අරගල කරපු කුඩ්ඩොයි, ගණිකාවොයි කූඩාරම් අස්සට වෙලා කරපු දේවල් දැන් එළිවෙනවා. ලක්ෂ 220ක් නියෝජනය කරන පාර්ලිමේන්තුවෙ ඉන්න අයයි මේ අර්බුදයට විසඳුම් හොයන්න ඕන. කුඩ්ඩෝ කියන දේවල් කරන්න ගියොත් රට ගොඩගන්න බෑ’නගාරික සංවර්ධන හා නිවාස අමාත්‍ය ප්‍රසන්න රණතුංග මහතා පාර්ලිමේන්තුවේදී පැවසීය.

පවතින ආර්ථික අර්බුදය හමුවේ ඒ සඳහා විවිධ බාධා එල්ලවුවද නවීන තාක්ෂණය භාවිතා කරමින් නාගරික සංවර්ධන හා නිවාස කේෂ්ත්‍රය වැඩිදියුණු කිරීමට සූදානම් බවද අමාත්‍යවරයා සඳහන් කළේය.

අළුත් දේශපාලන සංස්කෘතියක් තුළ අළුත් රටක් හදන්න නම් අළුත් අදහස්වලින් පෝෂණය විය යුතු බවද හෙතෙම කීය. අමාත්‍ය ප්‍රසන්න රණතුංග මහතා මේ බව සඳහන් කළේ නාගරික සංවර්ධන හා නිවාස අමාත්‍යංශයේ වැය ශීර්ෂය පිළිබඳ කතාව ආරම්භ කරමිනි. එහිදී අමාත්‍යවරයා මෙසේද පැවසීය.

අද අපි සාකච්ඡාවට ගන්නේ නාගරික සංවර්ධන හා නිවාස අමාත්‍යාංශයේ වැය ශීර්ෂ වන 123, 291, 309 සිට 311 දක්වා වන වැය ශීර්ෂ පිළිබඳවයි. මෙම වැය ශීර්ෂ පිළිබඳ අදහස් දක්වන පක්ෂ විපක්ෂ සියලුම දෙනාම විෂයභාර අමාත්‍යවරයා විදිහට මා ඉල්ලා සිටිනවා රටේ පවතින ආර්ථික අර්බුදය අවබෝධ කර ගෙන රටේ පුරවැසියා වෙනුවෙන් ඵලදායි හා ප්‍රයෝජනවත් යෝජනා හා අදහස් ඉදිරිපත් කරයි කියලා.

ඊට අමතරව මෙම අමාත්‍යාංශය සම්බන්ධව චෝදනා හෝ නිවැරදි විය යුතු කරුණු තිබෙනවා නම් ඒවා සාධනීයව ඉදිරිපත් කරන ලෙස ඉල්ලා සිටිනවා. පසුගිය දවස් කීපයේ අයවැය විවාදයට ඇහුම්කන් දුන්නාම අපේ ගරු මැති ඇමතිතුමන්ලගේ කථාවලින් පැහැදිලි වු‍ණේ ඔවුන් මෙවරත් බලාපොරොත්තු වෙලා තියෙන්නේ සාම්ප්‍රදායික සුබසාධක අයවැයක් කියලයි. මේක එහෙම සාම්ප්‍රදායික සුබසාධක අයවැයක් ඉදිරිපත් කරන්න පුළුවන් වෙලාවක් නෙමෙයි. මම විශ්වාස කරනවා මේ වෙලාවේ රටට ඉදිරිපත් කරන්න පුළුවන් හොඳම අයවැයක් ඉදිරිපත් වෙලා තියෙනවා කියලා.

පවතින තත්ත්වය තුළත් මෙවර අයවැයෙන් රුපියල් මිලියන 48,491ක මුදලක් මේ අමාත්‍යාංශය සඳහා වෙන් වී තිබෙනවා. එහි පුනරාවර්තන වියදම් ලෙස වෙන් කර ඇති මුදල රුපියල් මිලියන 2,744ක්. අපි සමස්ථ මුදලෙන් රුපියල් මිලියන 43,740 ක් සංවර්ධන කටයුතු සඳහා වෙන් කර තිබෙනවා. නාගරික සංවර්ධන වැඩසටහන් සඳහා රුපියල් මිලියන 20,433ක්, නිවාස සංවර්ධන වැඩසටහන් සඳහා රුපියල් මිලියන 16,057ක් මෙන්ම කසළ කළමණාකරණය හා පරිසර ආරක්ෂණ වැඩසටහන් සඳහා රුපියල් මිලියන 7,250ක් වෙන් කර තිබෙනවා. මෙම අමාත්‍යාංශය යටතේ ඇති දෙපාර්තමේන්තු 4 සඳහා රුපියල් මිලියන් 2007ක් වෙන් කර තිබෙනවා.

කොවිඩ් වසංගතයත් එක්ක රට මුහුණ දුන් ආර්ථික අර්බුදය නිසා රටේ බොහෝ සංවර්ධන ව්‍යාපෘති අඩාල වුණා. ආනයනය පාලනය කරන්න සිද්ධ වෙච්ච නිසා වෙළඳපොලේ ඇති වු භාණ්ඩ හිඟයත්, අමුද්‍රව්‍ය මිල ඉහළ යාමත් මේ තත්ත්වයට හේතු වු බව අපි පිළිගන්න ඕනේ. මම මේ අමාත්‍යාංශය භාරගත්තේ එවැනි පසුබිමක් තුළ.

මේ විෂය මට අළුත් විෂයයක් නොවේ. මම බස්නාහිර පළාත් සභාවේ මේ විෂයට සම්බන්ධ ඇමති ධූරයක් දරලා තියෙනවා. ඒ බස්නාහිර පළාතේ නිවාස නාගරික සැළසුම් ඇමති ධුරයයි. ලංකාවේ ආර්ථික වශයෙන් වැදගත්ම පළාතේ ප්‍රධාන අමාත්‍යවරයා ලෙස කටයුතු කළ මට ඔබ සියළු දෙනාගේම සහයෝගය ඇතිව මේ අමාත්‍යාංශය නිවැරදි දිසාවට මෙහෙයවන්න පුළුවන් වෙයි කියලා විශ්වාසයක් තියෙනවා.

මේ අමාත්‍යාංශය යටතේ ආයතන 21ක් තියෙනවා. මේ ආයතන 21ම රටේ සංවර්ධනයට සෘජුව දායක වන ආයතන. මේ ආයතන පසුගිය කාලයේ යම් කඩා වැටීමකට ලක්ව තියෙනවා. ජනාධිපතිතුමා මේ අමාත්‍යාංශයට වැඩ කරන්න පුළුවන් රාජ්‍ය අමාත්‍යවරුන් දෙදෙනෙකු පත් කළා. අමාත්‍යාංශය යටතේ තිබෙන ආයතන 21 න්

නාගරික සංවර්ධන අධිකාරිය,
ඉඩම් ගොඩකිරීමේ හා සංවර්ධනය කිරීමේ සංස්ථාව,
ජාතික භෞතික සැලසුම් දෙපාර්තුමේන්තුව
ගොඩනැගිලි ද්‍රව්‍ය සංස්ථාව
යන ආයතන හැරුණාම අනිත් සියලුම ආයතනවල වගකීම මම රාජ්‍ය අමාත්‍යවරුන්ට පවරා තිබෙනවා. ඒ ගැසට් මගින් ප්‍රකාශයට පත් කරන්න කටයුතු කළා. ඒ ආයතන නිළ වශයෙන් ඔවුන්ට පැවරුණත් කැබිනට් අමාත්‍යාංශය යටතේ තිබෙන ආයතනවල වගකීමත් ඔවුන්ට තිබෙන බව මා දැනුම් දී තිබෙනවා. මොකද අපි රට හදන්න ඕනේ එකමුතුවෙලයි. මම වැඩ බදාගෙන කරන කෙනෙක් නෙමෙයි. බෙදාගෙන කරන කෙනෙක්.

සමහර ආයතනවල සේවකයන්ගෙ පඩි ගෙවාගන්න බැරි තත්ත්වයක් ඇති වෙලා තිබෙනවා. ඒ ආයතනවල සේවකයන්ගේ රැකියා සුරක්ෂිත කරගෙන ආයතන ලාභ ලබන තත්ත්වයට පත්කර ගන්න අපි උපදෙස් දී තිබෙනවා.

කැබිනට් ඇමතිවරයා විදිහට මගෙත්, රාජ්‍ය අමාත්‍යවරුන්ගෙත් අමාත්‍යාංශ ලේකම්තුමා ඇතුළු සියලු ආයතන ප්‍රධානීන්ගේත්, අපේ අමාත්‍යාංශය යටතේ ඉන්න ඉහළ සිට පහළ දක්වා සියලුම දෙනාගේත් අපේක්ෂාව වෙලා තියෙන්නේ පවතින තත්ත්වය තුළ මේ නාගරික සංවර්ධන හා නිවාස ක්ෂේත්‍රය ගොඩගන්න එක. ඒ වගේම ක්ෂේත්‍රයේ නිරත වෙලා ඉන්න කම්කරුවාගේ සිට ඉහළම ආයෝජකයා දක්වා රැක ගැනීම. ඒ සඳහා ප්‍රතිපත්තිමය තීන්දු තීරණ ගැනීම සහ ඒවා ක්‍රියාත්මක කිරීම.

මම නාගරික සංවර්ධන හා නිවාස අමාත්‍යාංශය භාරගත්තාට පස්සේ මුලින්ම කළේ අපිට මුහුණ දෙන්න තිබුණ අභියෝග හඳුනා ගැනීම. ඒ අභියෝග හඳුනා ගෙන ඒවාට විසඳුම් ලබා දෙන්න පුළුවන් විවිධ පාර්ශ්ව එක්ක සාකච්ඡා කළා. සාකච්ඡා කරලා ඒවාට අදාළ විසඳුම් ක්‍රියාත්මක කළා. ඒ වැඩපිළිවෙල අතරතුර ආර්ථික අර්බුදය නිසා අතරමග නතර වෙලා තිබෙන ණය, ආධාර ලබාදීම්, නිවාස ව්‍යාපෘති, නාගරික සංවර්ධන යෝජනා නැවත ආරම්භ කිරීමේ ක්‍රමවේදයක් සකස් කළා. ඒ සඳහා කෙටිකාලීන, මධ්‍ය කාලීන හා දීර්ඝ කාලීන වැඩපිළිවෙලක් අපි හඳුනා ගත්තා.

අපිට මුලින්ම තිබුණ අභියෝගය තමයි පශ්චාත් කොවිඩ් වසංගත තත්ත්වය සහ ආර්ථික අර්බුදය හේතුවෙන් කඩා වැටී තිබු ඉදිකිරීම් ක්ෂේත්‍රය රැක ගැනීම. මේ ක්ෂේත්‍රයේ සෘජු හා වක්‍ර රැකියාවල ලක්ෂ 10කට ආසන්න පිරිසක් නිරත වෙලා ඉන්නවා. ආනයන සීමා කිරීම්, සැපයුම් ප්‍රවාහන ප්‍රමාදය, බැංකු පහසුකම් සීමා කිරීම, රුපියල අවප්‍රමාණය වීම, ඉන්ධන මිල, ඉදිකිරිම් ද්‍රව්‍ය හිඟ වීම වගේ කාරණා මේ ක්ෂේත්‍රය කඩා වැටීමට හේතු වුණා.

