වර්තමාන පාර්ලිමේන්තුව මේ රටේ ඡන්දදායකයින්ගේ නිර්මාණයක් බව පෙරටුගාමී සමාජවාදී පක්ෂයේ ප්‍රචාරක ලේකම් දුමින්ද නාගමුව පවසයි.

ප්‍රචාරක ලේකම්වරයා පෙන්වා දෙන්නේ, දැන් වසළයින් යැයි බැණ වදින පිරිස ද සිය ඡන්දය භාවිත කර නිර්මාණය කළේ ජනතාව බවයි.

ජනතාව නැවත එම අවස්ථාව ලබා ගත්ත ද ඔවුන් කවර තීන්දුවක් ගනී දැයි සැක සිතිය යුතු තත්ත්වයක් ඇතැයි දුමින්ද නාගමුව අවධාරණය කරයි.

පෙරටුගාමී සමාජවාදී පක්ෂයේ බදුල්ල දිස්ත්‍රික් සමුළුව අමතමින් හෙතෙම මේ බව කීය.

මම නීතිඥවරියක්. මගේ සැමියාත් නීතිඥවරයෙක්. මට මගේ වෘත්තීය ගැන හැමදාම තිබුනෙ සාඩම්බරයක්. නීතිඥ වෘත්තිය රස්සාවකට එහා ගිය ඉතා පැරණි සම්ප්‍රදායන් නඩත්තු කරන ගෞරවනීය තානාන්තරයක් ලෙසයි මා දුටුවේ.

ඊයේ පැවතුනා උත්සවයක්. මම මගේ අවුරුදු 22ක වෘත්තීය ජීවිතයේ එවැනි උත්සව සිය ගණනකට ගොස් ඇති. නීතිඥවරුන් එකතුවන උපචාරානුකූල (formal) සාද මට්ටමේ උත්සව බහුලයි. නීතිඥවරුන් සාද සඳහා සුප්‍රසිද්ධයි. ඔවුන්ගේ සාද බොහෝ විට සාම්ප්‍රදායික ඉහළ පැලැන්තියේ සාද ආකෘතිය නඩත්තු කළා.

ආරාධනා මත සහ/හෝ ටිකට් මිලදීගෙන සහභාගී වන උත්සව කොළඹ නීතිඥ ප්‍රජාවට ආගන්තුක නෑ. ඒවා ඔවුන්ගෙ වෘත්තීය ජීවිතයේ කොටස්. ඉතිහාසය පුරාම එහෙම උත්සව තිබුනා. කට්ටිය ඒවට ගියා. ෆොටෝ ගැහුව. සමහරු මුහුනු පොතේ දැම්ම. උත්සවය ඉවර වෙලා ගෙදර ගියා. එච්චරයි.
ඒත් ඊයේ උත්සවයට සහභාගී වූ නීතිඥවරුන් උදේ ඇහැරී බලන විට අපෘෂ්ඨවංශිකන් බවට පත් කරලා. ද්‍රෝහියො කරලා. ඉතාම පහත් මට්ටමේ ප්‍රකාශ ඔවුන්ට විරුද්ධව මුහුනු පොතේ බිත්ති උඩ අතුරල.

කවුද මේව කරන්නෙ? සහෝදර වෘත්තීය සමාජිකයො. උගත් මිතුරො. කොහොමද ගහන්නෙ?
දැනුවත්ව, හිතා මතා කරුණු සඟවල. කුමක් සඳහාද? බංකොලොත් දේශපාලනය සඳහා.

දැන් මේ රටේ තියනව අලුත් ගැහිල්ලක්. තමන්ට එකඟ නොවන වෙනස් දේශපාලන සමාජීය හැසිරීම් සහ මතිමතාන්තර දරන මිනිස්සුන්ට ගහන එක දැන් මෝස්තරයක්. කිසිදු සදාචාරාත්මක සීමා නොතකා කිසිදු ශික්ෂණයක් නැතුව අව්‍යක්ත භාෂා භාවිතයක් සහිතව තමයි මේ ගැහිල්ල සිද්ද වෙන්නෙ.

