රනිල් දුන් බාර් පර්මිට් නීත්‍යානුකූලයි… අපි කැමති වුණාට අහෝසි කරන්න බෑ…! – ඇමති බිමල්….
January 22, 2025 at 5:43 pm | by emanisa.lk
පසුගිය රජය නීත්‍යනුකූලව ලබා දුන් මත්පැන් බලපත්‍ර නවතා දැමීමට කටයුතු කළහොත් නීතිමය ගැටලුවකට මුහුණ දීමට සිදු වන බව සභානායක අමාත්‍ය බිමල් රත්නායක පවසයි.
“ජාතික ජන බලවේගයේ ආණ්ඩුව අලුතින් කිසිදු මත්පැන් බලපත්‍රයක් දීලා නෑ. මේ ලබා දී තිබෙන බලපත්‍ර බොහොමයක් මන්ත්‍රීවරුන් මිලදී ගැනීම සඳහා, විශේෂයෙන්ම රනිල් වික්‍රමසිංහ ජනාධිපතිවරයා අවසාන මාස ගණනාව තුළදී දුන්න බලපත්‍ර තමයි වැඩි ප්‍රමාණයක් තිබෙන්නේ.
අපි ඒවා මෙතන හැන්සාඩ් ගත කරලා තියෙනවා. බලපත්‍රයක් නීත්‍යනුකූලව ලබා දුන්නට පස්සේ ඒක නීතිමය ලියවිල්ලක්. ඒක අපි දේශපාලන වශයෙන් අකමැති වුණාට ඒක අහෝසි කිරීම නීතිමය කටයුත්තක්. ඒ නිසා ආණ්ඩුවකට ගිහින් ඒක බලහත්කාරයෙන් වහන්න බෑ.
ඒත් ඒ වෙනුවෙන් කළ හැකි පරිපාලනමය පියවර තිබෙනවා. අපි රටක් වශයෙන් ක්ලීන් කරන්න හදන්නේ පරණ කුණු කන්දල් තමයි. මේවා තමයි කරපු විනාශය. අපි ආණ්ඩුවක් වශයෙන් කිසිසේත්ම බලපත්‍ර ලබා දෙන්නේ නැති වුණාට, නීත්‍යනුකූලව දුන්න ඒවා නතර කරන්න ගියොත් නීතිමය ගැටලුවක් එනවා.”
ඉලංකෙයි තමිල් අරසු කච්චි පාර්ලිමේන්තු මන්ත්‍රී කවීන්දිරන් කෝඩීස්වරන්ගේ ප්‍රකාශයකට ප්‍රතිචාර දක්වමින් හෙතෙම මේ බව සඳහන් කළේය.
