කොහෙවත් නීති සාදා මෙතැනට ගෙනැවිත් අත් උස්සන ලෙස කියා කියන්නට ලෑස්ති වෙන්න එපා ජනතාව තමා පත් කර ඇත්තේ සිග්නල් කණුවක්වීමට නොවන බව අධ්‍යාපන ප්‍රතිසංස්කරණ සහ විවෘත විශ්වවිද්‍යාල රාජ්‍ය අමාත්‍ය සුසිල් ප්‍රේමජයන්ත පවසයි.

ඔහු මෙසේ පැවසුවේ පොදු ව්‍යාපාර පිළිබඳ පාර්ලිමේන්තු කාරක සභාවේ (කෝප්) වාර්තා පිළිබඳ සභාව තැබීමේ විවාදයට අද (22) පාර්ලිමේන්තුවේ දී එකතු වෙමිනි.

“පනත් වෙන තැනක හදලා මෙතන ගෙනැවිත් අපේ අත් උස්සන්න බලාපොරොත්තු වෙන්න එපා. එහෙම කරලා හරි යන්නේ නෑ. මම නීති උපාධිය කළේ 1982 දී. ශ්‍රේෂ්ඨාධිකරණයට ආවේ1985 දී. පළමුවැනි අවුරුදු දහයේදී ම ශ්‍රේෂ්ඨාධිකරණයේ නඩු කතා කළා. පාර්ලිමේන්තුවට බෝම්බ ගහපු නඩුවෙත් මම කතා කළා.

සමහරු ඒවා දන්නෙ නැහැ. සමහරු හිතන් ඉන්නේ අපි මොන්ටිසෝරි ගිහින් ඇවිල්ල කියල කොහෙවත් හදනවා නීති. උපදේශක කාරක සභාවට ගේනවා. ඉතින් මෙතැනදි අපි අත උස්සන්න ඕන. ජනතාව අපිව පත් කරලා තියෙන්නේ සිග්නල් කණු වෙන්න නෙවෙයි කියන එක මේ වාර්තාවත් එක්ක මම කියනවා. ඒ කාර්යභාරය තමයි අපි ඉටු කරල තියෙන්නෙ.

මේවා කියන්න අපි බය වෙන්නේ නැහැ. අපි ඡන්දෙන් පත්වෙලා ඉන්නේ. පාර්ලිමේන්තුවේ කෝ මූල්‍ය පාලනය. අද සමහරු දන්නේ නැහැ ව්‍යවස්ථා හදන්නේ කොහොමද කියලා. පසුගිය පාලන කාලයේ දී අලුත් ව්‍යවස්ථාවක් සම්පාදනය කළා. එතනදි ක්‍රියාදාමයකට ගියා. මොකක්ද ක්‍රියාදාමය.පාර්ලිමේන්තුවේ දී යෝජනාවක් සම්මත කළා. පස්සේ තේරීම් කාරක සභාවක් පත් කළා. අනු කමිටු හයක් හැදුවා.

ඒ අනු කමිටුවක අයට තමයි විද්වතුන් තාක්ෂණ සහාය දුන්නේ. නැත්නම් මේක ව්‍යවස්ථාදායකය ද. අපි මොකද මෙතන ඉන්නේ. මම සන්ධානයේ ලේකම් වෙලා හිටියා. කවදාවත් ජාතික ලැයිස්තුවෙන් ගියේ නෑ. නාමයෝජනා 12ක් හැදුවා. මහින්ද රාජපක්ෂගේ නාමයෝජනා තුනක් අස්සන් කරල තියෙනවා. සමහරුන්ට ඒවා මතකත් නෑ.

මෙරට පළමු වරට කොවිඩ් නිව්මෝනියාව හා සම්බන්ධ කළු දිලීර රෝගය ආසාදිත පුද්ගලයෙකු කරාපිටිය ශික්ෂණ රෝහලේ දී මියගොස් තිබේ.

කරාපිටිය රෝහලේ අධිකරණ වෛද්‍ය විශේෂඥ රොහාන් පී. රුවන්පුර සඳහන් කළේ, ඇල්පිටියේ පදිංචි 56 හැවිරිදි පුද්ගලයෙකු එලෙස මියගොස් ඇති බවය.