ඒකෙම දිගුවක් තමයි මේ මුහුනු පොතේ ඇතැම් වෘත්තීය සගයන්ගෙ හැසීරීමත් ඊයේ පැවතුනු උත්සවය සම්බන්ධයෙන්. මේ උත්සවයට නීතිඥ සංගමයේ සම්බන්ධයක් නෑ මම දන්නා තරමින්. මේක සංවිධාන කමිටුවකින් කළ උත්සවයක්. ප්‍රවේශ පත්‍ර නිකුත් කරල තිබුන. සාමාන්‍යයෙන් ජ්‍යෙෂ්ඨ නීතිඥවරුන් මේසය මිලදීගෙන තමා කැමති අයට ආරාධනා කිරීමයි මෙවැනි උත්සව වල සම්ප්‍රදාය. පෝස්ට් පල කළ අය මේවා නොදන්නවා නොවෙයි. එහෙත් මේවා නොදන්නා සාමාන්‍ය ජනතාවට මවා පාන්නේ වෙනත් චිත්‍රයක්.

රටේ ජන අරගලයක් පවතින විට මා එයට සහය දුන්නා. ඒ ගැන කිසිදු පසුතැව්ල්ලක් හෝ ලැජ්ජාවක් මට නැහැ. අරගලය විවේචනය කළ යුතු තැන්වල මා එයද කළා. මම ඊයේ මේ උත්සවයට සහභාගී උනා. ඒ ගැනද කිසිදු පසුතැව්ල්ලක් හෝ ලැජ්ජාවක් මට නැහැ. මේ මගේ සාමාන්‍ය ජීවිතයයි. මට එහි කිසිදු විශේෂත්වයක් නැහැ.

තමන්ගේ පටු දේශපාලන අරමුණු වෙනුවෙන් ඉතාම පහත් නින්දිත ප්‍රකාශ ප්‍රසිද්ධ කරමින් තමාගේ වෘත්තීයත් වෘත්තීය සගයනුත් හෑල්ලුවට ලක් කරන මගේ සහෝදර නීතිඥවරුන්ගෙන් මට අසන්නට ඇත්තේ මෙපමණයි. කලක් අපි වටුකුරුලු රංචුවක්ව සිටියා. එවිට අපි දැල ඔසවාගෙන ගියා මතකද?
අරගලයට නීතිඥවරුන් සාමූහිකව දැක්වූ සහය නොවන්නට එය ලත් තැනම ලොප් වන්නට තිබුනා නොවේද?

මිරිහාන සහ ගංගොඩවිල උසාවිය මතකද? එහි සිටියේ අපෘෂ්ඨවංශිකන්ද? එහි සිටියේ එක දේශපාලන පක්ෂයක ගැත්තන්ද? නීතිඥවරුන් ගෝල්ෆේස් ගියේ අසුවල් අසුවල් පක්ෂයට බලය අල්ලාගන්න සහය වෙන්නද? තිබූ එකම පොදු එකඟතාවය ගෝටාගෝහෝම් නොවේද? ඉන් එහා මෙහා බලාපොරොත්තු පෞද්ගලිකයි නොවේද? මේ රටේ අන්මතයක් දැරීම ද්‍රෝහි කමක්ද?
තමන්ගේ මුදලින් තමන් කැමති උත්සවයකට සහභාගී වීම නිර්ලජ්ජිත ක්‍රියාවක්ද? මෙවැනි මත දරන්නන් දිනෙක තනන දේශය කවරාකාර වේද?

(මේ උත්සවයට සහභාගීවූ උදවිය මහා අපරාධකරුවන් පිරිසක් බවට පත් කර ඇති බැවින් මම ඔවුන්ගේ පෞද්ගලිකත්වය සලකා උත්සවයේ පින්තූර ඇමිණීමෙන් වලකිමි. මටත් රෙෂාන්ටත්
උලත් එකය. පිලත් එකය. ගංගොඩවිලත් එකය. ගෝල්ෆේස් එකත් එකය. ෂැංග්‍රිලාවත් එකය. කොතෙන්ටත් අපි ගියේ එකටය.)