මේ තත්ත්වය හඳුනාගත් අපි අමාත්‍යාංශයක් විදිහට ඉදිකිරීම් ක්ෂේත්‍රය රැකගැනීම සඳහා විශේෂ පියවර කීපයක් ගත්තා. අපේ පළමු පියවර වුණේ ඉදිකිරිම් කර්මාන්තයේ පැවැත්ම උදෙසා සහනදායි ක්‍රියාමාර්ගයක් ගැනීමට ජනාධිපතිතුමා සමඟ සාකච්ඡා කිරීමයි. එහි ප්‍රතිඵලයක් විධියට ගරු ජනාධිපතිතුමා විසින් කැබිනට් පත්‍රිකාවක් ඉදිරිපත් කළා. එම කැබිනට් පත්‍රිකාව මම සභාගත කරනවා.

මේ අනුව 2020 මාර්තු සිට 2022 දෙසැම්බර් අවසානය දක්වා ඉදිකිරීම් ක්ෂේත්‍රයේ නියුතු වූවන්ට සහන සැලසෙනවා. මෙම සහන ලබන වසරේ (2023) දෙසැම්බර් දක්වා දීර්ඝ කිරීමට අපි කටයුතු කර ගෙන යනවා. ඒ සඳහා කැබිනට් මණ්ඩලයට අමාත්‍ය මණ්ඩල සටහනක් ඉදිරියේදී ඉදිරිපත් කිරීමට මම බලාපොරොත්තු වෙනවා.

නාගරික සංවර්ධන සහ නිවාස අමාත්‍යාංශය යටතේ සිදු කෙරුණු ඉදිකිරීම් සඳහා ගෙවීම් ප්‍රමාද වී තිබෙන මුදල රුපියල් බිලියන 12කට ආසන්නයි. මහා මාර්ග ඉදිකිරීම් කොන්ත්‍රාත්කරුවන්ටත් මේ හා සමාන මුදලක් ගෙවන්න තියෙනවා.

අපේ නිවාස අමාත්‍යාංශය යටතේ ගෙවන්න තිබෙන මෙම මුදල මේ වන විට ක්‍රමානුකූලව, කඩින් කඩ ගෙවමින් තියෙනවා. අපි විශ්වාස කරනවා ලබන වසරේ මුල් කාර්තුව අවසන් වන විට මේ ගෙවීම් කටයුතු අවසන් කරන්න අපට පුළුවන් වෙයි කියලා.

අපේ අමාත්‍යාංශය යටතේ තිබෙන සීඩා ආයතනය (ඉදිකිරීම් කර්මාන්ත සංවර්ධන අධිකාරිය) ඉදිකිරීම් ක්ෂේත්‍රයේ උන්නතිය වෙනුවෙන් පියවර රැසක් ගෙන තිබෙනවා. ඇත්තටම කිව්වොත් මේ ආයතනයෙන් නිසි ප්‍රයෝජනයක් අපි මෙතෙක් අරගෙන නෑ. උදාහරණයක් විධියට ඉදිකිරීම් ක්ෂේත්‍රයේ නිරත පහළම කම්කරුවාගේ සිට ඉහළම පුද්ගලයා දක්වා වෘත්තීය පිළිගැනීමක් (Recognition) ඇති කිරීමට කටයුතු කර තිබුණේ නෑ. එවැනි පිළිගැනීමක් ඇති කිරීමට නම් එම වෘත්තීය ප්‍රමිතිගත කිරීම කළයුතුයි. එම කාර්යය පැවරෙන්නේ මෙම ආයතනයටයි.

ඒ අනුව දැනට පවතින ඉදිකිරීම් කර්මාන්ත සංවර්ධන පනත බලගන්වා මෙතෙක් කලක් ප්‍රමාද වී තිබු ඉදිකිරීම් ශිල්පීන් සහ නිපුණ ඉදිකිරීම් ශිල්පීන් වර්ග කිරීම මීට සති දෙකකට පෙර අපි ආරම්භ කළා. ඒ අනුව ඉදිකිරීම් ශිල්පීන්ට වෘත්තීය හැඳුනුම්පතක් නිකුත් කිරීම දැන් සිදු වෙනවා. මේ නිසා ඔවුන්ගේ රැකියා සුරක්ෂිතභාවයද ඇති වී තිබෙනවා. මේ වැඩපිළිවෙල ඉදිරි වසර තුළ දිවයිනේ සියළුම දිස්ත්‍රික්ක ආවරණය වන පරිදි සිදු කිරීමට අපි බලාපොරොත්තු වෙනවා.

පත්කළ මන්ත්‍රී තිස්ස අත්තනායක (ස.ජ.බ) – පසුගිය කාලයේදී ඉදිකිරීම් කේෂ්ත්‍රයට අදාළ ආයතන ගණනාවක් විපක්ෂනායකතුමා සමඟ කතා කළා. ඔවුන්ට රුපියල් බිලියන 200ක් විතර ලැබෙන්න තියෙනවා. ඒ වගේම විදේශගතව තමන්ගේ වෘත්තිය කරගෙන යන අයට අවශ්‍ය සහතික ලබාගැනීම ගැන ඔවුන් බරපතළ ප්‍රශ්නයකට මුහුණ දී සිටිනවා. එමෙන්ම විදේශගත වන්න වීසා පහසුකම් ලබාගැනීම හා විදේශ අමාත්‍යංශයේ මඟපෙන්වීම අඩුපාඩු ගැන කතා කළා. ඒ ගැන අවධානය යොමුකරන්න කියල ඔබගෙන් ඉල්ලනවා.

ආණ්ඩු පක්ෂයේ ප්‍රධාන සංවිධායක, අමාත්‍ය ප්‍රසන්න රණතුංග මහතා (ශ්‍රී.පො.පෙ) – ඔබ කතා කරන්නේ සියලුම ඉදිකිරීම් ශිල්පීන් ගැනයි. මම කතා කරන්නේ මගේ අමාත්‍යංශයේ ඉදිකිරීම් ශිල්පීන් ගැනයි. ඒ අයගේ ගෙවීම් ලබන අවුරුද්දෙ ගෙවන්න අපි කටයුතු සූදානම් කර තිබෙනවා. අපිත් යෝජනා කරන්නෙ විදේශ රටවල ඉදිකිරීම් කේෂ්ත්‍රයට අදාලව ඉල්ලීම් කරන්න කියලයි. ඒ සඳහා තනාපති කාර්යාල සඳහා මඟපෙන්වීම අපි කරනවා. දැනටමත් ඩුබායි රාජ්‍ය සමඟ සාකච්ඡා කරනවා. අපි සියලුම දෙනාට මේ සඳහා මැදිහත් වෙන්න වගකීමක් තිබෙනවා.

අද රට මුහුණපා තිබෙන ආර්ථික අර්බුදයේ මූලික ප්‍රශ්නය තමයි ඩොලර් නැතිකම. අපේ අමාත්‍යාංශය ඩොලර් උපයන අමාත්‍යාංශයක් නෙමෙයි. නමුත් පවතින තත්ත්වය තුළ අමාත්‍යාංශයක් විදිහට අපිට කරන්න පුළුවන් මොනවද කියලා අපි අළුතින් හිතුවා.

නාගරික සංවර්ධන අධිකාරිය මධ්‍යම පාන්තික නිවාස ව්‍යාපෘති 12ක් මේ වන විට ක්‍රියාත්මක කර තියෙනවා. ඒ යටතේ දැනට නිවාස ඒකක 3,667ක් ඉදිවෙමින් පවතිනවා. ඒ අනුව අපි විදෙස්ගත ශ්‍රී ලාංකිකයන්ට සහ විදේශවල සේවය කරන අපේ අයට ඩොලර්වලට නිවාස අලෙවි කරන ව්‍යාපෘතියක් හඳුන්වා දුන්නා. අපි ද්විත්ව පුරවැසිභාවය හා ස්ථිර වීසා මත විදේශයන්හි ජීවත් වන ශ්‍රී ලාංකිකයන්ටත් මේ නිවාස මිල දී ගැනීමේ අවස්ථාව ලබාදෙන්න කටයුතු කළා. ඩොලර්වලින් මේ නිවාස මිල දී ගන්නවා නම් අපි 10%ක වට්ටමක් දෙන්න කටයුතු කරනවා. මේ වෙනුවෙන් අපි ඩොලර් ගිණුමක් පිහිටුවන්න කටයුතු කළා.

අපි පසුගිය මාස දෙක තුළ ඩොලර්වලට නිවාස 06 ක් විකුණා තිබෙනවා. ඒ අනුව ඇමෙරිකානු ඩොලර් 276,650ක මුදලක් මේ වන විට උපයා තිබෙනවා. මේ අලෙවි කෙරුණු සියලුම නිවාස වියත්පුර නිවාස ව්‍යාපෘතියේ ඒවා. ඩුබායි, ඇමෙරිකානු එක්සත් ජනපදය, කැනඩාව, කටාර් වගේ රටවල්වල සේවය කරන සහ වැඩකරන ශ්‍රී ලාංකිකයන් තමයි මේවා මිල දී ගත්තේ. තවත් විදෙස්ගත ශ්‍රී ලාංකිකයන් 10 දෙනෙක් මේ නිවාස මිල දී ගන්න අයදුම් කරලා තියෙනවා. ඒ ක්‍රියාවලිය මේ වන විට ක්‍රියාත්මකයි. මේ මාසය අවසන් වෙන්න කලින් අපි ඒ අලෙවි කටයුත්ත අවසන් කරනවා. එම නිවාස 10 යේ වටිනාකම ඇමෙරිකානු ඩොලර් 352,800 ක්.

ලබන වසරේ අපේ ඉලක්කය තමයි “ඩොලර් නිවාස ව්‍යාපෘතිය” මගින් ඇමෙරිකානු ඩොලර් මිලියන 02ක ඉලක්කයක් සපුරා ගැනීම. විදේශීය පුරවැසියන්ට ද මේ නිවාස මිල දී ගැනීමේ අවස්ථාව ලබාදෙන්න අපි තීරණය කළා. ඒ සඳහා ශ්‍රී ලංකා මහා බැංකුවේ නිර්දේශය මත විවෘත කරන අභ්‍යන්තර ආයෝජන ගිණුමක් (Inward Investment Account) විවෘත කිරීමට අපි පියවර ගන්නවා.

සංචාරක ව්‍යාපාරය තමයි මේ රටට ඩොලර් ගෙනෙන ප්‍රධාන ක්ෂේත්‍රයක් වෙන්නේ. මා සංචාරක ඇමතිවරයා ලෙස කටයුතු කරන කොට රට පුරා ආකර්ෂණීය සංචාරක ස්ථාන 5000කට වැඩි සංඛ්‍යාවක් අලුතින් හඳුනා ගත්තා. ඒවා සමාජ මාධ්‍ය ඔස්සේ සංචාරකයන් අතර ප්‍රචලිත කිරීම සඳහා අවශ්‍ය කටයුතු කළා.

නාගරික සංවර්ධන හා නිවාස අමාත්‍යාංශයට තමයි වෙරළ සංරක්ෂණ දෙපාර්තුමේන්තුව තිබෙන්නේ. දිවයින වටා තිබෙන වෙරළ තීරයේ නව සංචාරක ආකර්ෂණීය ස්ථාන 24ක් අපි අළුතින් හඳුනාගෙන තිබෙනවා. ගඟේ වාඩිය, පුත්තලම කළපු දූපත්, වයික්කාල, සීතගල්ල මේ සංචාරක ආකර්ෂණිය ස්ථානවලින් කිපයක්. සංචාරක අමාත්‍යංශය හා එක්ව අපි ඉදිරියේ දි මෙම සංචාරක ස්ථාන පිළිබඳව සංචාරකයන් අතර පුළුල් ප්‍රචාරයක් ලබාදීම සඳහා වැඩපිළිවෙලක් සකස් කරනවා.

