ශ්‍රී ලංකා මානව හිමිකම් කොමිෂන් සභාව නිකුත් කළ ඇති විධානයට අනුව අද (26) සිට ලබන පෙබරවාරි මස 17 වැනිදා දක්වා අපොස උසස් පෙළ විභාගය පැවැත්වෙන කාලය තුළ කිසිදු විදුලිය විසන්ධි කිරීමේ ඉල්ලීමකට මහජන උපයෝගිතා කොමිසම අනුමැතිය නොදෙන බව  මහජන උපයෝගිතා කොමිසමේ සභාපති ජනක රත්නායක මානව හිමිකම් කොමිසමට දැනුම් දෙයි.

එදින සිට උසස් පෙළ විභාගය අවසන් වන තෙක් අඛණ්ඩව විදුලිය සැපයිය යුතු යැයි ද ලංකා විදුලිබල මණ්ඩලයට නියෝගයක් නිකුත් කර ඇති බව ද  ලිපියක් මගින් දැනුම් දී තිබේ.

ලංකා විදුලිබල මණ්ඩලය එම නියෝගය ක්‍රියාත්මක කිරීමට අපොහොසත් වුවහොත් ලංකා විදුලිබල මණ්ඩල පනත යටතේ නීතිමය ක්‍රියාමාර්ග ගන්නා බව ද ජනක රත්නායක එම ලිපියෙන් වැඩි දුරටත් සඳහන් කර තිබේ.

නිදහස් උළෙලට සහභාගී වන අයට තර්ජනය කළ අයකු අත්අඩංගුවට ගෙන ඇතැයි සමාජ මාධ්‍ය වාර්තා කරයි.

මෙම පුද්ගලයා නිදහස් උළෙලට පැමිණෙන ආරාධිතයින්ට බේරේ වැවේ දිය කෙළියට සූදානමින් පැමිණෙන ලෙස පෝස්ටුවක් පළ කර තර්ජනය කොට ඇත.

විදුලිබල මණ්ඩලය විදුලි කප්පාදුව අත්හිටුවීමට එකඟ වී නොමැති බව ලංකා විදුලිබල මණ්ඩලයේ සභාපති නලින්ද ඉලංගකෝන් පවසයි.

උසස් පෙළ විභාගය අවසන් වන තෙක් විදුලි කප්පාදුව අත්හිටුවීමට නම් ඉන්ධන මිල දී ගැනීමට රුපියල් කෝටි 410 ක් අවශ්‍ය බව කී සභාපතිවරයා, තමන් විදුලි කප්පාදුව අත්හිටුවීමට එකඟ යැයි ප්‍රකාශ නොකළ බව ද සඳහන් කළේය.

විභාගය පැවැත්වෙන දහවල් කාලයේ විදුලි කප්පාදු නොකළ අතර කිසියම් ප්‍රදේශයකට විදුලි විසන්ධි වූයේ නම් එය වෙනත් දෝෂයක් බව කී නලින්ද ඉලංගකෝන්, රාත්‍රී කාලයේ විදුලි කප්පාදුව අඛණ්ඩව ක්‍රියාත්මක වන බව ප්‍රකාශ කළේය.

සාක්කුවේ ඇති මුදල් ප්‍රමාණය මත අධ්‍යාපනය ලැබීම තීරණය වීම සාධාරණ නොවන බව ජවිපෙ නායක අනුර දිසානායක පවසයි.

එහෙයින් සියලු දෙනාට අධ්‍යාපනය ලබා දීම රජයේ වගකීමක් බවයි, ඔහු ප්‍රකාශ කළේ.

කෙසේ වුව ද කිසියම් දරුවෙකුට පෞද්ගලික හෝ විදෙස් අධ්‍යාපනය ලබා ගැනීමට උවමනා නම් සිය රජයක් යටතේ ඊට පහසුකම් ලබා දෙන බව ද අනුර දිසානායක කීය.

කෙසේ වුව ද එම පෞද්ගලික අධ්‍යාපනය රජය මගින් නියාමනය කරන බව ද හෙතෙම පැවසීය.

විද්වත් හමුවක දී ජවිපෙ ආණ්ඩුවක් යටතේ පෞද්ගලික විශ්වවිද්‍යාල සඳහා අවස්ථාව ලබා දෙන්නේ දැයි ප්‍රශ්න කළ අවස්ථාවේ ඊට පිළිතුරු ලෙස ඔහු මේ බව සඳහන් කළේය.

13 වන ව්‍යස්ථා සංශෝධනය සම්මත කිරීමට කිසිවෙකුට විරුද්ධ විය නොහැකි බව පාර්ලිමේන්තු මන්ත්‍රී ඩිලාන් පෙරේරා පවසයි.

ඔහු මේ බව ප්‍රකාශ කළේ, නිදහස ජනතා සභාව විසින් කැඳවූ මාධ්‍ය හමුවක් අමතමිනි.

එසේ ම 13 වන ව්‍යවස්ථා සංශෝධනය සම්මත කිරීමට 225 ටම යුතුකමක් ඇති බවයි, ඩිලාන් පෙරේරා අවධාරණය කළේ.