නීතීඥ අජානා රණගල…

ලොව දරුණුතම ත්‍රස්තවාදී සංවිධානය මෙල්ල කළ අපේ විරෝදාර ත්‍රිවිධ හමුදාවට රටේ සේනාධිනායක හිටපු ජනාධිපති ගෝඨාභය රාජපක්ෂගේ මිරිහාන නිවස ආරක්ෂා කර දීමට නොහැකි වූයේ ආරක්ෂාව භාරව සිටි ඉහළ නිලධාරීන් කිහිප දෙනෙකුගේ කුමන්ත්‍රණකාරී සැලසුමක් නිසා බව හිටපු අමාත්‍ය මහින්දානන්ද අලුත්ගමගේ පවසයි.

අනතුරුව පාර්ලිමේන්තුවට පහර දී රාජ්‍ය බලය ලබා ගෙන ජනාධිපති අගමැතිකම් බෙදා ගැනීම පිළිබඳ පවා ඇතැම් ආරක්ෂක නිලධාරීන් සාකච්ඡා කළ බවට තොරතුරු ලැබී ඇතැයි හිටපු ඇමැතිවරයා අනාවරණය කරයි.

ඒ පිළිබඳ සියලු තොරතුරු ඇතුළත් වාර්තාවක් ජනාධිපතිවරයා වෙත ලැබී ඇති බවත් එය ප්‍රසිද්ධියට පත් කළ විට මෙම කටයුතු පිටුපස සිටි නිලධාරීන් පිළිබඳ රටට දැනගත හැකි වනු ඇතැයි ද මහින්දානන්ද අලුත්ගමගේ ප්‍රකාශ කළේය.

ගාලු මුවදොරට පහර දීම මෙන් ම ඉන් අනතුරුව සිදු වූ ප්‍රචණ්ඩ ක්‍රියා පාලනයට ජනාධිපතිවරයා ආරක්ෂාව භාර නිලධාරීන්ට කෙතරම් උපදෙස් ලබා දුන්න ද ඔවුන් ඒ සඳහා නිසි ක්‍රියාමාර්ග නොගත් බවයි, අද (27) පාර්ලිමේන්තුව අමතමින් ඔහු අවධාරණය කළේ.

අද රටේ මංකොල්ලකෑම් වැඩි ඇති අතර බත් හට්ටිය, පාන් ගෙඩිය උදුරා ගෙන දුවන තැනට රට පත්ව ඇතැයි ජනතා විමුක්ති පෙරමුණේ හිටපු පාර්ලිමේන්තු මන්ත්‍රී සුනිල් හඳුන්නෙත්ති පවසයි.

ඒ අන්කිසිවක් නොව ආර්ථික අර්බුදයේ පීඩනය පිට වන ආකාරය බව ද හඳුන්නෙත්ති සඳහන් කළේය.

ඔහු සඳහන් කළේ, කිලිනොච්චියේ දී මාස 09ක අධි මන්දපෝෂණයෙන් පෙළෙන දරුවෙකු තමන්ට හමු වූ බවයි.

මෙවැනි භයානක තත්ත්වයක දී පවා ජනතාවට සහනාධාර ලබා දීමට කටයුතු කර නොමැති බවට ද සුනිල් හඳුන්නෙත්ති චෝදනා කළේය.

ජනතා විමුක්ති පෙරමුණු මාධ්‍ය හමුවක් අමතමින් අද (17) ඔහු මේ බව සඳහන් කළේය.

 

හිටපු ජනාධිපති ගෝඨාභය රාජපක්ෂට නැවත ක්‍රියාකාරී දේශපාලනයට පිවිසෙන ලෙස දැඩි ලෙස ඉල්ලීම් ලැබෙමින් ඇතැයි වාර්තා වෙයි.

