මෙරට පාතාල හා මත්ද්‍රව්‍ය ජාවාරම් ආශ්‍රිත ප්‍රචණ්ඩත්වය මේ දිනවල ඉහළ ගොස් ඇති අතර, පසුගියදා මිද්දෙණිය ප්‍රදේශයේ සිදුවූ ත්‍රිත්ව ඝාතනය රට පුරා කැළඹීමකට හේතු විය. පසුගිය 18 වැනිදා රාත්‍රියේ මිද්දෙණිය ගල්පොත්තයාය හන්දිය අසලදී යතුරුපැදියක ගමන් කළ පියකු සහ ඔහුගේ දරුවන් දෙදෙනකු යතුරුපැදියකින් පැමිණි පුද්ගලයන් දෙදෙනෙකු විසින් වෙඩි තබා ඝාතනය කළ සිද්ධිය සම්බන්ධයෙන් සැකකරුවන් පස්දෙනෙකු අත්අඩංගුවට ගැනීමට පොලිසිය සමත් වී තිබේ.

රාත්‍රී ආහාරය ලබාගැනීමට දරුවන්ගේ ඉල්ලීම මත ගිය ගමන අවසන් ගමන බවට පත්වූ මෙම සිද්ධියේ ගොදුර වූයේ අරුණ විදානගමගේ නමින් හැඳින්වූ “කජ්ජා” නම් පුද්ගලයා සහ ඔහුගේ දරුවන් දෙදෙනෙකි. මිද්දෙණිය වෙන්දේසිවත්තේ පදිංචිව සිටි කජ්ජා තිදරු පියෙකි. ඔහුගේ බිරිඳ විදේශගතව සිටි හෙයින් ඔහුගේ සොයුරිය දරුවන් බලාගෙන තිබිණි. පසුගිය 18 වැනිදා රාත්‍රියේ කජ්ජාගේ දරුවන් දෙදෙනෙකු ඉල්ලා සිටියේ රාත්‍රී ආහාරයට ෆ්‍රයිඩ් රයිස් ගැනීමටය. මෙම ඉල්ලීම ඉටු කිරීමට පියා සිය දරුවන් තිදෙනා සමඟ යතුරුපැදියෙන් හෝටලයකට ගොස්, වැඩිමහල් පුතු එහි රඳවා අනෙක් දරුවන් දෙදෙනා සමඟ ආපසු එමින් සිටියදී මෙම ප්‍රහාරය එල්ල වී තිබේ.

රාත්‍රී 10.00ට පමණ ගල්පොත්තයාය හන්දිය අසලදී යතුරුපැදියකින් පැමිණි පුද්ගලයන් දෙදෙනෙකු විසින් කජ්ජා සහ ඔහුගේ දරුවන්ට වෙඩි තබා තිබේ. මෙම ප්‍රහාරයෙන් කජ්ජා එම ස්ථානයේදීම මිය ගොස් ඇති අතර, ඔහුගේ දියණිය සහ පුතු බරපතළ තුවාල ලැබ රෝහල් ගත කිරීමෙන් පසුව මිය ගොස් තිබේ. සිද්ධිය වූ ස්ථානයේ මාංචු යුවළක් ද පොලිසිය විසින් සොයාගෙන ඇත.

මාතර හා තංගල්ල දිසා භාර නියෝජ්‍ය පොලිස්පති නිශාන්ත සොයිසාගේ උපදෙස් මත කොට්ඨාස භාර ජ්‍යෙෂ්ඨ පොලිස් අධිකාරී උපුල් සෙනෙවිරත්නගේ අධීක්ෂණයෙන් තංගල්ල කොට්ඨාස අපරාධ විමර්ශන කාර්යාංශය විසින් සිදු කරන ලද පරීක්ෂණවලින් මෙම ඝාතනයට සම්බන්ධ ප්‍රධාන සැකකරුවන් පස්දෙනෙකු අත්අඩංගුවට ගැනීමට සමත් වී තිබේ.

