වාහන කබල්වල ගිහින් රට සංවර්ධනය කරන්න බෑ… ඩබල් කැබ් 1750ක් ගන්නේ ඒකයි.! – ඇමති නලින්ද ජයතිස්ස….
November 5, 2025 at 4:35 pm | by emanisa.lk
රාජ්ය අංශයේ ක්ෂේත්ර මට්ටමේ නිලධාරීන් සතුව දැනට ඇති වාහන සමූහය අතිශයින්ම පැරණි සහ අබලන් තත්ත්වයේ පවතින බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස පවසයි.
මෙම දුර්වල ප්රවාහන පහසුකම් හේතුවෙන්, අපේක්ෂිත සංවර්ධන ඉලක්කයන් වෙත ළඟා වීම ඔවුන්ට සැලකිය යුතු අභියෝගයක් වී ඇති බව අමාත්යවරයාගේ අදහසයි.
රට මුහුණ දී සිටින වර්තමාන මූල්ය අර්බුදය මධ්යයේ වුවද, රජය විසින් කැබ් රථ 1,750ක් මිලදී ගැනීමේ තීරණය සම්බන්ධයෙන් සහ එහි ටෙන්ඩර් ක්රියාවලියේ විනිවිදභාවය පිළිබඳව ඇතැම් පාර්ශ්වයන් එල්ල කරන ලද චෝදනා පිළිබඳව මාධ්යවේදීන් විසින් කළ විමසීමකදී අමාත්යවරයා මෙම කරුණු හෙළි කළේය.
රටේ ආර්ථික තත්ත්වය කෙබඳු වුවත්, ඉදිරි ආර්ථික වර්ධන පියවර සාක්ෂාත් කර ගැනීම සඳහා රාජ්ය සේවයේ කාර්යක්ෂමතාව අඛණ්ඩව පවත්වා ගැනීම අත්යවශ්ය බවත් මේ සඳහා, රාජ්ය නිලධාරීන්ට අවශ්ය මූලික පහසුකම් සැපයීම රජයේ වගකීමක් බව ඔහු පෙන්වා දුන්නේය.
මෙම පහසුකම් සැපයීමේ පියවරක් ලෙස, රාජ්ය සේවක වැටුප් වැඩිවීමේ දෙවන අදියර තවත් මාස දෙකක් ඇතුළත ලබා දීමට නියමිත බවද ඔහු සඳහන් කළේය.
අමාත්යවරයා පැහැදිලි කළේ පසුගිය කාල සීමාව තුළ ජනතා සේවය සඳහා රාජ්ය සේවයට අත්යවශ්ය වූ වාහන මිලදී ගැනීම නිසි ලෙස සිදු වී නොමැති බවයි. වත්මන් වාහන මිලදී ගැනීම සියලු ප්රසම්පාදන මාර්ගෝපදේශයන්ට දැඩි ලෙස අනුකූලව සිදු කෙරෙන බවට ද ඔහු සහතික විය.