පොහොට්ටුවේ මැති ඇමැතිවරුන් ඇතුළු පසුගිය ජනාධිපතිවරණයේ දී ඔහුට සහයෝගය ලබා දුන් විවිධ පාර්ශ්ව මිරිහානේ නිවසට පැමිණ මෙම ඉල්ලීිම කරමින් ඇතැයි දැන ගන්නට තිබේ.

කෙසේ වුව ද හිටපු ජනාධිපතිවරයා දේශපාලන කටයුතුවලින් ඈත්ව සිටීමේ ස්ථාවරයක සිටින බවයි, වාර්තා වන්නේ.

එක්සත් ජාතීන්ගේ මානව හිමිකම් මහ කොමසාරිස්වරියගේ වාර්තාවේ ශ්‍රී ලංකාවේ ආර්ථික අපරාධ පිළිබඳව කර ඇති පුළුල් සඳහන, එම පදයේ පවතින බහු අරුත්බව හැරුණු විට, එය මානව හිමිකම් පිළිබඳ මහ කොමසාරිස් කාර්යාලයේ වරම ඉක්මවා යන බව විදේශ කටයුතු අමාත්‍ය අලි සබ්‍රි පවසයි.

මේ සම්බන්ධයෙන්, කවුන්සිලයේ ආරම්භක මූලධර්ම පිළිපැදීමේ ඇති වැදගත්කම පිළිබඳව සිහිපත් කළ අමාත්‍යවරයා, රටේ දීර්ඝ කාලීන ප්‍රජාතන්ත්‍රවාදී මූලධර්ම සහ සම්මතයන් ආරක්ෂා කිරීම සඳහා රජය අඛණ්ඩව කැප වී සිටින බවට මෑත කාලීනව රට තුළ සිදු වී ඇති කැපී පෙනෙන වෙනස්කම් සාක්ෂි දරන බව ද සඳහන් කළේය.

ආණ්ඩුක්‍රම ව්‍යවස්ථාවෙන් සහතික කර ඇති පරිදි සාමකාමීව රැස්වීමේ සහ ජනතාවගේ අදහස් ප්‍රකාශ කිරීමේ නිදහස සඳහා ව්‍යවස්ථාපිත අයිතිවාසිකම් තහවුරු කර ඇති බව ද හෙතෙම අවධාරණය කළේය.

වත්මන් අභියෝග පිළිගන්නා අතරම, ජනතාවගේ මානව හිමිකම් ප්‍රගමනයට සමාන ප්‍රමුඛතාවක් ලබා දෙමින් ශ්‍රී ලංකාව ආර්ථික වශයෙන් ප්‍රකෘතිමත් වීමේ මාවතේ ගමන් කරන විට, ඒ සඳහා කවුන්සිලයේ සහය සහ අවබෝධය ලබා ගැනීම බලාපොරොත්තු වන බව ද අමාත්‍යවරයා පැවසීය.

හෙතෙම මේ බැව් පැවසූවේ ජීනීවා මානව හිමිකම් කොමිසමේ සැසියට සහභාගී වෙමිනි.

කංසා නීතිගත කිරීමට තමන් කළ යෝජනාව ඇතැමුන් විකෘති කරමින් සිටින බවත් තමන් යෝජනා කළේ කංසා අපනයනය සඳහා වගා කිරීම නීතිගත කිරීමට බවත් සංචාරක රාජ්‍ය අමාත්‍ය ඩයනා ගමගේ පවසයි.

“ගංජා නීතිගත කරන්න කියන්නෙ එක එක්කෙනාට ගංජා බිබී පාරේ ඇවිදින්න නෙවෙයි. ඒක තහනම්. ගංජා බිබී ඇවිදින්න තහනම්. නමුත් මෝඩ වෙන්නෙ නැතුව මේක ගූග්ල් කරලා බලන්න, ලෝකෙ රටවල් 51ක් කංසාවලින් ඩොලර් බිලියන ගණන් හම්බ කරනවා. මේ රට ගොඩදාන්න ඕනෙ. මේ ළිං මැඩි මානසිකත්වයෙන් අයින් වෙන්න.