අපේ රටට අයත් දූපත් 113 ක් තිබෙනවා. උතුරු නැගෙනහිර ප්‍රදේශවල විතරක් දූපත් 76ක් පිහිටා තිබෙනවා. මේ දූපත්වල විවිධ ජනකොටස් ජීවත් වෙනවා. ඔවුන්ටම ආවේණික උපසංස්කෘතින් ඒ අයට තියෙනවා. මේ දූපත් සංවර්ධනය කිරීම සඳහා දූපත් සංවර්ධන අධිකාරිය නමින් නව ආයතනයක් පිහිටුවීමට කැබිනට් පත්‍රිකාවක් මම ඉදිරිපත් කළා. ඒ කැබිනට් පත්‍රිකාව පිළිබඳව ගරු ඇමතිතුමන්ලා විවිධ නිරික්ෂණයක් ඉදිරිපත් කර තිබෙනවා. අපේ අපේක්ෂාව වුණේ මේ දූපත් සංවර්ධනය කරලා සංචාරක ආකර්ෂණය ඉහළ නංවාලීමේ ව්‍යාපෘති ක්‍රියාත්මක කරලා රටට ඩොලර් උපයා ගැනීමේ වැඩපිළිවෙලක් හදන්න. කැබිනට් මණ්ඩලයේ නිර්දේශ අනුව අපි ඒ සඳහා ඉදිරියේ දී අවශ්‍ය පියවර ගන්නවා.

ඔබට මුලින් කිව්වා අපි රටට ඩොලර් ගේන්න වැඩපිළිවෙලක් සකස් කළා කියලා. නාගරික සංවර්ධන අධිකාරිය විදිහට අපි ඒ වෙනුවෙන් තවත් විශේෂ පියවරක් ගත්තා.

නාගරික සංවර්ධන අධිකාරිය මහනගර සභා 24ක්, නගර සභා 41ක්, ප්‍රාදේශිය සභා 208ක්, නාගරික සංවර්ධන ප්‍රදේශ ලෙස ප්‍රකාශයට පත්කරලා තියෙනවා. මේ ප්‍රදේශවල සියලුම සංවර්ධන කටයුතු සඳහා අවසර දිමේ බලය තිබෙන්නේ නාගරික සංවර්ධන අධිකාරියට. සාමාන්‍යයෙන් මේ ක්‍රියාවලිය සඳහා මධ්‍යම පරිසර අධිකාරිය, ජල සම්පාදන මණ්ඩලය වැනි ආයතන 26 ක් සම්බන්ධ වෙනවා. මෙවැනි සංවර්ධන බලපත්‍රයක් අනුමත කරන්න මීට කලින් වසරක පමණ කාලයක් ගියා. මේ නිසා ශ්‍රී ලංකාවේ ආයෝජනය කිරීමට බලාපොරොත්තු වුණ ආයෝජකයන් අධ්‍යෛර්යමත් වුණා. ඒ වගේම සංවර්ධන ව්‍යාපෘති ක්‍රියාත්මක කිරිමේ දි අනවශ්‍යය ප්‍රමාදයන් ඇතිවුණා.

මේ තත්ත්වය සැලකිල්ලට ගෙන සංවර්ධන බලපත්‍ර කඩිනමින් ලබාදීමේ වැඩසටහනක් අපි ආරම්භ කළා. අපි එය නම් කළේ One Stop Unit ලෙසයි. මෙම ඒකකය අදියර 03ක් යටතේ ක්‍රියාත්මක වෙනවා. පළමු අදියර යටතේ කොළඹ දිස්ත්‍රික්කය තුළත්, දෙවන අදියර යටතේ කොළඹ මහා නගර සභා සීමාව තුළත්, නාගරික සංවර්ධන අධිකාරියේ සියලුම දිස්ත්‍රික් කාර්යාල සහ සියළුම පළාත් පාලන ආයතන ආවරණය වන පරිදිත් ක්‍රියාත්මක කරන්න අපි අපේක්ෂා කරනවා.

වසර ගණනාවක් තිස්සේ ප්‍රමාද වෙචච් වැඩක් තමයි අපි මේ කරන්නේ. අපි කරන දේ හරියට කරන්න ඕනේ. සංවර්ධන ව්‍යාපෘති සඳහා අනුමැතිය ලබා ගැනීමට මීට පෙර වසරකට වැඩි කාලයක් ගතවු බව මා ඔබට කිව්වා. නව ව්‍යාපෘතිය ක්‍රියාත්මක වීමත් සමඟ එය දින 10ත් 21ත් අතර කාලයක් දක්වා අඩු වෙනවා. ඒක ආයෝජකයන්ට විශාල සහනයක් වගේම අපේ රටේ ආයෝජනය කරන්න බලාපොරොත්තුවෙන් ඉන්න අයට දිරි ගැන්වීමක්.

මේ ව්‍යාපෘතියට සමගාමීව නාගරික සංවර්ධන අධිකාරියේ ඉඩම් බැංකුවක් සකස් කිරිමට අපි කටයුතු කරගෙන යනවා. නාගරික සංවර්ධන අධිකාරියට අයත් දිවයිනේ ප්‍රධාන නගර තුළ දැනට උපරිම භාවිතයට යොදාගෙන නොමැති ඉහළ වෙළඳපොළ වටිනාකමක් තියෙන ඉඩම් සහ ගොඩනැගිලි අක්කර 1008 ක් පමණ තියෙනවා. ජාතික සැලැස්මකට අනුව රාජ්‍ය හා පුද්ගලික අංශයේ හවුල්කාරිත්වයෙන් එම ඉඩම් සංවර්ධනය කිරිමට අපි බලාපොරොත්තු වෙනවා.

නාගරික සංවර්ධන අධිකාරිය යටතේ පසුගිය කාලයේ විවිධ ව්‍යාපෘති ක්‍රියාත්මක වුණා. කොවිඩ් වසංගතයත් ආර්ථික අර්බුදයත් නිසා ඇතැම් ව්‍යාපෘති තාවකාලිකව අත්හිටුවන්න අපට සිදුවෙලා තිබෙනවා. නාගරික සංවර්ධන අධිකාරියට තමයි නගර සංවර්ධනය පැවරී තිබෙන්නේ. ප්‍රතිපාදන ගැටළු නිසා අපට මේ සමහර නගර සංවර්ධන කටයුතු ක්‍රියාත්මක කරන්න බැරි වුණා. නමුත් සැළසුම් සකස් කිරීම අපි නතර කළේ නෑ. නාගරික ප්‍රදේශ 272කින් 70කම සැළසුම් මේ වන විට සකස් කර අවසන්. ලබන වසර තුල නාගරික බලප්‍රදේශ 272ම නගර සැළසුම් සකස් කර ඒවා ගැසට් මගින් ප්‍රකාශයට පත් කර අවසන් කරන්න අපි බලාපොරොත්තු වෙනවා. ඒ හැම සංවර්ධන කටයුත්තක්ම සිදුවන්නේ පළාත් පාලන ආයතන හා ප්‍රාදේශීය ලේකම් කාර්යාල සම්බන්ධ කරගෙනයි.

ශ්‍රී ලංකාවේ සියලුම ප්‍රදේශ ආවරණය වන පරිදි කුඩා හා මධ්‍යම ප්‍රමාණයේ නාගරික මධ්‍යස්ථාන 117ක් තෝරා ගෙන ඒවායේ මුලික මහජන අවශ්‍යතා සංවර්ධනය කිරීම සඳහා සියක් නගර වැඩසටහන අපි ක්‍රියාත්මක කළා. හඳුනාගත් නගර 117න් නගර 116ක ව්‍යාපෘති ආරම්භ කර තිබෙනවා. ඉන් නගර 110 ක වැඩ අවසන්. මේ ව්‍යාපෘතිය පිළිබඳ විවිධ ගැටළු තිබෙන්න පුළුවන්. ඒ ගැටළු තිබෙන ප්‍රදේශ අපි හඳුනා ගෙන ඒවා නිවැරදි කිරීමටත් ඉදිරියේදී කටයුතු කරනවා.

මම හැම තිස්සෙම කියන්නෙ අලුත් ව්‍යාපෘති ආරම්භ කරන්න එපා. පරණ ඒවයේ මුදල් ගෙවන්න කටයුතු කරන්න කියලයි. මම පහුගිය දවස්වල මන්නාරම ගියා. බාගෙට හදපු ගොඩනැඟිලි විශාල ප්‍රමාණයක් තියෙනවා. ඒවයේ අනෙකුත් අදියරවලට මුදල් ගෙවන්න බෑ. ඒ නිසා අවසන් ගෙවීම් කරන්න තියෙන නිවාස කොපමණද කියල සංඛ්‍යා‍‍ ලේකනයක් දෙන්න කියල ජනාධිපතිතුමාත් උපදෙස් දී තිබුණා. රජයේ ප්‍රතිපාද කියන්නෙ ජනතාවගේ මුදල්. මේවා නාස්ති වෙන්න දෙන්න බෑ. අපි අලුත් සංඛල්ප හදල මම පොර වෙන්න යන්නෙ නෑ. ඉතිහාසයේ හිටපු ඇමතිවරු කරපු දේවල් ඒ නමින්ම යන්න ඕන. ප්‍රතිපාදනවලට අනුව අලුත් දේවල් කරන්න ඕන කියල මම හැමදාම කියනවා.

ඒ වගේම පවතින ආර්ථික අර්බුදය නිසා තාවකාලිකව නතර වි ඇති නාගරික සංවර්ධන අධිකාරියේ සංවර්ධන ව්‍යාපෘති ලබන වසර මුල වන විට යළි ආරම්භ කිරීමට හැකි වනු ඇතැයි අපි විශ්වාස කරනවා. රටේ පවතින මූල්‍ය අර්බුදය යථා තත්ත්වයට පත් වන තුරු පොදු පහසුකම් සංවර්ධන ව්‍යාපෘති ක්‍රියාත්මක කිරිම සඳහා මහා භාණ්ඩාගාර අරමුදල් භාවිතා කිරීමට අපි බලාපොරොත්තුවන්නේ නෑ. ඒ සඳහා ස්වයං මූල්‍ය ක්‍රමවේදය (Self Financing) භාවිතා කිරීමට අපි බලාපොරොත්තු වෙනවා. පෞද්ගලික අංශයද ඒ වෙනුවෙන් දිරිමත් කිරීමට අපි අපේක්ෂා කරනවා.

රටේ ජනතාව වෙනුවෙන් නිවාස ඉදිකිරිම හා ඒ සඳහා සහාය දිම, පහසුකම් සැපයීම අපේ අමාත්‍යාංශයේ වගකීමක්. හැම ආණ්ඩුවක්ම මේ නිවාස ගැටළු විසඳන්න විවිධ පොරොන්දු දුන්නා. ඒ සඳහා විවිධ සංකල්ප ඉදිරිපත් කළා. ගම් උදාව, ජන සෙවණ වගේ නම් වලින් ඒවා හැඳින්වුවා. නිවාස විෂය පැවරෙන විවිධ ඇමතිවරු තම තමන්ගේ සංකල්ප ක්‍රියාත්මක කරන්න ණය ආධාර වැඩසටහන් අළුතින් හඳුන්වා දුන්නා.