කරාපිටිය රෝහලේ ප්‍රතිකාර ලබමින් සිටියදී පසුගිය සැප්තැම්බර් මස 29 වැනිදා ඔහු මියගොස් තිබිණ.

කරාපිටිය රෝහලේ අධිකරණ වෛද්‍ය විශේෂඥ රොහාන් පී. රුවන්පුර සඳහන් කළේ, කොවිඩ් නිව්මෝනියාව හා සම්බන්ධ සංකූලතා සහිත කළු දිලීර රෝගීන් මීට පෙර ද හඳුනා ගත්ත ද, කළු දිලීර හේතුවෙන් මෙරට සිදුවූ පළමු මරණය මෙය වන බවය. ඉන්දියාවේ කළු දිලීර රෝගය දැඩි ලෙස ව්‍යාප්ත විය.

ඉන්ධන ආනයනය කිරීම සඳහා ඕමානයෙන් ඩොලර් මිලියන 3,600ක ණයක් ලබා ගැනීමට අමාත්‍ය මණ්ඩලයේ අනුමැතිය ලැබී ඇතැයි බලශක්ති අමාත්‍ය උදය ගම්මන්පිල පවසයි.

මෙම ණය මුදලට අමතරව ඉන්ධන ආනයනට ඩොලර් මිලියන 500ක ණයක් ඉන්දියාවෙන් ලබා ගැනීමට සූදානමින් සිටින බව කී අමාත්‍ය ගම්මන්පිල, එය භාණ්ඩාගාරයේ අනුමැතියට යොමුකර ඇති බව ද සඳහන් කළේය.

මේ මාසය සඳහා ඉන්ධන ආනයනයට අවශ්‍ය ඩොලර් ප්‍රමාණය ලබා දීමට මහ බැංකු අධිපතිවරයා පොරොන්දු වී තිබෙන බවත් මෙම තත්ත්වය හමුවේ රටේ ඉන්ධන හිඟයක් ඇති කිරීමට විපක්ෂය මැවූ සිහිනය කිසිසේත්ම ඉටුනොවන බවත් අමාත්‍ය උදය ගම්මන්පිල වැඩි දුරටත් පැවසීය.

දිවයින පුරා පිහිට රජයේ සියලු ම පාසල්වල ප්‍රාථමික අංශ (1 සිට 5 දක්වා ශ්‍රේණි) එළඹෙන 25 වන සඳුදා සිට ආරම්භ කිරීම සඳහා සෞඛ්‍ය සේවා අධ්‍යක්ෂ ජනරාල්වරයා අවසර ලබා දී තිබේ.

ඒ සඳහා අදාළ සෞඛ්‍ය මාර්ගෝපදේශ යටතේ අවසර හිමි වූ බව අධ්‍යාපන අමාත්‍යාංශයේ ලේකම් කපිල පෙරේරා පවසයි.

පළමු අදියර යටතේ සිසුන් 200ට අඩු පාසල්හි ප්‍රාථමික අංශ ඔක්තෝබර් 21 දින සිට ආරම්භ විය. ඒ අනුව දෙවන අදියර යටතේ ශිෂ්‍ය සංඛ්‍යාව 200ට වැඩි පාසල්වල ද ප්‍රාථමික අංශ (1 සිට 5 දක්වා ශ්‍රේණි) මෙලෙස ආරම්භ කිරීමට සෞඛ්‍ය නිර්දේශ ලැබී තිබේ.

මේ අතර රජයේ අනුමත පෞද්ගලික පාසල්, කතෝලික පාසල්වල ප්‍රාථමික අංශ ද ඊට සමගාමීව අධ්‍යාපන කටයුතු ආරම්භ කිරීමට තීරණය වී තිබේ.

 

ලෝකය පුරා උද්ගතව තිබූ තත්ත්වය හමුවේ ඉදිරියේදී කුමන ආකාරයේ භාණ්ඩ හිඟයක් ඇතිවේ දැයි කිව නොහැකි බව වෙළඳ අමාත්‍ය බන්දුල ගුණවර්ධන පවසයි.

අමාත්‍යවරයා මේ බව සඳහන් කළේ, අද (22) කොළඹ පැවැති වැඩසටහනකින් පසු මාධ්‍ය වෙත අදහස් දක්වමිනි.

