නොසලකා හැර තිබේ.

ජාතික විගණන කාර්යාලය සිය නවතම වාර්තාවෙන් මෙම ව්‍යාපෘතිය පිළිබඳව ගැටළු මතු කර තිබේ. පළමු සහ දෙවන පැකේජ සඳහා ලබා දුන් කොන්ත්‍රාත්තු, ඉංජිනේරුවරු ඇස්තමේන්තුගත පිරිවැයට වඩා පිළිවෙලින් 28%ක් සහ 23%ක් වැඩි වී තිබේ. මෙම කොන්ත්‍රාත්තු රජයේ ප්‍රසම්පාදන මාර්ගෝපදේශවලට පටහැනිව තරඟකාරී ලංසු තැබීමකින් තොරව ලබා දී ඇති බවද විගණන වාර්තාව පෙන්වා දෙයි.

මුදල් අවප්‍රමාණය වීම සහ මිල ඉහළ යෑම හේතුවෙන් මුල් පිරිවැය ඇස්තමේන්තුව වන රුපියල් බිලියන 158.39, 2026 සැප්තැම්බර් වන විට රුපියල් බිලියන 450.35 දක්වා ඉහළ යනු ඇතැයි ගණන් බලා ඇත. කෙසේ වෙතත්, 2024 මාර්තු 31 වන විට මෙම සංශෝධිත ඇස්තමේන්තුවට කැබිනට් අනුමැතිය ලබාගෙන නොතිබූ බව ද විගණන වාර්තාවේ සඳහන් වේ.

අරමුදල් සැපයීමේ ප්‍රමාදයන් හේතුවෙන්, 2023 අවසානය වන විට එක්සීම් බැංකුව විසින් මුදා හැර ඇත්තේ මුළු ණය මුදලින් 5%ක් පමණි. මේ හේතුවෙන් 2022 දෙසැම්බර් 31 වන විට රජයට අමෙරිකානු ඩොලර් මිලියන 3.1ක කැපවීම් ගාස්තු ගෙවීමට සිදු විය.