යුක්රේනයේ යුද්ධය සහ රුසියාවට එරෙහි සම්බාධක යුරෝපයේ බලශක්ති සැපයුමට හානි කළ හැකි අතර එහි ආර්ථික වර්ධනය ඇනහිටිය හැකි බව යුරෝපීය ආර්ථික කොමසාරිස් Paolo Gentiloni අනතුරු අඟවයි.

බ්‍රසල්ස්හි පැවැති මාධ්‍ය හමුවක දී අදහස් දක්වමින් ඔහු කියා සිටියේ යුරෝපයට බලශක්ති සම්පත් සැපයීමේ දී ගැටළුවලට මුහුණ දිය හැකි බවයි. රුසියානු ගෑස් සැපයීම නතර වීමෙන් අත්වන ප්‍රතිපලයක් සඳහා සූදානම් විය යුතු බවද ඔහු පැවසීය.

යුරෝපා සංගමයේ සංඛ්‍යා ලේඛන කාර්යාලය වන යුරෝස්ටැට් වාර්තා අනුව උද්ධමනය පෙබරවාරි මාසයේදී 5.8% ක මට්ටමක් දක්වා ඉහළ ගොස් ඇත.

මීට පෙර, යුරෝපීය කොමිසම ද සාමාජික රටවල ආර්ථික තත්ත්වය මත රුසියානු විරෝධී සම්බාධකවල ඍණාත්මක බලපෑම ගෙනහැර දක්වමින් ප්‍රකාශයක් නිකුත් කළේය.

රුසියාව යුරෝපීය සංගමයේ විශාලතම බලශක්ති සම්පත් සැපයුම්කරු වන අතර, එහි ස්වභාවික ගෑස් ඉල්ලුමෙන් 40% ක් පමණ සපුරාලන අතර එහි බොර තෙල් ආනයනයෙන් තුනෙන් එකක් පමණ සපයයි. එහි තෙල් හා ගෑස් කර්මාන්ත සම්බාධක ලැයිස්තුවට තවම එකතු කර නැත.

එහෙත් මාර්තු 01 වන දින යුරෝපීය පාර්ලිමේන්තුවේ සාමාජිකයෝ යුක්රේනයේ මිලිටරි ප්‍රහාරය හෙළා දකින යෝජනාවක් අනුමත කළ අතර තෙල් හා ගෑස් ආනයන සීමා කිරීම සහ අන්තර් බැංකු ගෙවීම් SWIFT ජාත්‍යන්තර පද්ධතියෙන් සම්පූර්ණයෙන්ම කපා දැමීම ඇතුළු දැඩි සම්බාධක ඉල්ලා සිටියහ.

මේ අතර යුරෝපයේ ස්වභාවික ගෑස් මිල ඉතිහාසයේ පළමු වරට ඩොලර් 2,200 ට වඩා ඉහළ ගියේය. රුසියාව සහ යුක්රේනය අතර උත්සන්න වන අර්බුදය සැපයුම් හිඟය පිළිබඳ භීතිය මතු කර ඇත. නෙදර්ලන්තයේ ගෑස් මිල ඩොලර් 1,500 සිට ඩොලර් 2,226 දක්වා හෝ ගෘහාශ්‍රිතව මෙගාවොට් පැයකට ඩොලර් 213 දක්වා ඉහළ ගොස් ඇති බව ලන්ඩන් හුවමාරු දත්ත පෙන්වා දෙයි. .

යුක්රේනයේ යුද මෙහෙයුම මධ්‍යයේ බටහිර රාජ්‍ය ගණනාවක් විසින් රුසියාවට පැනවූ සම්බාධකවලින් පසුව මෙසේ මිල ඉහළ ගොස් ඇත. රුසියාවේ ගෑස් බහුතරයක් යුරෝපයට ලබා දෙන අතර රුසියානු තෙල් හා ගෑස් සඳහා සැපයුම් සීමා කිරීමේ හැකියාව හේතුවෙන් සැපයුම් ඇනහිටීම් පිළිබඳ බිය ද එයට බලපා ඇත.