මුලතිව්, නයාරුහි පිහිටි ඓතිහාසික පුරාණ රජමහ විහාර භූමියේ බලහත්කාරයෙන් හින්දු කෝවිලක් ඉදිකිරීම සඳහා සිදු කළ කැණීම් සම්බන්ධව පුරාවිද්‍යා දෙපාර්තමේන්තුව මඟින් ඊයේ (16දා) විධිමත් පරීක්ෂණයක් ආරම්භ කර තිබේ.

පසුගිය සඳුදා (14දා) දිනයේ දෙමළ ජාතික සන්ධාන පාර්ලිමේන්තු මන්ත්‍රිවරුන්, ප්‍රාදේශීය දේශපාලනඥයන් ඇතුළු විශාල පිරිසක් පැමිණ ගුරුකන්ද රජමහ විහාර භූමිය තුළ නීති විරෝධී ලෙස හින්දු කෝවිලක් ඉදිකිරීමට උත්සාහ දරා තිබිණි.

මුලතිව් පොලිසිය මැදිහත් වී පුරාවිද්‍යා දෙපාර්තමේන්තුවට අයත් පරිශ්‍රයක් වූ එම විහාර භූමිය තුළ අනවසරයෙන් ඉදිකිරීම් සිදු කිරීම නීති විරෝධී ක්‍රියාවක් බව පෙන්වා දීමෙන් අනතුරුව කෝවිල ඉදිකිරීම පිණිස කරන ලද කැණීම් කටයුතු එදින අතරමඟ නවතා දමා ඇත.

විහාර භූමිය තුළ බලහත්කාරයෙන් හින්දු කෝවිලක් ඉදිකිරීමට සිදු කළ කැණීම් සම්බන්ධව පුරාවිද්‍යා දෙපාර්තමේන්තුව, මුලතිව් පොලිසිය සහ ගුරුකන්ද විහාරාධිපති මේධාලංකාර හිමියෝ පෙරේදා (15දා) පැමිණිලි කර තිබූ අතර එම දෙපාර්තමේන්තුවේ උතුරු පළාත භාර සහකාර අධ්‍යක්ෂවරයා ඊයේ (16දා) විහාරස්ථාන භූමියට පැමිණ පරීක්ෂණ කටයුතු ආරම්භ කර තිබිණි.