මුලතිව්, කුරුන්දි විහාර භූමිය ගැන තීරණයක් ගැනීමේදී බෙදුම්වාදීන්ගේ හඬට පමණක් කන් නොදී පුළුල් විමර්ශනයක් කර සාධාරණ තීන්දුවක් ගන්නැයි ජනාධිපතිවරයාගෙන් ඉල්ලා සිටින බව උතුරු පළාත් ප්‍රධාන සංඝනායක කුරුන්දි විහාරාධිපති ගල්ගමුවේ සන්තබෝධි හිමියෝ පවසති.

ගල්ගමුවේ සන්තබෝධි උතුරු පළාත් ප්‍රධාන සංඝනායක හිමියෝ එහිදී මෙසේ ද පවසති.

“මුලතිව් කුරුන්දි විහාරයට අයත් පුරා වස්තු භූමිය මුලින් ම මැනීම ආරම්භ වෙන්නේ 1933 මැයි 18 වන දා අතිවිශේෂ ගැසට් නිවේදනයක් මගින්. ඒ කියන්නේ සුදු ජාතික පාලකයන් යටතේ. එහිදී අක්කර 78ක් ගැසට් වෙනවා. පසුකාලීන ගවේෂණවලින් පැහැදිලි වන්නේ මීටත් වඩා විශාල භූමියක මෙහි නටබුන් විසිරිලා තියෙනවා. ඒ නිසා අලුතින් අක්කර 229ක් ගැසට් කරන්න නියම කරනවා. කුරුන්දි විහාරය ලෙස හඳුනාගන්නේ සක්‍රිය පන්සලක් නෙවෙයි.

මේ නටබුන් සියල්ල තියෙන භූමි ප්‍රමාණයයි. එතකොට මෙතැන නව විහාරස්ථානයක සංඝාවාසයක කිසිම ඉඩමක් වෙන්වෙලා නෑ. තාමත් හඳුනාගනිමින් තිබෙන්නේ කොච්චර භූමි ප්‍රදේශයක නටබුන් විසිරිලා තියෙනව ද කියලා පමණයි. එහෙම හඳුනා ගැනීමේදී ගවේෂණවලින් පැහැදිලි වෙන්නේ මුල් අක්කර 78ට අමතරව තවත් අක්කර 229ක් තුළ පුරාවස්තු විසිරිලා තියෙනවා කියලා. මේ නිසා පුරාවිද්‍යා දෙපාර්තමේන්තුව වන සංරක්ෂණ දෙපාර්තමේන්තුවෙන් ඉල්ලීමක් කරනවා.

නාගචෝල රක්ෂිතය මැද තමයි මේ සියලු පුරාවස්තු තිබෙන්නේ. හෙක්ටයාර් හයදහස් අටසිය ගණනක් සහිතව නාගචෝල රක්ෂිතය ගැසට් වෙන්නේ 1932 ජුලි 1 වන දා. 2018න් පසුව මේ ප්‍රදේශයේ විශාල වන සංහාරයක් වුණා. කුරුන්දි විහාරයට යාබදවත් අක්කර පනහක් පමණ ශෂිකුමාර් නමැත්තකුගේ මූලිකත්වයෙන් එළිපෙහෙළි කළා. පුරාවිද්‍යා හෝ වන සංරක්ෂණ දෙපාර්තමේන්තුවල අවසරයකින් තොරව කුරුන්දි විහාරයට අයත් පැරැණි පොකුණ වැවක් බවට පරිවර්තනය කරමින් අනීතිකව වන රක්ෂිතය කැපුවා. මේ නැවත ගැසට් කිරීමට යන අක්කර 229 ඇතුළේ එළි කෙරුණු අක්කර පහක් පමණ තිබෙනවා. ඒ එළිකෙරුණේ 2019 අග හා 2020 මුල් කාර්තුවල. මේවා වසර සිය ගණන් කුඹුරු කළ ඉඩම් නෙවෙයි. මේවායේ වී ඇටයක්වත් දමන්න ඔවුන්ට නොහැකි වුණා. මොකද මේ අයට ඉන්පසු නඩු පැවරුවා. ඔවුන් එහිදී වරද පිළිගෙන තිබෙනවා.

මෙය ඔවුන්ට උරුමයෙන් ලැබුණු ඉඩමක් නම් කිසියම් හෝ ලියවිල්ලක් තිබිය යුතුයි. මෙතැන පුරාවිද්‍යා දෙපාර්තමේන්තුව අහිංසක දෙමළ ජනතාවගේ ඉඩම් අත්පත් කරගෙන නෑ. දැනගත යුතු විශේෂ ම කරුණක් වන්නේ නාගචෝල රක්ෂිතයට 1932දී හෙක්ටයාර් හයදහස් අටසිය ගණනක් තිබුණත් අද තිබෙන්නේ පන්දාස් පන්සීයකටත් අඩු ප්‍රමාණයක්. මොකද පසුගිය කාලයේ හෙක්ටයාර් දහසකට වඩා වන සංහාරයකට ලක්වෙලා. එනිසා අප ජනාධිපතිවරයාගෙන් ඉල්ලා සිටින්නේ බෙදුම්වාදීන්ගේ හඬට පමණක් කන් නොදී නිලධාරීන් යොදා පුළුල් විමර්ශනයක් කර සාධාරණ තීන්දුවක් දෙන ලෙසයි. එහිදී මේ රටේ උරුමයන් රැකගැනීම ජනාධිපතිවරයාගේ වගකීමක් බව අපි මෙත් සිතින් සිහිපත් කරන්න කැමතියි.”