ගංජා කියන්නෙ අපේ ඉතිහාසයත් එක්ක බැඳිච්ච දෙයක්. ඒක රාවණා යුගයේ ඉඳලා එන දෙයක් මේ කංසා කියන්නෙ. මේක ඖෂධයක්. මේ ඖෂධයේ ගුණය අරගෙන, අපි හරියට මේක පාවිච්චි කරලා, මේක පිටරටවලට අපනයනය කරන්න ඕනෙ. මේක බෙහෙතක්.

නැතුව මේක බිබී හැමතැනම ඇවිදින්න ඕනෙ කියලා කියන කතාවක් නෙවෙයි. මේක මිනිස්සු තේරුම් ගන්න ඕනෙ. තේරෙන මිනිස්සු ගොඩාක් මේ රටේ ඉන්නවා. මේක කළ යුතුයි. මට ගොඩාක් සහාය දක්වන මිනිස්සු ඉන්නවා. හැබැයි ඉතිං ඔය ළිං මැඩියෝ වගේ අය තමයි කියන්නෙ ඔය ගංජා බොනවායි කියන එක. එච්චරයි ඒගොල්ලො දන්නෙ. ඉතිං පව් ඒගොල්ලො”

ඩයනා ගමගේ මේ බව පැවසුවේ ඊයේ (16) පැවැති ආණ්ඩු පක්ෂ මන්ත්‍රී කණ්ඩායම් රැස්වීමෙන් අනතුරුව මාධ්‍ය වෙත අදහස් දක්වමිනි.

කොල්ලුපිටිය ප්‍රදේශයේදී තමා අත්අඩංගුවට ගෙන පොලිස් ජීප් රිය තුළදී තමාට පහර දී මරන තර්ජනය කළ බවට චෝදනා කරමින් අන්තර් විශ්වවිද්‍යාල ශිෂ්‍ය බල මණ්ඩලයේ හිටපු කැඳවුම්කරු, වෙනසක තාරුණ්‍යයේ ජාතික සංවිධායක ලහිරු වීරසේකර මානව හිමිකම් කොමිසමට ඊයේ (16) පැමිණිලි කර තිබේ.

තවත් පුරවැසියකුට මෙවැනි පහරදීමක් නොවීම සඳහා මෙම පැමිණිල්ල කළ බව හෙතෙම පැමිණිල්ල කිරීමෙන් පසුව මාධ්‍ය වෙත පැවසීය.

“මාව සහ මා සමග සිටි තවත් කෙනෙක්ව පොලිසිය කොල්ලුපිටිය ප්‍රදේශයේ දී අත්අංඩංගුවට ගත්තා. මාව පොලිස් ජීප් රථයට දමා ගත්තාට පස්සේ පොලිසියේ නිලධාරීන් තුන් දෙනෙක් මට පහර දුන්නා. මෙහෙම ගහන්න ඔහෙලට අයිතියක් නැහැ කිව්වම ගහන්න විතරක් නොවෙයි මරන හැටිත් අපි දන්නවා කිව්වා.

මට එවලේ විශාල බයක් දැනුණා. අපි රටේ ජනතාව වෙනුවෙන් හඬ නඟන්නේ. මට මේ පහරදීමට අදාළව මේක තවත් ඉස්සරහට අරන් ගිහින් පහරදුන් පොලිස් නිලධාරීන්ට එරෙහිව අවශ්‍ය නීතිමය ක්‍රියාමාර්ග ගන්නවා.

පහුගිය කාලයේ පොලිසියේ නිලධාරීන් පෙලිසිය තුළදී අහිංසක සිවිල් පුද්ගලයන්ට ගහලා මැරුවා. මේවා නැවත ඇති නොවෙන්නයි මානව හිමිකම් කොමිසමට පැමිණිලි කරන්න ආවේ.”