අඩු ආදායම්ලාභීන් සඳහා දැනටමත් 80% ක සහනාධාරයක් ලබා දෙන අතර එම අලාබය වෙනත් පාරිභෝගික කාණ්ඩවලින් පියවා ගැනීමට සිදුව ඇතැයි විදුලිබල මණ්ඩලයේ සභාපති තිලක් සියඹලාපිටිය මහතා සඳහන් කරයි.

සභාපතිවරයා පවසන්නේ එහෙයින් ඉදිරියේදී තව දුරටත් එම පිරිසට ලබා දෙන එම සහන වැඩි කළ නොහැකි බවයි.

විදුලි ක්ෂේත්‍රයට කිසිදු සහනාධාරයක් රජයෙන් හෝ ජාත්‍යන්තර ආයතනවලින් නොලැබෙන හෙයින් මෙම පිරිසට 80% ක සහනයක් ලබා දීමෙන් වන අලාබය පියවනු ලබන්නේ වෙනත් පාරිභෝගික කාණ්ඩවලට විදුලිය බිල වැඩි කිරීමෙනි.

ඒ අනුව වාණිජ ආයතන සඳහා මසක විදුලිය ගාස්තුව රුපියල් 1000ක් නම් ඔවුනට රුපියල් 1400 ක විදුලි බිලක් ගෙවීමට සිදුවන අතර, කර්මාන්තශාලා සඳහා මසක විදුලිය බිල රුපියල් 10,000ක් නම් ඔවුනට ද රුපියල් 13,000 ක් පමණ ගෙවීමට සිදුව ඇතැයි ද ඔහු පෙන්වා දෙයි.

වසර 40 කට අධික කාලයක් මුළුල්ලේ විදුලිබල ක්ෂේත්‍රයේ ප්‍රමාද වූ සියලු‍ කටයුතු නව පරිපාලනය සමඟ නියමිත පරිදි කඩිනමින් සිදුකිරීමට පියවර ගන්නා බව ද සභාපතිවරයා සඳහන් කළේය.