කොවිඩ් පාලනය වගේ ම ආර්ථිකය ශක්තිමත් කිරීමත් වැදගත්…! ආර්ථිකය වැටුණොත් කොවිඩ් පාලනය වගේ ම රට ම අනතුරේ…! – ලාන්සා….
September 1, 2021 at 6:15 pm | by emanisa.lk
නිරෝධායන කාල සීමාව තුළ මෙන්ම ඉන් පසුවත් වසංගතය පාලනය කර ගනිමින් රටේ ආර්ථික ක්‍රියාවලිය පවත්වා ගෙන යාම ඉතා වැදගත් බවත් එසේ නොවුණහොත් සමස්ත ජනතාවම එහි බලපෑමට මුහුණ දීමට සිදුවන බව ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍ය නිමල් ලාන්සා සඳහන් කරයි.
රාජ්‍ය අමාත්‍ය නිමල් ලාන්සා මහතා මෙම අදහස් පළ කර සිටියේ මාධ්‍ය වෙත අදහස් දක්වමිනි.
කොවිඩ් 19 වසංගතය පාලනය කරමින් රට යථාතත්ත්වයට පත් කර ගැනීම සඳහා සිදුකරනු ලබන එන්නත්කරණ වැඩපිළිවෙල, රෝහල් සේවා පවත්වාගෙන යාම, ඒවාට අවශ්‍ය පහසුකම් ලබාදීම, නිරෝධායන කාලය තුළ ජනතාවට අවශ්‍ය සහන සැලසීම ඇතුළු කාර්යයන් සඳහා රජය විශාල මුදලක් වැය කරනු ලබනවා.
මේ සියලු දේ සඳහා රටේ ආර්ථිකය ශක්තිමත්ව පවත්වා ගෙන යා යුතු වෙනවා. එසේ නොවුණහොත් කොවිඩ් මර්දන වැඩසටහන පමණක් නොවේ, රටේ සෑම ක්ෂේත්‍රයක්ම කඩා වැටීමකට ලක් විය හැකියි. මේ නිසා අසීරුතා මධ්‍යයේ වුවද ජනතාව ආරක්ෂා කර ගැනීමට ප්‍රමුඛතාව දෙමින් ආර්ථික ක්‍රියාවලිය පවත්වාගෙන යාමට අතිගරු ජනාධිපති ගෝඨාභය රාජපක්ෂ මහතා ගෙන යන වැඩපිළිවෙල අපි අගය කළ යුතුයි.
පාස්කු ප්‍රහාරයෙන් පසු ලංකාවේ සංචාරක කර්මාන්තය බිද වැටුණා. ඉන්පසු කොවිඩ් වසංගතය හේතුවෙන් සංචාරක කර්මාන්තය තවදුරටත් පහළට ඇද වැටුණා. මේ නිසා ලංකාවේ ආර්ථිකයට දැඩි බලපෑමක් එල්ල කළා. වත්මන් රජය බලයට පත්වන විට විදේශ විනිමය සංචිතද අයහපත් මට්ටමක තිබුණා. එවැනි ආර්ථිකයක් භාර ගත් වත්මන් රජය අද කොවිඩ් වසංගතයට මුහුණ දෙමින් සිටිනවා. මේ නිසා ඇතිවූ ආර්ථික බලපෑම්වලට මුහුණ දීමට අපට සිදුව තිබෙනවා. කොවිඩ් වසංගතය අපේ රටට පමණක් සීමා වූ කාරණයක් නොවේ. මේ නිසා පවතින ආර්ථික තත්ත්වය පිළිබඳව අවබෝධයෙන් යුතුව හා වගකීමෙන් රජය කටයුතු කරනවා.
කොවිඩ් වසංගතය හේතුවෙන් මිය ගිය වැඩි පිරිසක් වයස අවුරුදු 60 ට වැඩි ජ්‍යෙෂ්ඨ පුරවැසියන්. ඔවුන් ආරක්ෂා කර ගැනීම සඳහා වයස අවුරුදු 60 වැඩි පිරිස් එන්නත්කරණයට විශේෂ වැඩපිළිවෙලක් සකස් කර තිබෙනවා. ඒ අනුව එන්නත්කරණය සඳහා යොමු වෙන්න කියලා ජ්‍යෙෂ්ඨ පුරවැසියන්ගෙන් අපි ඉල්ලා සිටිනවා.
කොවිඩ් 19 වසංගතය පාලනය සඳහා ලෝකයේ සියලුම රටවල් එන්නත්කරණයට ප්‍රමුඛතාව දී ඇති අතර අපි ද ඒ සඳහා ප්‍රමුඛතාව දෙමින් කටයුතු කරනවා. නිරෝධායන ඇඳිරි නීති කාල සීමාව තුළ මෙන්ම ඉන් පසුවත් අපි සියලු දෙනා ඉතා ඕනෑකමින් කටයුතු කරමින් වසංගතය පැතිර යාම වැළැක්වීමට කටයුතු කළ යුතුයි. එසේ නොවුණහොත් සෞඛ්‍ය හා ආරක්ෂක අංශ සිදුකරනු ලබන කැපවීමෙහි ප්‍රතිඑලයක් නොමැති වනු ඇත. රටේ ආර්ථිකයද කඩා වැටෙනු ඇත. ඒ නිසා අපි සියලු දෙනා වගකීමෙන් කටයුතු කළ යුතු බව රාජ්‍ය අමාත්‍ය නිමල් ලාන්සා වැඩිදුරටත් සඳහන් කළේ ය.
