පාසල් ප්‍රතිව්‍යුහගතකරණ ව්‍යාපෘතිය යටතේ සිසුන් අඩු ප්‍රාථමික පාසල් එක්දහස් පන්සිය පනස් හතක් වසා දැමීමට හඳුනා ගෙන ඇතැයි ලංකා ගුරු සංගමයේ සභාපති ප්‍රියන්ත ප්‍රනාන්දු චෝදනා කරයි.

ආණ්ඩුවේ අධ්‍යාපන ප්‍රතිසංස්කරණ යටතේ මේ සඳහා ප්‍රමුඛස්ථානයද ලබා දී ඇතැයි සභාපතිවරයා පෙන්වා දෙයි.

මෙමඟින් පාසකට ළඟාවීම ඉතා දුර දුෂ්කර ප්‍රදේශවල දරුවන් දස දහසකට පමණ විශාල අසාධාරණයක් වන බව ද හෙතෙම කියා සිටියි.

මෙයට පෙර පැවති ආණ්ඩු මේ ප්‍රතිසංස්කරණ ගෙන ඒමට සූදානම් වෙද්දි එදා සටන් බිමේ සිටි වත්මන් ආණ්ඩුවේ පිරිස්ම මෙය සිදු කිරීම විමතියට කරුණක් බවද ඒ මහතා කීය.

මේ ඊනියා ප්‍රතිසංස්කරණයට ලංකා ගුරු සංගමයේ බලවත් විරෝධය පළ කරන අතර මේ ව්‍යාපෘති යටතේ උතුරු මැද පළාතේ පාසල් කිහිපයක් නියමු ව්‍යාපෘතියක් වශයෙන් මේ වන විටත් ක්‍රියාත්මක කරමින් තිබෙන බව ද ප්‍රියන්ත ප්‍රනාන්දු අවධාරණය කරයි.

ඔහු මේ බව සඳහන් කළේ අනුරාධපුරයේ දී පැවති මාධ්‍ය හමුවකදීය.