පොලිසිය විසින් සිදු කරන ලද ප්‍රශ්න කිරීම්වලදී අනාවරණය වී ඇත්තේ මෙම ඝාතනය දැනට විදේශගතව සිටින නැදුන්ගොඩගේ නිර්මල නොහොත් “බැකෝ සමන්” නමැති මත්ද්‍රව්‍ය ජාවාරම්කරුවාගේ මෙහෙයවීම මත සිදු කර ඇති බවයි. විශේෂයෙන් බැකෝ සමන්ගේ මත්ද්‍රව්‍ය ජාලයට සම්බන්ධ වකමුල්ල තිහගොඩවත්ත ප්‍රදේශයේ පදිංචි මනෝජ් ප්‍රසාද් කුමාර නොහොත් “ජීවන්” නමැත්තාගෙන් කරන ලද ප්‍රශ්න කිරීම්වලින් මෙම තොරතුරු හෙළි වී ඇත.

බැකෝ සමන් නමැත්තා, කජ්ජාට වසර දෙකහමාරක පමණ සිට මරණ තර්ජන එල්ල කර ඇත්තේ රුපියල් කෝටි 38කට අධික වටිනාකමින් යුත් හෙරොයින් කිලෝග්‍රෑම් 38ක් පොලිසියට අසු කර දීමට කජ්ජා සම්බන්ධ වූ බවට සැක කිරීම නිසාය. මෙම මත්කුඩු තොගය 2022 වසරේදී ඇඹිලිපිටිය ප්‍රදේශයෙන් සොයාගෙන තිබූ අතර, එය මුහුදු මාර්ගයෙන් ගෙන එන ලද්දේ නඳුන් චින්තක වික්‍රමරත්න නොහොත් “හරක් කටා” විසින් බවත්, මෙම මත්ද්‍රව්‍ය තොගයේ හිමිකරු බැකෝ සමන් බවත් පොලිසිය විසින් අනාවරණය කරගෙන තිබිණි.

මීට අමතරව, මාසයකට පමණ පෙර සිදුවූ රුපියල් ලක්ෂ අටක වටිනාකමින් යුත් කේරළ ගංජා කිලෝග්‍රෑම් දෙකහමාරක් අත්අඩංගුවට ගැනීමටද කජ්ජා ඔත්තු ලබා දුන් බවට චෝදනා එල්ල වී තිබිණි.

බැකෝ සමන් විසින් කජ්ජා ඝාතනය කිරීමේ මෙහෙයුම ජීවන් නමැත්තාට පවරා තිබේ. ජීවන්ගේ වගකීම වී ඇත්තේ කජ්ජා ලුහුබැඳීම සහ ඔහු ගැන තොරතුරු සැපයීමයි. මෙම ඝාතනයට සම්බන්ධ තවත් එක් ප්‍රධාන චරිතයක් වන්නේ ඉෂාන් චමින්ද ජයසිංහ නොහොත් “බණ්ඩා” ය. බණ්ඩා සහ ඔහුගේ හිතවතුන් ද කජ්ජා යන එන තැන් සොයමින් සිට ඇත. මිද්දෙණිය හා ආසන්න ප්‍රදේශවල සෑම මළගෙදරකම ඔවුන් සැරිසරා ඇත්තේ කජ්ජා එහි පැමිණෙයිද යන්න සොයා බැලීමටය.

ඝාතනය සිදුවූ දිනයේ බණ්ඩාගේ මිත්තණියගේ වසරක පිංකමක් පැවැත්වූ අතර, එහිදී බණ්ඩා තම බාල සහෝදරයාට ජීවන් සමඟ සිගරැට් ගැනීමට යාමට උපදෙස් දී තිබේ. නමුත් ඔවුන් සිගරැට් කඩවල් කිහිපයක්ම පසුකර ගොස් ඇත්තේ වීරකැටිය මිද්දෙණිය ප්‍රධාන මාර්ගය දෙසටය. ජීවන් වට්ස්ඇප් සමූහයක සිටිමින් කතාබහ කරමින් සිටි බව බණ්ඩාගේ සහෝදරයා පොලිසියට ප්‍රකාශ කර ඇත. පොලිසිය විශ්වාස කරන්නේ මෙම ඝාතනය සම්බන්ධයෙන් ඇමතුම් හුවමාරු වීම ද එම අවස්ථාවේදී සිදු වූ බවයි.