කොවිඩ් වසංගතයත් ආර්ථික අර්බුදයත් නිසා අපි පහුගිය කාලයේ ආරම්භ කරපු මේවගේ ව්‍යාපෘති ගණනාවක් අතරමග නතර කරන්න සිද්ධ වුණා. ලබන ජනවාරි මාසයේ සිට මේ නතර වුණු නිවාස ව්‍යාපෘති ණය සහ ආධාර වැඩසටහන් අපි යළි ආරම්භ කරනවා.

ඒ වගේම එම ව්‍යාපෘති ණය ආධාර වැඩසටහන් අවසන් වෙනතුරු මම නව නිවාස ණය ආධාර හෝ නිවාස ව්‍යාපෘති ආරම්භ කරන්නේ නෑ. තියෙන ව්‍යාපෘති අවසන් කරලා මිසක් අලුතින් වැඩසටහන් හඳුන්වා දෙන්න මගේ සුදානමක් නෑ.

කවුරු ආරම්භ කළත් අපි හොඳ දේ ඉදිරියට ගෙනි යන්න ඕනෑ. දැනට ක්‍රියාත්මක ණය ආධාර සහ ව්‍යාපෘති අවසන් කළාට පස්සේ අපි මේ පිළිබදව නැවත සමාලෝචනයක් කරනවා. එහෙම සමාලෝචනයක් කරලා පසුගිය කාලයේ මේ විෂයය භාරව සිටි මැති ඇමතිවරුන් ක්‍රියාත්මක කළ හොඳ වැඩසටහන් ඉදිරියට ගෙනි යන්න මම බලාපොරොත්තු වෙනවා.

නාගරික සංවර්ධන හා නිවාස ක්ෂේත්‍රය කොවිඩ් වසංගත තත්ත්වය හා ආර්ථික අර්බුදය ඇතිවීමට පෙර තිබු තත්ත්වයටත් වඩා ඉහළ තලයකට ගෙන ඒම තමයි අපේ ඉලක්කය. පවතින ආර්ථික අර්බුදය හමුවේ අපිට ඒ සඳහා විවිධ බාධාවන් තිබෙනවා. අළුත් දේශපාලන සංස්කෘතියක් තුළ අළුත් රටක් හදන්න අපි අළුත් අදහස්වලින් පෝෂණය වෙන්න ඕනේ. නවීන තාක්ෂණය උපයෝගි කරගන්න ඕනේ. අපි නිවාස හා නාගරික සංවර්ධන ක්ෂේත්‍රයට අළුත් අදහස් හා නවීන තාක්ෂණය භාවිතා කරමින් ඉන්නවා.

අපි රට ගොඩනගන්න හදන කොට සමහර අයට ඕන කරලා තියෙනවා අපේ කකුලෙන් අදින්න. කොවිඩ් වසංගතය ආර්ථික අර්බුදය වගේම අරගලය නිසත් අපේ රට ආපස්සට ගියා. අදත් සමහරු උත්සාහ කරනවා නැවත රට තුළ අරගලයේ නාමයෙන් ප්‍රචණ්ඩ ක්‍රියා සිදු කරන්න. යාන්තම් රට යථා තත්ත්වයට පත්වෙමින් තියෙන කොට ආපහු රට තුළ ගිනි අවුලන්න සමහරු උත්සාහ කරනවා. ගෙවල් ගිණි තියලා, කාර්යාල විනාශ කරලා කොහොමද රටක් ගොඩනගන්නේ. සමහර මන්ත්‍රීවරු මේ විවාදවලදීත් අරගලය සාධාරණීකරනය කරනවා. අපි සාමකාමී අරගලවලට විරුද්ධ නෑ. නමුත් ප්‍රජාතන්ත්‍රවාදීව බලයට එන්න බැරි පක්ෂ අරගලය පාවිච්චි කරල රට විනාශ කරනවානම් අපිට ඒකට එකඟ වෙන්න බෑ. අපි කල්පනා කරන්න ඕන රට ගොඩ ගන්න විදියයි.

රනිල් රාජපක්ෂ ආණ්ඩුවක් කියලා විපක්ෂයේ මන්ත්‍රවරුන් චෝදනා කරනවා. හැටනවලක්ෂයක් ඡන්දය දුන් රාජපක්ෂ වාදීන් තමයි අද රනිල් වික්‍රමසිංහට සහයෝගය දක්වන්නේ. ඒ රනිල් වික්‍රමසිංහ හින්දා නොවෙයි. ව්‍යවස්ථානුකුලව හා ප්‍රජාතන්ත්‍රවාදීව පත්වු රටේ ජනාධිපතිවරයා නිසා. එදා ගොඨාභය රාජපක්ෂ ජනාධිපතිවරයා වගකීම් භාර ගන්න කියලා හැම දේශපාලන නායකයෙකුටම ආරාධනා කළ වේලාවේ සජිත් ප්‍රේමදාස මහතා ඉදිරිපත් වුණා නම් මේ ආණ්ඩුව සජිත් රාජපක්ෂ ආණ්ඩුවක් කියයි.

අනුර කුමාර දිසානායක මහතා ඉදිරිපත් වුණා නම් අනුර රාජපක්ෂ ආණ්ඩුවක් කියයි. මම අහන්න කැමතියි බැරි වෙලාවත් අපේ ඩලස් අමාත්‍යතුමා ජනාධිපති වුණා නම් ඒක ඩලස් ප්‍රේමදාස ආණ්ඩුවක් ද කියලා? අපි ජනමතයක් එක්ක ආපු කණ්ඩායමක්. පක්ෂනායකත්වය ඉවත්වුණාම තනතුරු නොගන්න අපි තීරණය කළා. ඒ නිසා තමයි විපක්ෂයට ඇවිල්ලා මේක බාරගන්න කිව්වා.

ඒ නිසා මම කියනවා කරුණාකරලා දැන්වත් මේ දේශපාලන කුහකත්වය අත්හරින්න කියලා. මම ප්‍රායෝගිකව හිතන කෙනෙක්. අද සමහරු කන්නේ එළවළු දෙකක් එක්ක. අපි මේක තේරුම් ගන්න පොළොවෙ පයගහල ජීවත්වෙන්න ඕන. දැන් අරගල කරපු කුඩ්ඩොයි, ගණිකාවොයි කූඩාරම් අස්සට වෙලා කරපු දේවල් දැන් එළිවෙනවා. ලක්ෂ 220ක් නියෝජනය කරන පාර්ලිමේන්තුවෙ ඉන්න අයයි මේ අර්බුදයට විසඳුම් හොයන්න ඕන. කුඩ්ඩෝ කියන දේවල් කරන්න ගියොත් රට ගොඩගන්න බෑ. අපි ගම්මට්ටමෙන් මිනිස්සු එක්ක ඉන්න නිසා ඒ අය සැලසුම් සහගතව ගෙවල් ගිනි තිව්වා. මේ අර්බුදයෙන් රට ගොඩගන්න අපි සියලුම දෙනා එකතු විය යුතුයි.

රටේ තිබෙන ආර්ථික අර්බුදය නිසා ජනතාව දැන් හොඳටම පීඩාවට පත්වෙලා ඉන්නේ. ඒක නතර කිරීමේ වගකිම තියෙන්නෙත් අපිටමයි. ඒ නිසා අපි හැමෝම පක්ෂ පාට බේදයෙන් තොරව එකතුවෙලා වැඩ කරන්න ඕනේ. අපේ අමාත්‍යාංශයට අදාළව පක්ෂ විපක්ෂව ඕනෑම කෙනෙක් ඉදිරිපත් කරන සාධනීය යෝජනා ක්‍රියාත්මක කරන්න මම ඉතා කැමැත්තෙන් සිටින බව අවධාරණය කරනවා.

– ප්‍රදීප් අනුර කුමාර

ගෝඨාභය කියන්නෙ ජනාධිපතිකමක් දරන්න තරම් නායකත්ව පෞරුෂයක් තියෙන කෙනෙකු නෙමෙයි. ඔහුට කලින් ජනාධිපති වූ සිරිසේන පවා ජාමෙ බේරගන්න හැටිවත් දැනගෙන හිටියා. ගෝටා ගැන කියන්න පුළුවන් සිංදු කෑල්ලක් කපුගේගෙ සිංදුවක තියෙනවා.

“ඇයත් නොදන්නිය ඇය යන මානය
උන් හිටි තැන් මතකය අඩමානය
පාර කියන්නේ කෙලෙසද මා හට
ඇයටද පාරක් ඇති නැති ගානය”

ඔහු ඉතාම වැදගත් කාල පරිච්ඡේදයකදී ඉතාම මුග්ධ විදියට ශ්‍රී ලංකා රාජ්‍යය කළමනාකරණය කළා. හැබැයි, ඔහුගේ වැරදිි කළමනාකරණයට මේ රටේ විශාල පිරිසක් උඩගෙඩි දුන්නා. ඔහු වැරදියි කියපු තවත් බොහෝදෙනෙකු පෙන්වාදුන්නෙ ඊටත් වඩා වැරදි පාරවල්.

කෙසේ වෙතත්, ජනාධිපතිවරයකු ලෙස ඔහු දේශපාලනයෙදි බොළඳ විදියට ප්‍රජාතන්ත්‍රවාදී වුණා. අවසානයේදී ලෝකයටම වැරදි පූර්වාදර්ශ සපයන්නට ලංකාවේ දේශපාලන අන්තවාදීන්ට අවස්ථාව උදාකර දුන්නා. මැයි 9, ජුලි 9 ත්‍රස්තවාදී ක්‍රියා ගැන ප්‍රසිද්ධියේ කයිවාරු ගහන්න වාමාංශික අන්තවාදීන්ට තවමත් හැකියාව තියෙන්නෙ ඒ නිසා.

පාස්කු ප්‍රහාරයෙදි දුන්න වගේ තමයි තොපිට දෙන්නෙ කියල මුස්ලිම් අන්තවාදීන් තර්ජනය කරන තත්වයක් ඉන් පසුවත් තිබුණා නම් ඔබ මොකක්ද කරන්නෙ? හැබැයි, මැයි 9, ජුලි 9 ත්‍රස්තවාදීන් අදත් පකුං දානවා තොපිට මෙහෙමයි දෙන්නෙ කියලා. ඒ විතරක් නෙමෙයි, ඒ ත්‍රස්තවාදය හා ත්‍රස්තවාදීන් වෙනුවෙන් සමහරු විවෘතවම පෙනීඉන්නවා.

ඔය ප්‍රචණ්ඩ මොබ් යොදවලා පාර්ලිමේන්තුව දක්වා තැන් අල්ලගන්න හැකියාව 2018 පෙබරවාරි පළාත් පාලන මැතිවරණයෙන් පසු පොහොට්ටුවට තිබුණා. ඒත් කළේ නැහැ. දැන් එහෙම නැහැ. ඒක ආණ්ඩු වෙනස් කරන ක්‍රමයක් බවට පත්වෙලා. රටේ ප්‍රජාතන්ත්‍රවාදය මේ තරම් ගැටලු සහගත තත්වයකට පත්වුණේ ගෝටාගේ නායකත්ව ගැටලු නිසා.

