ශ්‍රී ලංකාවේ දශක ගණනාවක් පුරා ප්‍රමුඛ පෙළේ කාන්තා යට ඇඳුම් සන්නාමයක් වූ Triumph නිෂ්පාදනවල ශ්‍රී ලංකාවේ බෙදාහැරීම අත්හිටුවා ඇති බව වාර්තා වේ.

මෙය ඉන්දියාවේ පිහිටි Triumph International India සමාගම විසින් ගනු ලැබූ ප්‍රතිපත්තිමය තීරණයක් බවට තොරතුරු අනාවරණය වී ඇත.

දැනට වෙළෙඳපොළෙහි පවතින Triumph නිෂ්පාදන, මීට වසර කිහිපයකට පෙර ආනයනය කරන ලද තොග බව තහවුරු වී තිබේ.

එසේම, ශ්‍රී ලංකාවේ මෙම සන්නාමය නියෝජනය කළ සමාගම දැනට ක්‍රියාත්මක නොවන අතර, එහි හිටපු සේවකයෙකු සඳහන් කළේ ඉන්දියානු මව් සමාගමේ තීරණයකට අනුව මාස හයකට පමණ පෙර ශ්‍රී ලංකාවේ ව්‍යාපාර කටයුතු සම්පූර්ණයෙන්ම අත්හිටුවූ බවයි. මෙම තීරණය හේතුවෙන් සේවය අහිමි වූ සේවකයන්ට වන්දි ගෙවීමක්ද සිදු කර ඇත.

තවද, Triumph සමාගම සමඟ ව්‍යාපාර කටයුතු කළ බොහෝ අලෙවි නියෝජිතවරුන් මේ වන විට වෙනත් කාන්තා යට ඇඳුම් සන්නාම සමඟ කටයුතු ආරම්භ කර ඇති බව ද වාර්තා වේ.

මීට අමතරව, පසුගිය පෙබරවාරි මාසයේදී බත්තරමුල්ල සෙත්සිරිපාය පරිශ්‍රයේදී පැවති Triumph තොග අවසන් කිරීමේ අලෙවියකදී ගැටලුකාරී තත්ත්වයන් මතු වූ බවට මාධ්‍ය වාර්තා පල විය.