13 වන සංශෝධනය සඳහා කවුරු විරුද්ධ වුව ද තමන් පක්ෂ බව ද ඔහු සඳහන් කළේය.

ශ්‍රී ලංකා විනිමය හා සුරැකුම් කොමිසමේ සභාපති වශයෙන් කටයුතු කරමින් සිටියදී “තාරුණ්‍යට හෙටක්” සංවිධානය සඳහා එම කොමිසමේ අරමුදලින් රුපියල් ලක්ෂ 50ක් ලබාදීමෙන් රජයේ මුදල් සාපරාධී පරිහරණය කළේ යැයි චෝදනා එල්ල වී සිටී පාර්ලිමේන්තු මන්ත්‍රී, ආචාර්ය නාලක ගොඩහේවා ඇතුළු විත්තිකරුවන් තුන් දෙනෙකු නිදොස් කොට නිදහස් කරන ලෙස කොළඹ මහාධිකරණය නියම කර තිබේ.

කොළඹ මහාධිකරණ විනිසුරු අමල් රණරාජා එම තීන්දුව ලබා දුන්නේය.

දීර්ඝ නඩු විභාගයකින් අනතුරුව මහාධිකරණ විනිසුරුවරයා එම තීන්දුව ප්‍රකාශයට පත් කළේය.
තීන්දුව ප්‍රකාශයට පත් කරමින් විනිසුරුවරයා සඳහන් කළේ, පැමිණිල්ල විසින් විත්තිකරුවන්ට එරෙහි චෝදනා ඔප්පු කිරීම සඳහා ඉදිරිපත් කළ සාක්ෂි ප්‍රමාණවත් නොවන බවය.

ඒ අනුව විත්තිකරුවන් නිදොස් කොට නිදහස් කරන බවත් නියෝගයේ සඳහන් වුණි. නිදහස් කරන ලද සෙසු විත්තිකරුවන් වන්නේ විනිමය හා සුරැකම්පත් කොමිසමේ හිටපු නියෝජ්‍ය අධ්‍යක්ෂ ජනරාල් ධම්මික පෙරේරා සහ තාරුණ්‍යට හෙටක් සංවිධානයේ රොනී ඊබ්‍රහිම් ය.

නාලක ගොඩහේවා ඇතුළු විත්තිකරුවන් තුන්දෙනාට එරෙහිව ඉකුත් යහපාලන රජය සමයේ නීතිපතිවරයා විසින් එම නඩුව ගොනුකර තිබුණි.

සමගි ජනබලවේගයේ නායකයින් තමාව රැවටීමට ලක් කළ බව බේරුවල නගරාධිපති මසායි මොහොමඩ් පවසයි.

“අවසාන දිනයේ උදේ 8.30 තමා මෙයාලා ඇවිත් භාරදුන්නේ මගේ නම නැතුව. ඒක තමා මේ අය කරපු වැඩේ. නායකතුමා මගෙත් එක්ක ඉඳලා ෆොටෝ එකක් ගත්තා. එදා පොරොන්දු වුණා අපි ඔක්කෝම එකතුවෙලා සජබය දිනවමු කියලා. මේ පොරොන්දුව එයාලා කඩ කළා. මගේ විශ්වාසයට ද්‍රෝහිකමක් මට කළා.

ඒවා තුළින් ජනතාව දැන් සම්පූර්ණයෙන්ම කෝපවෙලා ඉන්නේ. ජනබලයත් එක්ක තමා අපි නායකතුමා හම්බෙන්න ගියේ. නමුත් මෙතෙන සමගිය ඇති කරන්න ඕන කට්ටිය අසමගියක් ඇති කරලා තියෙනවා.

අද ජනතාව සම්පූර්ණයෙන්ම ප්‍රතික්ෂේප කරලා තියෙනවා, සමගි ජන බලවේගය බේරුවල ආසනයේ. මෙහෙම ගිහින් කොහොමද ලංකාව ගොඩ ගන්නේ. නායකතුමාගේ නායකත්වය එතැන පෙන්නුම් කළේ නෑ. මේ වගේ ශක්තිමත් නොවන නායකයෙක් රට කොහොමද පාලනය කරන්නේ.”

පිටකොටුව තොග වෙළඳපොලේ ආනයනික රට ළුෑණු සහ අර්තාපල් සහ සුදු සීනි තොග මිල පහළ ගොස් තිබේ.

ඒ අනුව ආනයන රට ළුෑණු කිලෝවක නව තොග මිල රුපියල් 130ක් වන අතර ආනයනික අර්තාපල් කිලෝවක නව තොග මිල රුපියල් 100කි.

අත්‍යාවශ්‍ය ද්‍රව්‍ය ආනයනකරුවන්ගේ සංගමය පැවසුවේ ආනයනික රට ළුෑණු කිලෝවක් රුපියල් 50කින් සහ ආනයනික අර්තාපල් කිලෝවක් රුපියල් 80ත් 100ත් අතර මිලකින් පහත වැටී ඇති බවයි.

මේ අතර ආනයනික සුදු සීනි කිලෝවක තොග මිල රුපියල් 205ක් දක්වා පහළ ගොස් තිබේ.