“චීනය කියන ලෝකයේ විශාලතම රටක දවස් 5ක් වැඩ කරන රටේ එක් දවසක් නම්, විවෘත කරලා තියෙන්නෙ ඓතකොට භාණ්ඩ හිඟයක් ඇති වෙනවා ලෝකෙ, අපිටත් විවිධ අමුද්‍රව්‍ය වැඩි ප්‍රමාණයක් ආනයනය කරන්නේ, චීනයෙන් එතකොට අපිට අමුද්‍රව්‍යවල හිඟයක් ඇති වුණොත් සමහර කර්මාන්ත පවත්වා ගෙන යන්න බැරි වෙනවා.

කවුරුහරි කියනවා නම්, මෙන්න මේකයි ලෝකෙ ඛනිජ තෙල් වැඩි වෙන එක ලංකාව පාලනය කරන්නෙ මෙහෙමයි, ලෝකයේ ගෑස් මිල 130%කින් වැඩි වෙලා තියෙනවා. ඒක අඩු කරන්නෙ මෙහෙමයි කියලා ක්‍රමවේදයක් කවුරුහරි දන්න කෙනෙක් ඉන්නව නම් එයාට මාව හම්බුවෙන්න කියන්න.”

පසුගියදා හිරු බලය වැඩසටහනේ දී පේක්ෂකයෙක් ප්‍රශ්න කළේ ලංකා ගුරු සංඝමයේ ප්‍රධාන ලේකම් ජෝෂප් ස්ටාලින් සහ ලංකා ගුරු සේවා සංගමයේ ප්‍රධාන ලේකම් මහින්ද ජයසිංහ උගත් විශ්වවිද්‍යාල මොනවා දැයි ප්‍රශ්න කළේ ය.

එසේ ම මේ වන විට ගුරුවරුන් ලෙස උගන්වා ඇති පාසල් මොනවා දැයි ප්‍රශ්න කළේ ය.

මේ රටේ ජනතාව ඒ පිළිබඳ දැන ගැනීමට කැමැත්තෙන් සිටින බව ද ඔහු ප්‍රකාශ කළේය.

කෙසේ වුව ද ඒ සඳහා පිළිතුරු දෙමින් මහින්ද ජයසිංහ ප්‍රකාශ කළේ තමා පැමිණියේ එම ප්‍රශ්න සඳහා පිළිතුරු ලබා දීමට නොවන බව ය.

ශ්‍රව්‍යාබාධිත ප්‍රජාව වෙනුවෙන් මෙවර අයවැය විවාදය සංඥා භාෂාවෙන් ද ඉදිරිපත් කිරීමට ඊයේ (21) කථානායක මහින්ද යාපා අබේවර්ධන මහතාගේ ප්‍රධානත්වයෙන් පැවති පාර්ලිමේන්තු කටයුතු පිළිබඳ කාරක සභාවේ අනුමැතිය හිමි වූ බව පාර්ලිමේන්තුවේ මහලේකම් ධම්මික දසනායක පවසයි.

කථානායකවරයාගේ යෝජනාවකට අනුව පාර්ලිමේන්තු කටයුතු පිළිබද කාරක සභාවේ දී මේ පිළිබඳව සලකා බැලුණු අතර ඒ අනුව අයවැය විවාදය පැවැත්වෙන කාල සීමාව තුළ රූපවාහිනි සජීවී විකාශයට සමගාමීව සංඥා භාෂා කවුළුවක් විකාශය කිරීමට ද මෙහි දී අනුමැතිය හිමි විය.

පළාත් අතර පනවා ඇති සංචරණ සීමා මෙම මස 31 වෙනිදා අලුයම 4.00 සිට ඉවත් කිරීමට තීරණය කර ඇති බව යුද හමුදාපති ජනරාල් ශවේන්ද්‍ර සිල්වා ප්‍රකාශ කරයි.

කොවිඩ් වසංගතය හේතුවෙන් ඉකුත් අගෝස්තු මස 20 වෙනිදා සිට ක්‍රියාත්මක වන පරිදි පළාත් අතර සංචරණ සීමා පැනවීමට රජය විසින් කටයුතු කර තිබිණි.

ඔක්තෝබර් 21 පළාත් සංචරණ සීමා ඉවත් කිරීමට යෝජනා කළ ද පසුව එය කල් දැමිණි.