කොයි තරම් අඩපාඩු තිබුණත් ඔහු මේ රටේ ඡන්දයෙන් පත්වුණ ජනාධිපතිවරයෙක්. ඔහුව බියපත් කරලායි නෙරපුවේ. ඒකත් අවසානයෙදි ඉල්ලා අස්වීමක්.

ඔහුු වැරදි කර තිබෙනවා නම්, ඔහුට එරෙහිව සාධාරණ විමර්ශනයක් හා නීත්‍යානුකූලව කටයුතු කිරීම අවශ්‍යයි. එහෙත්, ඔහුට මේ රටට එන්නට කිසිම බාධාවක් නැහැ. හිටපු ජනාධිපතිවරයකු ලෙස ඔහුට ආරක්ෂාව සැලසීම රජයේ වගකීමක්.

– අජිත් පැරකුම් ජයසිංහ, Praja.lk

ගාලු මුවදොර විරෝධතාකරුවන් අද දවසේ ජනාධිපති ලේකම් කාර්‍යාලයෙන් ඉවත් වෙනවා යැයි දැනුම් දී තිබියදීත්, එහෙම ඉවත් වෙන්න පැය 12කට කලින් විරෝධතාකරුවන්ට ගසා පැන්නුවේ ඇයිද කියන එක මේ මොහොතේ බොහෝ දෙනෙකු උත්තර හොයන ප්‍රශ්නයයි.

මේ මොහොතේ දේශපාලනය තේරුම් ගන්න නම් මුලින් ම ඒ කාරණය decode කරගත යුතු වෙනවා.
යම් හෙයකින් අද සවස 2ට විරෝධතාකරුවන් ජනාධිපති ලේකම් කාර්‍යාලය භාරදුන්නා නම් ඔවුන් එය භාර දෙන්නේ ජයග්‍රාහී ලීලාවකිනුයි.

ඔවුන් උත්සවාකාරයෙන් එම ගොඩනැගිලි භාර දී, ප්‍රවෘත්ති සාකච්ඡාවක් ද පවත්වා, ආණ්ඩුවට අනතුරු හැඟවීමක් ද සිදුකොට, අවසානයේ “කපා කපා කෑලි කපා – අප වළකනු සිතනු එපා” වගේ සටන් පාඨ කියමින් ජයග්‍රාහී ලෙස එම ස්ථානයෙන් ඉවත් වෙනවා.

එතැනින් එහාට ගාලු මුවදොර අරගලය තිබුණත් නැතත් මේ විරෝධතාකරුවන් දේශපාලනයට ප්‍රබල විදියට මැදිහත් වෙන්න පටන් ගන්නවා. බලපෑම් එල්ල කරනවා. ඉල්ලීම් ඉදිරිපත් කරනවා. අනතුරු හඟවනවා. ඔවුන් වටා විශාල සමාජ බලයක් ගොඩනැගෙනවා.

ඒ වෙනුවට ඊයේ රාත්‍රියේ සිදුවුණේ හමුදාව සහ පොලීසිය දමා බල්ලන් බළලුන්ට පහර දෙන අන්දමට පහර දී විරෝධතාකරුවන් ජනාධිපති ලේකම් කාර්‍යාල පරිශ්‍රයෙන් පන්නා දැමීමයි.

මේ අනපේක්ෂිත ප්‍රහාරය එල්ල කිරීමේ අරමුණ ම “ගාලු මුවදොර විරෝධතාකරුවන්” කියන සාධකය දේශපාලන සමීකරණයෙන් ඉවත් කිරීමයි. “අරගලකරුවන්” කියන සාධකය සම්පූර්ණයෙන් ම නිශේධනය කිරීමයි.

රනිල් ට මෙතැන් සිට තමන්ගේ බලය තහවුරු කරගන්න නම් ‘ගාලු මුවදොර විරෝධතාකරුවන්’ කියන සාධකය සමීකරණයෙන් ඉවත් කිරීම අත්‍යවශ්‍ය වනවා. මේක ගෝඨාභයගේ කාලයේ විරෝධතාකරුවන්ට ජල ප්‍රහාර හෝ කඳුළු ගෑස් එල්ල කොට ඔවුන් විසුරුවා හරින්නට උත්සාහ කරනවා වගේ වැඩක් නෙවෙයි.

මේක ඉතා ම සූක්ෂ්මව ගණනය කිරීම් සිදුකොට එල්ල කරන ලද දේශපාලනික ප්‍රහාරයක්. ඇත්තට ම පාර්ලිමේන්තුවේ මන්ත්‍රීවරුන් 134 දෙනෙකු ම රනිල් වික්‍රමසිංහට ඡන්දය ලබා දී ඔහු පැහැදිලි බහුතරයකින් ජනාධිපති තනතුරට පත් කරගත්තේ මේ වෙනුවෙන් ම තමයි.

මහින්දලාට, ජොන්ස්ටන්ලාට කළ හැකි ලොකු ම දෙය මැරයන් පිරිසක් අරලිය ගහ මන්දිරයට ගෙන්නාගෙන, උන්ට බඩ පිරෙන්නට කන්නට බොන්නට දී, අරගලකරුන්ට පහර දෙන්නට උසි ගන්වා ගාලු මුවදොරට මුදාහැරීම විතරයි.

ඒත් රනිල් ක්‍රීඩා කරන්නේ ඊට වඩා හුඟක් වෙනස් තලයකයි. ඒ නිසා මහින්දලා, ගෝඨාභයලා පය ගසන්නට බය වූ හුඟක් තැන්වල රනිල් පය ගසනවා. මර්දනය වෙනුවෙන් මහින්දලා, ගෝඨාභයලා යන්නට හීනෙන්වත් නොසිතූ දුරක් රනිල් ගමන් කරනවා. ඒ නිසා ගෝඨාභයට හෝ මහින්දට එරෙහිව දක්වන ලද බොහෝ ප්‍රතිරෝධයන් රනිල්ට ඒ විදියට ම වලංගු වෙන්නේ නැහැ. තමන් ජීවත් වූ ගෙදරත් අහිමිව තිබෙන නිසා රනිල්ට තවත් නැතිවන්නට දෙයකුත් නැහැ.

ඒ නිසා හැඟීම්බර ප්‍රතිචාර දැක්වීම්වලට නොයා “රනිල්” කියන ප්‍රශ්නයට දේශපාලනිකව පිළිතුරු සෙවිය යුතුයි.
හැඟීම්බර ප්‍රතිචාර දැක්වීම් කියන්නේ මේ මොහොතේ විනාශයට අතවැනීමක්. විනාශය කැඳවා ගන්නවා කියන්නේ ක්‍රීඩාව එතැනින් නතර වෙනවා (game over) කියන එකයි.

මේ මොහොතේ කළ යුතු වැදගත් ම දෙය ක්‍රීඩාව නතර කර නොගෙන දිගට ම තරගයේ රැඳී සිටීමයි.
ඒ නිසා මා නැවතත් මෙතැන කියන්නේ රනිල් ජනාධිපතිධූරයට පත්වුණු මොහොතේ කියපු කතාවමයි.

රනිල් ගෙදර යවන්නට හිතාගෙන “රනිල් ගෝ හෝම්” හෑෂ්ටැග් හැදීමත්, ගම්මාන හැදීමත්, හන්දි ගාණේ විරෝධතා පැවැත්වීමත් ලොකු තේරුමක් තියෙන වැඩ කියලා මම හිතන්නේ නැහැ. 88-89 කැරැල්ල මර්දනයේ ප්‍රමුඛ භූමිකාවක් නිරූපණය කරපු අයගෙන් දැනට ඉතිරිව සිටින එක ම සක්‍රීය දේශපාලනඥයා වන රනිල්ට එවැනි දේවල් කූඹියෙකු කනවා තරම් හෝ දැනෙනවා යැයි මා සිතන්නේ නැහැ.

මේ මොහොතේ අප අවධානය යොමු කළ යුතු ප්‍රධානත ම දෙය ප්‍රජාතන්ත්‍රවාදය සඳහා වන පුළුල් බහුජන ව්‍යාපාරයක් නිර්මාණය කිරීමයි.

මේක යූටියුබ්කරුවන්, නළු නිළියන්, දේශපාලනය විඥානයක් නැති ළමා ළපටින් නොව දේශපාලන පරිචයක් සහිත මිනිසුන් විසින් පෙරමුණ ගෙන සිදු කළ යුතු අතිශයින් ම දේශපාලනික ව්‍යාපෘතියක්. ඒ වගේ ම, පාර්ලිමේන්තු ක්‍රමය, ආණ්ඩුක්‍රම ව්‍යවස්ථාව හෝ ප්‍රජාතන්ත්‍රවාදය විශ්වාස නොකරන අරාජිකවාදීන් සමග මේ කිසිවක් ඉදිරියට ගෙනයන්නට බැරි බවත් අප තේරුම් ගත යුතුයි.

මා සිතන්නේ සජිත්ට මේ වෙලාවේ කළ යුත්තේ කුමක්දැයි තේරෙන්නේ නැත්නම් අඩු තරමින් ඩලස්, චම්පික වැනි 88-89 අත්දැකීම් ද සහිතව දේශපාලනයට පැමිණි පරපුරට මෙතැනදී පාර්ලිමේන්තුව තුළත් එයින් පිටතත් විශාල කාර්‍යභාරයක් ඉටු කළ හැකියි. ඔවුන් පාර්ලිමේන්තුව තුළ විපක්ෂයේ කාර්‍යභාරය තමන් අතට ගත යුතුයි.

මෙයින් ක්ෂණික ප්‍රතිඵල නොලැබෙන්නට පුළුවන්. එහෙත් මෙවැනි වැඩපිළිවෙලක් තුළ කාලයත් සමග ක්‍රමිකව පීඩනය ගොඩනැගිය යුතුයි. දැන් රනිල් චෙස් ක්‍රීඩා කරනවා. ඔහු ඔහුගේ මුල් ම ඉත්තන් ඇද තිබෙනවා. එය දැක කලබල වී බෝඩ් එකත් පෙරළාගෙන බිම වැටෙන්නේ නැතිව, අප අපේ පියවර විධිමත්ව සැලසුම් කළ යුතුයි.

රසික ජයකොඩි
22 – 07 – 2022

මේ සටහන අද අවසන් ගමන් යන ගෝමින් දයාසිරි වෙනුවෙන්. ගෝමින්ගේ පියා සිංහල බෞද්ධ ජාතිකවාදියකු වූ එන් ක්‍යු ඩයස් හෙවත් නීල් ක්වින්ටස් ඩයස්. පාණදුරේ උපත ලත් එන් ක්‍යු අධ්‍යාපනය ලබා ඇත්තේ ත්‍රිත්ව විද්‍යාලයෙහි. එකල තිබූ ලංකා සිවිල් සේවයට (CCS) බැඳුණු ඔහු ආනන්දයේ මෙත්තානන්ද මහතා සමග සමීප ව වැඩ කළා.