තංගල්ල පොලිසිය විසින් මෙම ඝාතනයට සම්බන්ධ පස්දෙනෙකු අත්අඩංගුවට ගෙන ඇති අතර, ඒ අතර තංගල්ල පොලිසියේ කොස්තාපල්වරයෙකුද සිටිති. ඔහු කජ්ජාගේ සමීපතයෙකු වන අතර, ඝාතන ස්ථානයේ සොයාගත් මාංචු යුවළ ඔහු විසින් කජ්ජාට ලබා දී ඇති බවත්, ඝාතකයින්ට තොරතුරු සැපයූ බවත් පොලිසිය සැක කරයි.

“සිඟිති කළු” සහ “නේවි රුවන්” නමැති ප්‍රධාන අපරාධකරුවන් දෙදෙනෙකුද අත්අඩංගුවට ගෙන ඇති අතර, අත්අඩංගුවට ගත් එක් සැකකරුවෙකු මීට පෙර සිදු වූ වෙඩි තැබීමක යතුරුපැදිකරුවකු බවද හෙළි වී තිබේ.

කෙසේ වෙතත්, මෙම ඝාතන සිදු කළ ප්‍රධාන වෙඩික්කරු හෝ යතුරුපැදි පදවන්නා සම්බන්ධයෙන් තවමත් නිශ්චිත තොරතුරු අනාවරණය වී නොමැති බැවින්, තංගල්ල කොට්ඨාස අපරාධ විමර්ශන කාර්යාංශය දුරකථන දත්ත විශ්ලේෂණය, ආරක්ෂක කැමරා දර්ශන පරීක්ෂාව සහ අත්අඩංගුවට ගත් සැකකරුවන්ගේ ප්‍රකාශ මත පදනම්ව වැඩිදුර විමර්ශන කටයුතු සිදු කරමින් සිටිති.

පුද්ගලයකු ලෙස කජ්ජා මළගෙවල්වල බූරු ගැසීම වැනි ක්‍රියාකාරකම්වල නිරත වූ අයෙකු ලෙස හැඳින්වේ. එපමණක් නොව, අතීතයේදී මාංචු දමා පුද්ගලයන් බියවද්දා මුදල් පැහැරගැනීම් සහ අපරාධ ක්‍රියාවලද නිරත වී ඇති බවට චෝදනා එල්ල වී තිබුණද, මෑත කාලයේදී ඔහු එවැනි ක්‍රියාවලින් වැළකී සිට ඇති බවත්, නිර්ධනයන්ට උදව් කරමින් ප්‍රදේශවාසීන් අතර ජනප්‍රියත්වයක් උසුලමින් සිටි බවත් ගම්වාසීන් පවසති.

මෙම සිද්ධිය මෙරට දිනෙන් දින ඉහළ යන පාතාල හා මත්ද්‍රව්‍ය ජාවාරම් ආශ්‍රිත ප්‍රචණ්ඩත්වයේ තවත් එක් අවාසනාවන්ත සිද්ධියක් ලෙස සැලකිය හැකිය. මෙවැනි අපරාධවලට අදාළ පරීක්ෂණ සාර්ථකව සිදු කිරීම සඳහා පොලිසියට වඩාත් උසස් තාක්ෂණික ශක්තියක් සහ විමර්ශන හැකියාවන් අවශ්‍ය වන බව පොලිස් නිලධාරීන් අවධාරණය කරති.

තංගල්ල පොලිසිය නැවත වතාවක් නීතිය ක්‍රියාත්මක කිරීමේ කාර්යක්ෂමතාව පෙන්නුම් කර ඇති මෙම සිදුවීම, මත්ද්‍රව්‍ය ජාවාරම සහ ඒ හා බැඳුණු අපරාධ පාලනය කිරීමේ අභියෝගය පෙන්නුම් කරන සිද්ධියක් ලෙස සැලකිය හැකිය.