ප්‍රමාණවත් ගෑස් තොග පවත්වාගෙන නොයමින් පාරිභෝගික ජනතාව නොමඟ යැවීම සහ මහජනතාව අපහසුතාවට පත් කිරීමේ චෝදනා මත LAUGFS Gas සමාගමට එරෙහිව නීතිමය ක්‍රියාමාර්ග ආරම්භ කර ඇති බව වෙළෙඳ අමාත්‍ය වසන්ත සමරසිංහ පවසයි.

මාධ්‍ය වෙත අදහස් දක්වමින් අමාත්‍යවරයා සඳහන් කළේ, මේ සම්බන්ධයෙන් පාරිභෝගික කටයුතු පිළිබඳ අධිකාරිය විසින් ඊයේ (29) අදාළ සමාගමට එරෙහිව නඩුවක් ගොනු කර ඇති බවත්, එය නොවැම්බර් 11 වැනිදා විභාගයට ගැනීමට නියමිත බවත්ය.

LAUGFS සමාගම නිසි ප්‍රසම්පාදන ක්‍රියාවලිය අනුගමනය නොකිරීම හේතුවෙන් පසුගිය මාසයේ සිට ගෑස් සැපයුම අඩාල වී ඇති බවද අමාත්‍යවරයා චෝදනා කළේය. ඔක්තෝබර් 20 සිට 28 දක්වා කාලය තුළ ගෑස් මෙට්‍රික් ටොන් 3,800ක් මෙරටට රැගෙන එන බවට සමාගම මීට පෙර මුදල් අමාත්‍යාංශයට දැනුම් දී තිබුණද, නියමිත කාලය තුළ එම ගෑස් තොගය මෙරටට නොපැමිණි බව ඔහු පැවසීය.

පසුව එම ගෑස් තොගය නොවැම්බර් 2 සිට 5 දක්වා කාලය තුළ මෙරටට පැමිණෙන බවට සමාගම පාරිභෝගික කටයුතු පිළිබඳ අධිකාරියට සහ වෙළෙඳ අමාත්‍යාංශයට දැනුම් දී ඇති බවද අමාත්‍යවරයා සඳහන් කළේය. මේ අතර, හම්බන්තොට වරාය පර්යන්තයේ පවතින ගෑස් මෙට්‍රික් ටොන් 3,900ක සම්පූර්ණ තොගයම දේශීය වෙළෙඳපොළට නිකුත් කිරීමට අවසර ලබාදෙන ලෙස LAUGFS සමාගම අවස්ථා කිහිපයකදීම ඉල්ලා තිබූ බවද ඔහු අනාවරණය කළේය.

ආයෝජන මණ්ඩලය සමඟ ඇති ගිවිසුම අනුව එම සමාගම නිෂ්පාදනය කරන ගෑස්වලින් 80%ක් අපනයනය කළ යුතු අතර, දේශීය වෙළෙඳපොළට සැපයිය හැක්කේ 20%ක් පමණක් බව අමාත්‍යවරයා පැවසීය.

කෙසේ වෙතත්, හම්බන්තොට ගෑස් පර්යන්තය ඉදිකිරීමේදී ලබාදී ඇති බදු සහනවල වටිනාකම නැවත ගෙවීමේ කොන්දේසිය මත සමාගම සතු ගෑස් තොගයෙන් 100%ක්ම දේශීය වෙළෙඳපොළට නිකුත් කිරීමට අවසර ලබාදෙමින් ඊයේ රජය ලිපියක් නිකුත් කර ඇති බවද ඔහු සඳහන් කළේය.
ඒ අනුව හම්බන්තොට පර්යන්තය හරහා මෙරට වෙළෙඳපොළට ගෑස් සැපයීමට කිසිදු බාධාවක් නොමැති බවද අමාත්‍යවරයා අවධාරණය කළේය.

මේ අතර, ලිට්‍රෝ ගෑස් සැපයුම මේ වන විට සාමාන්‍ය තත්ත්වයට පත්ව ඇති බවත්, දිනකට ගෑස් මෙට්‍රික් ටොන් 1,200ක් පමණ බෙදාහරින බවත් අමාත්‍යවරයා පැවසීය. සාමාන්‍යයෙන් මාසිකව බෙදාහරින ගෑස් මෙට්‍රික් ටොන් 32,000 වෙනුවට මෙම මාසයේදී මෙට්‍රික් ටොන් 39,000ක් බෙදාහැරීමට ලිට්‍රෝ සමාගම කටයුතු කර ඇති බවද ඔහු සඳහන් කළේය. එමෙන්ම නොවැම්බර් මාසය සඳහා ගෑස් මෙට්‍රික් ටොන් 41,000ක් ඇනවුම් කර ඇති බවද අමාත්‍යවරයා අනාවරණය කළේය.

LAUGFS සමාගමෙන් මාසිකව ගෑස් මෙට්‍රික් ටොන් 6,000ක පමණ සැපයුමක් අපේක්ෂා කළද එම අවශ්‍යතාව සපුරාලීමට සමාගම අසමත් වී ඇති බවද ඔහු පෙන්වා දුන්නේය. තවද LAUGFS ගෑස් සිලින්ඩර ලබාගැනීම සඳහා රුපියල් 10,000ත් 15,000ත් අතර තැන්පතු මුදල් ගෙවා ඇති නමුත් මේ වන විට ගෑස් නැවත පුරවා ගැනීමට නොහැකිව සිටින පාරිභෝගිකයන් පිළිබඳවද අමාත්‍යවරයා අවධානය යොමු කළේය.

එම පාරිභෝගිකයන්ට ලිට්‍රෝ ගෑස් සිලින්ඩර මිලදී ගැනීමට හැකි වන පරිදි අදාළ තැන්පතු මුදල් ආපසු ලබාදීමට LAUGFS සමාගම කටයුතු කළ යුතු බවද ඔහු පැවසීය. ගෑස් සැපයුමේ ඇතිවූ හිඟය පියවීම සඳහා ලිට්‍රෝ සමාගම හරහා අවශ්‍ය පියවර ගෙන ඇති අතර, පාරිභෝගිකයන් අපහසුතාවට පත්කිරීම සම්බන්ධයෙන් LAUGFS සමාගමට එරෙහි නීතිමය ක්‍රියාමාර්ගද ඉදිරියට ගෙන යන බව අමාත්‍යවරයා වැඩිදුරටත් සඳහන් කළේය.