සිවිල් සේවකයකු වූ එන් ක්‍යු ඩයස් ජාතික ඇඳුමින් සැරසී සිටියා. අබෞද්ධයන්ගේ පාරාදිසයක් වූ ලංකා යුද්ධ හමුදාවට සිංහල බෞද්ධයන් බඳවා ගැනීමට කටයුතු කරන ලද්දේ එන් ක්‍යු හා මෙත්තානන්ද විසින්. එන් ක්‍යු ඩයස් ආරක්‍ෂක ලේකම් ව සිටිය දි ආනන්ද නාලන්ද ආදී පාසල්වලින් හමුදාවට බඳවා ගත්තා. මා හිතන්නේ එසේ නොවන්නට හමුදාව අබෞද්ධ නායකත්වයක් යටතේ දිගින් දිගට ම තිබිණි නම් අපට නන්දිකඩාල් ජයග්‍රහණය අත්පත් කර ගැනීමට නොහැකි වීමට තිබුණු බවයි. බණ්ඩාරනායක මැතිණියගේ ආණ්ඩුවට විරුද්ධ ව 1962 හමුදා පොලිස් කුමන්ත්‍රණය මෙහෙයවූයේ අබෞද්ධයන් බව අමතක නොකළ යුතුයි.

ගෝමින් දයාසිරි සම්ප්‍රදායනුකූල ව නම් ගෝමින් ඩයස් විය යුතුව තිබුණා. එහෙත් සිංහල බෞද්ධ ජාතිකවාදියකු වූ ඔහුගේ පියා ඩයස් නම අත්හැර දයාසිරි නම පුතාට යොදා ගෙන තියෙනවා. එමෙන් ම ත්‍රිත්ව විද්‍යාලයේ උගත් ඔහු තම පුතා ශාන්ත තෝමස් විදුහලට ඇතුළත් නොකර ආනන්ද විදුහලට ඇතුළත් කර තිබෙනවා. එය ගෝමින්ගේ මවට හිත් වේදනා දුන්නා කියනවා. ඇය ශාන්ත තෝමස් විදුහලට සම්බන්ධ ඥාතීන් සිටි අයෙක්. එකල ආනන්ද විදුහල සැලකුණේ ට්‍රෑම් රථයෙන් පාසල් ගිය සිසුන් සිටි දෙවැනි පංතියේ පාසලක් ලෙස. ගෝමින්ගේ මවත් ඇගේ ඥාතීනුත් ගෝමින් ආනන්දයට ඇතුළත් කිරීම මෝඩ වැඩක් ලෙස සලකා තියෙනවා. ගෝමින් ඒ බව පුවත්පතකට ලියූ ලිපියක සඳහන කර තියෙනවා. ත්‍රිත්ව විදුහලට ගිය ගෝමින්ගේ පියා ගෝමින් ආනන්දයට ඇතුළත් කළත් ආනන්දයේ ඉගෙන ගත් ඇතැමුන් තම පුතුන් රාජකීය විදුහලට ඇතුළත් කළ බව අමතක නොකළ යුතුයි.

මා ගෝමින් හඳුනා ගත්තේ ජාතික ව්‍යාපාරයෙහි යෙදීමේ ප්‍රතිඵලයක් ලෙස. ඔහු වෘත්තියෙන් නීතිවේදියෙක් වුණා. නීතිඥයන් බොහෝ විට ඒ ඒ උසාවිවිල කටයුතු කරනවා. ඇතැම් නීතිඥයන් කටයුතු කරන්නේ ඉහළ උසාවිවල පමණයි. එහෙත් ගෝමින් කම්කරු උසාවියේ සිට ශ්‍රෙෂ්ඨාධිකරණය දක්වා වූ සෑම උසාවියක ම කටයුතු කර තියෙනවා. මා කොළඹ විශ්වවිද්‍යාලයට විරුද්ධ ව කම්කරු උසාවියේ නඩු කී දිනවල මට ගෝමින් එහි හමු වී තියෙනවා. ඔහු සුපුරුදු සිනහවෙන් ඇහුවේ කොහොමද නඩුව කියා. කම්කරු උසාවියේ මා වෙනුවෙන් පෙනී සිටියේ තවත් සිංහල ජාතිකවාදියකු වූ එස් එල් ගුණසේකර. ඔහුගේ සහායට සිංහල ජාතිකවාදීන් වූ තිස්ස යාපා හා කණිෂ්ක විතාරණ සිටියා. ඔවුන් සියල්ලන් ම පෙනී සිටියේ නොමිළයේ. එස් එල් ද ගෝමින් මෙන් ම සෑම උසාවියක ම පෙනී සිටියා.

ගෝමින් උසාවිවල සිංහල ජාතිකත්වය වෙනුවෙන් නඩු රාශියක ම පෙනී සිටියා. ඔහු පෙනී සිටි වැදගත් ම නඩුව වූයේ උතුරු හා නැගෙනහිර පළාත් වෙන් කිරීම සඳහා වූ නඩුවයි. ඒ පළාත් දෙමළ ජනයාගේ ඊනියා නිජභූමි ලෙස සලකමින් ඉන්දියාවේ අවශ්‍යතාවට එක් කර තිබුණා. මේ නිජභූමි කතාව පට්ටපල් බොරුවක්. ලංකාව පළාත් නවයකට අවසාන වශයෙන් බෙදා වෙන් කෙරුණේ 1889 දී. එනම් ආනන්ද විදුහල ද ඇති කර අවුරුදු තුනකට පසුව. මට මතක හැටියට මා ආනන්ද විදුහලේ පැවැත්වූ කතාවක ඒ බව සඳහන් කළා. එසේ ඇති කරන ලද උතුරු හා නැගෙනහිර පළාත්වල පදංචි කෙරුණේ දෙමළ කතා කළත් වෙන ම ජන කොටස්. උතුරු පළාතේ හරියට ම කියනවා නම් අලිමංකඩින් එහා දෙමළ කතා කරන වෙල්ලාලයන් ප්‍රධාන වශයෙන් ම පදිංචි කරනු ලැබුයේ ලන්දේසීන් විසින්. පහුගිය කාලයේ නෙදර්ලන්ත ව්‍යාපෘතියක් මගින් මේ සම්බන්ධ තොරතුරු වෙනස් කිරීමට උත්සාහයක් ගත්තා. වාසනාවකට එයට මුල් වූ තැනැත්තිය අද රාජ්‍ය ලේඛනාගාරයෙන් මාරු කරලා.

අලිමංකඩ හරහා තමයි සිංහලයන් අලි ඇතුන් පිටරට යවන්න කටයුතු කර තියෙන්නෙ. 1956 තරම් මෑත කාලයකත් දෙමළ කතා කරන ජනයා අලිමංකඩෙන් දකණට පැමිණීමට කැමති වූයේ නැහැ. ඉරණමඩු ව්‍යාපෘතියේ ඉඩම් බෙදා දීමට ඉල්ලුම් පත් කැඳවූ අවස්ථාවේ දෙමළ කතා කරන ජනයා ඉල්ලුම් කෙළේ නැහැ. තම ඊනියා නිජභූමියට ඒමට ඔවුන් අකමැති වෙලා! නිජභූමි කතාව පසුව ඇති කර ගත් කෙප්පයක්. ඔවුන් කොළඹ පැමිණීම වෙන ම කතාවක්. ඒ ඉංගිරිසින් යටතේ රැකියා කිරීමට. අනෙක් අතට වත්මන් නැගෙනහිර පළාතේ දෙමළ කතාකරන ජන කොටසක් පදිංචි කරනු ලැබුයේ ඉංගිරිසින් විසින්. දෙමළ කතා කළත් ඔවුන් වෙනස් ජන කොටස්. යාපනයේ වෙල්ලාලයන් නැගෙනහිර දෙමළ කතා කරන ජනයා කුලහීනයන් ලෙසයි සලකන්නේ. එසේ තිබිය දී ඒ පළාත් දෙක එකතු කර දෙමළ ජනවර්ගයක ඊනියා නිජභූමියක් ලෙස සැලකීම යාපන විශ්වවිද්‍යාලයේ ඉතිහාසය පිළිබඳ පළමු මහාචාර්යවරයා කාර්තිගේසු ඉන්ද්‍රපාලගේ මතයටත් විරුද්ධයි.

උතුරු හා නැගෙනහිර පළාත් එක් කිරීමට විරුද්ධ ව පවරා තිබූ නඩුවේ නීතිිඥයන් වූයේ එච් එල් ද සිල්වා, එස් එල් ගුණසේකර හා ගෝමින් දයාසිරියි. අධිකරණ තීන්දුව පළාත් දෙක වෙන් කිරීමට පක්‍ෂව දුන්නේ. එය ඓතිහාසික නඩු තීන්දුවක්. ගෝමින් හැරුණු විට අනෙක් නීතිඥයන් දෙදෙනා බෞද්ධයන් නොවු බවත් මෙහි සඳහන් කළ යුතුයි. අද ඒ තිදෙනා ම ජීවතුන් අතර නැහැ. එහෙත් ඒ තිදෙනා නොවන්නට රටේ ඉතිහාසය වෙනස් වෙන්න තිබුණා.

කෙසේ වෙතත් උතුරු පළාත හා නැගෙනහිර පළාත අද වෙන් වී ඇත්තේ නඩු තීන්දුවකින්. එච් එල්, එස් එල් හා ගෝමින්ට අපට කළ හැකි හොඳම උපහාරය ඒ නඩු තීන්දුව පනතක් මගින් තහවුරු කිරීමයි.

ආචාර්ය නලින් ද සිල්වා

කළු හිජාබය හෝ අබාය සෞදි කාන්තා ඇඳුමෙහි තව දුරටත් අනිවාර්ය නොවන බව සෞදි රජු මොහොමඩ් බින් සල්මාන් පවසයි.

කාන්තාවන්ට වාහන ධාවනය සඳහා මෙන් ම පිරිමි සමග ප්‍රසිද්ධ ක්‍රීඩා තරඟ නැරඹී අවස්ථාව ද ලබා දීම ද සෞදි රජු තීරණය කර තිබේ.

කාන්තාවන් ද පිරිමි මෙන් ම ගෞරවණීය ලෙස ඇඳුම් ඇඳිය යුතු බව ෂාරියා නීතියෙහි සඳහන් වුව ද කළු හිජාබය හෝ අබාය අනිවාර්ය නොවන බවත් සෞදි කාන්තාවන්ට ඔබින ඇඳුම් ඇඳීමේ අයිතිය හිමි වන බවත් සඳහන් වෙයි.

ගැහැනු පිරිමි සියලු දෙනා මිනිසුන් බවත් ගැහැනු පිරිමි එක සමාන අයිතිවාසිකම් ඇති බවත් මොහොමඩ් බින් සල්මාන් රජු වැඩි දුරටත් ප්‍රකාශ කරයි.

මුල් ලිපිය

https://www.pressreader.com/uae/khaleej-times/20180320/281496456816630

හිටපු අමාත්‍ය මංගල සමරවී පෞද්ගලික රෝහලක දී අභාවප්‍රාප්ත වී තිබේ.

කොවිඩ් ආසාදිතව ඔහු දැඩි සත්කාර ඒකකයක ප්‍රතිකාර ලබමින් සිටියේ ය.

මංගල සමරවීර පසුගිය රජයේ විදේශ කටයුතු ඇමැතිවරයා ලෙස මෙන් ම මුදල් ඇමැතිවරයා ලෙස ද කටයුතු කළේය.

ශ්‍රේෂ්ඨාධිකරණයේ තීරණ පාර්ලිමේන්තුවට සිංහල භාෂාවෙන් ද ලබා දෙන ලෙස ශ්‍රී ලංකා පොදුජන පෙරමුණු මන්ත්‍රි ගෙවිඳු කුමාරතුංග කතානායකවරයාගෙන් අද (17) ඉල්ලීමක් කළේය.

ශ්‍රේෂ්ඨාධිකරණය සිය තීරණ මැතිසබයට ලබා දෙන්නේ ඉංග්‍රීසි භාෂාවෙන් පමණක් බවත් එම තීරණ මව භාෂාවෙන් ලබා නොදීම ආණ්ඩුක්‍රම ව්‍යවස්ථාවට පටහැනි බවත් හෙතෙම සඳහන් කළේය.

එසේම එලෙස කටයුතු කිරීම මන්ත්‍රීවරුන්ගේ වරප්‍රසාද උල්ලංඝනය වීමක් යැයි ද ගෙවිඳු කුමාරතුංග අවධාරණය කළේ ය.

අධිකරණ ඇමතිතුමා ඒ සඳහා මැදිහත් නොවන්නේ නම් නිලධාරීන් මාර්ගයෙන් සිංහල පිටපතක් ලබා දීමට කටයුතු කරන ලෙස ඔහු කතානායකවරයාගෙන් ද ඉල්ලා සිටියේ ය.

විසිවෙනි සංශෝධනය සහ වරාය නගර පනත් කෙටුම්පත පිළිබඳ ශ්‍රේෂ්ඨාධිකරණ තීරණ පාර්ලිමේන්තුවට දැනුම් දුන්නේ ද ඉංග්‍රීසි භාෂාවෙන් පමණක් බව ගෙවිඳු කුමාරතුංග සඳහන් කළේ ය.

එහි දී අධිකරණ අමාත්‍ය ජනාධිපති නීතිඥ අලි සබ්රි සඳහන් කළේ තමන් ඉදිරිපත් කළේ ශ්‍රේෂ්ඨාධිකරණය ලබා දුන් පිටපත බවත් ශ්‍රේෂ්ඨාධිකරණය නඩු අහන්නේ ද ඉංග්‍රීසි භාෂාවෙන් බවත් ය. එම ඉල්ලීම පිළිබඳ ශ්‍රේෂ්ඨාධිකරණයට දැනුම් දෙන බව ද අලි සබ්රි පැවසුවේ ය.

ආනයනය කරන ලද පොල්තෙල්වල පිළිකාකාරක අඩංගු බව දේශීය පොල්තෙල් ව්‍යාපාරිකයෝ පිරිසක් කළ ප්‍රකාශය නිසා බොහෝ පිරිසක් සිටින්නේ බියෙනි. ඒ අතරේ රේගු අධ්‍යක්ෂ ජෙනරාල් විශ්‍රාමික මේජර් ජනරාල් ජී.වී. රවිප්‍රිය කීවේ පිරිපහදු නොකළ පොල්තෙල් කිලෝග්‍රෑම් එක් ලක්ෂ අසූ තුන්දහසක් අඩංගු බහාලුම් දහතුනකුත් හමුවූ බවය. මෙම පොල්තෙල් තොගය ආනයනය කර ඇත්තේ මෙරට ප්‍රමුඛ පෙළේ සමාගම් තුනක් විසිනි. ඒ අලි බ්‍රදර්ස් පුද්ගලික සමාගම, එදිරිසිංහ එජාබල් ඔයිල්ස් සහ කටාන පිරිපහදුවයි. මේ සමාගම් අතරින්ද අලි බ්‍රදර්ස් පුද්ගලික සමාගම වසර විස්සක සිට මෙරටට පොල්තෙල් ආනයනය කරන සමාගමකි. ඇත්තටම මේ සමාගම ආනයනය කළ පොල්තෙල්වල පිළිකාකාරක තිබෙනවාද. අපි ඒ ගැන අලි බ්‍රදර්ස් පුද්ගලික සමාගමේ කළමනාකාර අධ්‍යක්ෂ නසීම් අසාද් අලිගෙන් ප්‍රශ්න කළෙමු.

පිළිකාකාරක පොල්තෙල් ලංකාවට ගෙන්වීම සම්බන්ධයෙන් ඔබේ ආයතනයටත් චෝදනා එල්ල වෙනවා?

ඔව්, හැමතැනම කතාවෙන්නේ අපි රටේ මිනිස්සුන්ට කන්න දෙන්න පිළිකාකාරක පොල්තෙල් ගෙනාවා කියලා.

ඒක ඇත්තක්ද?

නැහැ, ඒක අමූලික බොරුවක්.

ඒත් ශ්‍රී ලංකා ප්‍රමිති ආයතනයෙනුත් ආහාර හා ආරක්ෂණ ඒකකයෙනුත් ඔබේ ආයතනය පිළිකාකාරක පොල්තෙල් ගෙන්වූ බවට වාර්තාවක් නිකුත් කර තිබෙන පසුබිමක ඒ කතාව බොරු කියල කියන්නෙ කොහොමද?

ඔව්, ඔවුන් එහෙම දෙයක් කියලා තියෙනවා. මොකද අපි මේ ලංකාවට ගෙනාවේ “අශුද්ධ පොල්තෙල්”. ඒවා ලංකාවට ගේන බොරතෙල්වලට සමානයි. අපි බොරතෙල් ආනයනය කළාම ඒවා බොරතෙල් විදිහටම පාවිච්චි කරන්නේ නැහැනේ. ඒවා පිරිපහදු කරලා ඒකේ තියෙන අපද්‍රව්‍ය ඉවත් කළාට පස්සේ තමයි අපිට අවශ්‍ය වෙන ඩීසල්, පෙට්‍රල්, භූමිතෙල් නිෂ්පාදනය කරන්නේ. මේ විදිහටම තමයි අපි ලංකාවට ගෙනාපු “අශුද්ධ පොල්තෙලුත්” පිරිපහදු කරන්නේ. එහෙම නැතිව, ගෙනාපු ගමන්ම බෝතල්වලට දාලා වෙළඳපොළට නිකුත් කරන්නේ නැහැ. ඒවාට නිසි ක්‍රමවේදයක්, ප්‍රමිතියක් තියෙනවා. ඒ නිසා බය නැතුව කියන්න පුළුවන් අපි වෙළෙඳපොළට නිකුත් කරන කිසිම පොල්තෙල් වර්ගයක “ඇෆ්ලටොක්සින්” කියන පිළිකා කාරකය අඩංගු නැහැ කියලා.

ඔබ මේ ගැන වගකීමෙන්ද කියන්නේ?

ඔව්, සියයට දෙසීයක්ම වගකීමෙන් කියන්නේ. අපේ පොල්තෙල්වල මිනිස් ශරීරයට අහිතකර කිසිදු පිළිකාකාරකයක් හෝ රසායන ද්‍රව්‍යයක් අඩංගු නැහැ. කවුරු හරි අපේ පොල්තෙල්වල ‘ඇෆ්ලටොක්සින්’ කියන පිළිකාකාරකය අඩංගුයි කියලා ඔප්පු කළොත් ඔවුන්ට පුළුවන් අපිට විරුද්ධව ඕනෑම නීතිමය පියවරක් ගන්න. ඒකට අපේ කිසිදු අකැමැත්තක් නැහැ.

එතකොට ඇයි ඔබේ ආයතනයේ පොල්තෙල් රේගුව මගින් සීල් තියලා ප්‍රතිඅපනයනය කරන්න නියෝග කළේ?

ඒක තමයි අපිටත් තියන ප්‍රශ්නය. අපි අවුරුදු විස්සක ඉඳලා තමයි ලංකාවට පොල්තෙල්, ෆාම්තෙල් සහ අනෙකුත් තෙල් වර්ග ගෙන්නන්නේ. අපේ අවුරුදු විස්සක පළපුරුද්දෙ හැටියට මේ පළමු වතාව අපේ තෙල් කන්ටේනරයක් ප්‍රතිඅපනයනය කරන්න කියපු. ඒ වගේම අපි අද ගෙනාපු තෙල් ටැංකිම තමයි එදත් ගෙනාවේ. එදා නොතිබුණු ප්‍රමිතියේ ගැටලු අද තියෙන්නේ කොහොමද? අපි මේ දේවල් කරන්නේ අද ඊයෙක ඉඳලා නෙවෙයි. අපි අපේ රටට බොහොම ආදරෙයි. ඉතින්, අපි කැමැතිද අපේ මිනිස්සුන්ට විෂ කවන්න.

ඒ කියන්නේ ඔබ ආනයනය කළ “අශුද්ධ පොල්තෙල්” වලවත් “ඇෆ්ලටොක්සින්” කියන පිළිකාකාරකය අඩංගු නැද්ද?

මෙහෙමයි, අපි ආනයනය කළේ “අශුද්ධ පොල්තෙල්”. ඒවායේ ඇෆ්ලටොක්සින් වර්ග හතරම වගේම පොලිසයික්ලික් ඇරෝමැටික හයිඩ්‍රොකාබන්, ෆැටි ඇසිට්, සිට්‍රික් ඇසිට්, වතුර සහ විවිධ වර්ගයේ යකඩ අංශු වගේ දේවලුත් මේ කියන “අශුද්ධ පොල්තෙල්” වල අඩංගු වෙලා තියනවා. මේවම තමා අපි මිට අවුරුදු ගාණකට කලිනුත් ගෙනාවේ. අනික රජය මඟින් අපිට අවසර දීලා තියෙනවා “අශුද්ධ පොල්තෙල්” ගෙන්නන්න.

එත් වෛද්‍ය මතය වන්නේ කිසිම විදිහකට මේ පිළිකා කාරකය පොල්තෙල්වලින් ඉවත් කරන්න බැහැ කියලයි?

ඒක බොරු කතාවක්. අපි ජීවත් වෙන්නේ හඳට යන්න රොකට් හදන, හඳට ගිය මිනිස්සු ඉන්න කාලෙක. ඉතින්, අපිට බැරිද මේ පිළිකා කාරක අයින් කරලා මිනිසුන්ට පිරිසිදු පොල්තෙල් ටිකක් දෙන්න.

ඒ කියන්නේ පිළිකා කාරක ඉවත් කරන්න පුළුවන්?

ඔව්, සියයට සියයක්ම පුළුවන්. අපේ පොල්තෙල් ඕනෑම ආයතනයකට දීලා පරීක්ෂා කරලා බලන්න. ඒ පොල්තෙල් වල ඇෆ්ලටොක්සින් කියන පිළිකා කාරකය ඇත්තෙම නැහැ. අපි අපේ පොල්තෙල් පිරිපහදු කරන ක්‍රමවේදයක් තියනවා. මුලින්ම මේ “අශුද්ධ පොල්තෙල්” වලට අපි විරංජන කුඩු (බිලිචින්) එකතු කරනවා. ඊට පස්සේ පොස්පරික් ඇසිට්, බිලිචින් අර්ත් කියන මැටි විශේෂය අඩංගු කුඩු සහ සක්‍රීය කාබන් එකතු කරනවා. මේ සියල්ලම සෙල්සියස් අංශක එකසිය දහයේදී රත් කරලා යන්ත්‍රානුසාරයෙන් පෙරීමකට ලක්කරනවා. එතකොට කලින් අපි එකතු කරපු රසායන ද්‍රව්‍යත් මේ ක්‍රමවේදයේදී පෙරිලා යනවා.

ඒ විතරක් නෙවෙයි අයෙත් සෙල්සියස් අංශක දෙසිය හතළිහට මේ තෙල් රත්කරනවා. ඊට පස්සේ තමයි අපි ආර්.ඩී.බී. පොල්තෙල් විදිහට මේවා වෙන්කරන්නේ. අන්තිමට ප්‍රමිති ආයතනය සහ ආහාර ආරක්ෂණ ඒකක වලට අපේ පොල්තෙල් වලින් කොටසක් පරීක්ෂණ සඳහා යොමුකරනවා. එකේදී ලැබෙන ප්‍රතිඵල අනුව තමයි අපි පොල්තෙල් වෙ​ෙළඳපොළට නිකුත් කරනවද නැද්ද කියල තීරණය කරන්නේ.

දැන් ඔබ කියන විදිහට ඔබේ ආයතනයේ පිරිපහදු කරපු පොල්තෙල් වල ‘ඇෆ්ලටොක්සින්’ ඇත්තෙම නැද්ද?

නැහැ, අඩු ගානේ දශමයක්වත් ඇත්තේ නැහැ.

ශ්‍රී ලංකා ප්‍රමිති ආයතනයෙන්ද ඒ බව සනාථ කළේ?

නැහැ, ප්‍රමිති ආයතනය අපි පිරිපහදු කරපු පොල්තෙල් පරීක්ෂා කිරීම ප්‍රතිෂේප කළා. එත් අපි ආනයනය කරපු “අශුද්ධ පොල්තෙල්” නම් පරීක්ෂා කරලා ඒවගේ පිළිකා කාරක තියනවා කියල කිවුවා. එත් අපි දැන් පිරිපහදු කරපු පොල්තෙල් පරික්ෂා කරන්න දුන්නමත් “අපිට වැඩ තියනවා” කියලා ප්‍රමිති ආයතනය ඒවා ප්‍රතික්ෂේප කරනවා.

ඇයි ඔවුන් ඔබේ ඉල්ලීම ප්‍රතික්ෂේප කරන්නේ?

ඇත්තටම දන්නේ නැහැ, ඔවුන් ඇයි එහෙම කරන්නේ කියලා. අපි කීප සැරයක්ම එයාලට ලියුම් යැවුවා, කෝල් කරලා කිවුවා අපේ පොල්තෙල් පරික්ෂා කරලා බලන්න කියලා. එතකොට අධ්‍යක්ෂතුමිය කිවුවේ දැන් බැහැ එයාලට වැඩ තියනවා කියලා. අපි ඒ නිසා කාර්මික තාක්ෂණ ආයතනයටත් මේ තෙල් පරික්ෂා කරන්න කිවුවා. එත් එයාලගෙනුත් ලැබුණු පිළිතුර වුණේ “අපි කාර්යබහුලයි” කියලයි.

ඊට පස්සේ මොන ආයතනයෙන්ද ඒ පරික්ෂාව කළේ?

අපි ලෝකෙම පිළිගත්ත “බියුරෝ වෙරිටෙජ් ආයතනයේ” ලංකාවේ තියන ශාඛාවට දුන්නා මේක පරික්ෂා කරන්න කියලා. ඔවුන්ගේ වාර්තාව ආවාම මම ගොඩක් සතුටු වුණා. එත්, “දියවැඩියා පරික්ෂා කරලා ලැබෙන රිපෝට් එකත් තැන් දෙකකට දුන්නම දෙවිදිහක්” වෙනවා වගේ නිසා අපි අයෙමත් අපේ පොල්තෙල් පරික්ෂා කරන්න වෙනත් ආයතනයකට දුන්නා. ඔවුන් තමයි එස්.ජී.එස්. පර්‌යේෂණ ආයතනය. එයින් ලැබුණු වාර්තාවත් ඉතාමත් සතුටු දායකයි. මේ වාර්තා දෙකෙන්ම අපිට දැන ගන්න ලැබුණා අපේ පිරිපහදු කළ පොල්තෙල්වල ඇෆ්ලටොක්සින් කියන පිළිකා කාරකය බිංදුවයි කියලා.

ලංකාවේ මුලින්ම පිළිකා කාරක පොල්තෙල් තිබෙන බවට දැනුවත් කළේ සුළු පරිමාණ තෙල් මෝල් හිමියන්ගේ සංගමයයි. ඔවුන් දිගින් දිගටම චෝදනා කරන්නේ ඔබේ ආයතනය ලංකාවට පිළිකාකාරක පොල්තෙල් ගෙනවා කියල?

අපි දන්නේ නැහැ ඔවුන් මොන පදනමේ ඉඳලද අපිට එහෙම චෝදනා කරන්නේ කියලා. හැබැයි ඒ සංගමයේ ඉන්න තරුණයෙක්ව අපි හොඳටම හඳුනනවා. ඔහුගේ පියා මගේ සහෝදරයෙක් ළඟ තමයි රැකියාව කළේ. ඒ නිසා මේ තරුණයට දියුණු වෙන්න කියලා මගේ සහෝදරා ඔහුට තෙල් මෝල් දෙකක්ම තෑගී කළා. එහෙම කරපු අපිට තමයි එයාලා අද මෙහෙම කතා කරන්නේ. අනික, සුළු පරිමාණ තෙල් මෝල් හිමියන්ට මුළු රටටම දෙන්න පොල්තෙල් නැහැ. අද වුණත් එයාලා ගෙනියන්නේ අපේ පොල්තෙල්. ඊට පස්සේ එයාලා ළඟ තියන පොල්තෙල් එක්ක කවලම් කරලා ඔවුන්ගේ ලේබලේ ගහලා විකුණනවා. ඔන්න ඕකයි අද රටේ තත්ත්වේ.

මොකක්ද ඔවුන්ට තියන හේතුව ඔබට චෝදනා කරන්න?

මට හිතෙන විදිහට අප්‍රේල් කියන්නේ පොල්තෙල්වලට හොඳම මාකට් එකක් තියන කාලේ. දැන් වෙනකොට රටේ පොල්තෙල් හිඟයක් තියනවා. අපි වුණත් අපේ වාර්තාවන් නිවැරදි වනතෙක් ලංකාවට පොල්තෙල් ගෙන්වන්නේ නැහැ. කලින්ම මුදල් ගෙවලා වෙන්කර ගත්ත තෙල් නැව් පවා අපි ගෙන්වන එක නවත්තලයි තියෙන්නේ. ඒ නිසා රටේ බොරු පොල්තෙල් බයක් ඇති කරලා පොල්තෙල් මිල අහස උසට නග්ගන්න තමයි මේ අය උත්සාහ කරන්නේ. අනෙක් අතට පොල්තෙල් මිල අධික වුණොත් ආයෙත් ෆාම් තෙල්වලට මාකට් එක හැදෙනවා. අනික ආණ්ඩුව අපිට “අශුද්ධ පොල්තෙල්” ගෙන්වන්න අඩු බදු මුදලක් අය කරන්නේ රටේ මිනිසුන්ට පොල්තෙල් පරිභෝජනය වැඩි කරවන්නයි. එත් මේ අය චෝදනා කරන විදිහට “පොල්තෙල්” නොගෙන ආයෙත් මිනිස්සු “ෆාම් තෙල්” මිල දී ගන්න පෙළඹෙයි.

එත් කොප්පරා සහ කැබැලි පොල් පිටරටින් ආනයනය කරන්න සූදානමක් තියනවා. එතකොට පොල්තෙල් මිලට ප්‍රශ්නයක් වෙන එකක් නැහැ නේද?

මේකයි අපිටත් ලොකු තෙල් මෝලක් තියනවා. ඒක තමයි ලංකාවේ තියන ලොකුම තෙල් මෝල. අපිට වුණත් කොප්පරා කිලෝ දහයකින් හදන්න පුළුවන් වෙන්නේ පොල්තෙල් කිලෝ එකක් විතරයි. අනික මේ විදිහට කොප්පරා කන්ටේනර් කීයක්නම් ගෙන්වන්න ඕනෙද පොල්තෙල් ටොන් එකක් හදන්න. මම හිතන්නේ නැහැ මේක ප්‍රායෝගික දෙයක් වෙයි කියලා.

ඒ විතරක් නෙවෙයි මෙයාලා ගෙන්වන්නේ කුරුට්ට තියන කොප්පරා. ඒවා වලින් තෙල් හදන්නත් බැහැ. පරිභෝජනයටත් ඉතාමත් නුසුදුසුයි. කෑමකට දාලා කෑවම කට කාරවන ගතියක් එනවා. එතකොට කොහොමත් මිනිස්සු පෙළඹෙන්නේ අගුණ වුණත් ‘ෆාම් තෙල්’ පරිභෝජනයට ගන්නයි. මේ හේතු නිසා රජය තීරණය කළා මිලෙනුත් අඩු ප්‍රවාහනයටත් ලෙහෙසි “අශුද්ධ පොල්තෙල්” ගෙන්වන්න. අනික අද රටේ මිනිස්සුන්ට සාධාරණ මිලකට පොල්තෙල් මිලදී ගන්න ලැබෙන්නේත් අපි “අශුද්ධ පොල්තෙල්” පිරිපහදු කරලා පිරිසිදුව අඩු මිලට වෙ​ෙළඳපොළට දෙන නිසයි.

ඔබේ ආයතනය මඟින් නිෂ්පාදනය කරන පොල්තෙල් කුමන වෙළෙඳ නාමයක් යටතේද වෙළෙඳපොළේ මිලදී ගන්න තියෙන්නේ?

අපි විශාල වශයෙන් කරන්නේ තොග පොල්තෙල් වෙළෙඳපොළට නිකුත් කිරීම. ඒ නිකුත් කරන්නෙත් “අලි බ්‍රදර්ස් පුද්ගලික සමාගම” කියන වෙළෙඳ නාමය යටතේයි. තවත් අය අපෙන් පොල්තෙල් අරගෙන පාකිස්තානය, චීනය, ඇමරිකාව, මැද පෙරදිග කියන රටවල් වලට අපනයනය කරනවා. අපිත් පාකිස්තානයට පිරිපහදු කළ පිරිසිදු පොල්තෙල් අපනයනය කරනවා. ලංකාවේදී අපේ පොල්තෙල් ප්‍රතික්ෂේප වුණාට ඒ රටවලදී අපේ තෙල්වලට තියෙන්නේ හොඳ ඉල්ලුමක්. අනික අපි පරීක්ෂා කරලා බලනවා වගේම තමයි ඒ රටවලිනුත් අපේ පොල්තෙල් පරික්ෂා කරනවා. මේ අවුරුදු විස්සට එකම පොල්තෙල් තොගයක්වත් පිළිකා කාරක හෝ වෙනත් රසායන ද්‍රව්‍යයක් අඩංගුයි කියලා ඒ රටවල් ප්‍රතික්ෂේප කරලා නැහැ.

නමුත්, මේ මොහොතේත් පොල්තෙල් ගැන පාරිභෝගිකයෝ ඉන්නේ දෙගෙඩියාවකින්. එයට පිළියමක් තියනවද?

ඇත්තටම, මගේ නෝනත් මගෙන් ඇහුවා රටේ කතාවෙන පොල්තෙල් කතාව ඇත්තද කියලා. මොකද අපේ ගෙදරත් අපේ දුවගේ පොඩි දරුවටත් අපි දෙන්නේ අපේ කර්මාන්තශාලාවේ පිරිපහදු කරන පොල්තෙල්. ඒ නිසා මම හෝ අපේ ආයතනය හෝ කිසිම ලාංකිකයකුට පිළිකාකාරක පොල්තෙල් කන්න දෙන්නේ නැහැ. අපි කියන්න කැමැතියි විශ්වාසයෙන් යුතුව අපේ පොල්තෙල් පරිභෝජනය කරන්න කියලා.

හර්ෂණී දිසානායක
– aruna