ඉදිරියේ දී පැවැත්වීමට නියමිත පළාත් පාලන මැතිවරණය සඳහා නව දේශපාලන සන්ධානයක් බිහි කිරීමට පක්ෂ කිහිපයක් සාකච්ඡා ආරම්භ කර තිබේ.

ඒ, හිටපු ජනාධිපති මෛත්‍රීපාල සිරිසේන ප්‍රමුඛ ශ්‍රී ලංකා නිදහස් පක්ෂය, විමල් වීරවංශ ප්‍රමුඛ උත්තර ලංකා සභාගය සහ ඩලස් අලහප්පෙරුමගේ නායකත්වයෙන් යුත් නිදහස ජනතා සභාව යන පක්ෂය.

ශ්‍රී ලංකා පොදුජන පෙරමුණ සහ එක්සත් ජාතික පක්ෂය එක්ව මැතිවරණයට මුහුණදීම සඳහ මේ වන විට මූලික වටයේ සාකච්ඡා ආරම්භ වී තිබේ.

මේ අතර, පළාත් පාලන මැතිවරණය සඳහා නාමයෝජනා කැඳවීම ලබන සතියේ සිදුකරන බව මැතිවරණ කොමිෂන් කොමිෂන් සභාව දැනටමත් ප්‍රකාශයට පත් කර ඇත.

පළාත් පාලන පනත අනුව පළාත් පාලන ආයතන,ලබන මාර්තු මස 20 වැනිදාට පෙර ස්ථාපිත කළ යුතුව ඇති අතර ඒ අනුව බොහෝ විට පෙබරවාරි මස මැතිවරණය පැවැත්වෙනු ඇත.

නිවේදකයෙකු මෙන් ම රංගන ශිල්පියෙකු වන විශ්වලංකා පොලිස් අත්අඩංගුවට පත්ව ඇතැයි වාර්තා වෙයි.

ඒ ව්‍යාජ ලෙස එකලස් කළ වාහනයක් භාවිත කිරීමේ චෝදනාව මතය.

ඊට අදාළ ඡායාරූප සහ ලේඛන කිහිපයක් සමාජ මාධ්‍යවල හුවමාරු වෙයි.

ගාලු මුවදොර අරගලයෙහි ප්‍රමුඛ චරිතයක් වූ විශ්වලංකා හොරකම වංචාව සහ දූෂණය නොමැති සාධාරණ සමාජයක් ගොඩනැඟීම සඳහා කැප වන බව නිතර ප්‍රකාශ කළේය.

ඔහු බොහො විට ෆේස්බුක් ලයිව් පැමිණ මෙවැනි කතා ප්‍රකාශ කළේ අදාළ ව්‍යාජ වාහනයේ සිට ම වීම විශේෂත්වයකි.

ශ්‍රී ලංකාව අතහැර ඇමරිකාවට යාමට භානුක රාජපක්ෂ ගත් තීන්දුව වෙනස් කළේ තමන් බව ජෙරම් ප්‍රනාන්දු පියතුමා පවසයි.

දිවැසිවරයෙකු වන තමන් මැදිහත් නොවන්නට ආසියානු කුසලානය ලංකාවට දිනා ගැනීමට නොහැකි වන බවයි, පියතුමා සඳහන් කළේ.

ආසියානු කුසලානයෙන් අනතුරුව භානුක රාජපක්ෂ ද අසල තබා ගෙන ජෙරම් ප්‍රනාන්දු පියතුමා එම ආගමෙහි විශේෂ සමුළුවක් අමතමින් මේ බව ප්‍රකාශ කළේය.

විදුලි බිල ඉහළ දැමීමට විරුද්ධ වන ඇතැම් භික්ෂූන් වහන්සේලා ගමන් බිමන් යන්නේ කෝටි තුන හතරේ වාහනවලින් බව ‍ශ‍්‍රී ලංකා අමරපුර මහා සංඝ සභාවේ මහා ලේඛකාධිකාරී පූජ්‍ය පල්ලෙකන්දේ රතනසාර හිමියෝ පවසති.

එම වාහනවලට මාසකට ඉන්ධන වියදම පමණක් රුපියල් පනස් දහසක් ලක්ෂයක් වන බව පැවසූ උන්වහන්සේ දාන ගෙදරක, මළ ගෙදරක මෙම අත් සුඛෝපභෝගී වාහන දැකගත හැකි බව ද කියා සිටියහ. ඒවා දකින ජනතාව දොස් කියන බව ද එහිමියෝ පෙන්වා දෙති.

අනිත් ආගම්වල අරමුදලක් පිහිටුවා ඇතත් මෙරට විහාරස්ථානවල ආදායම් භික්ෂූන් වහන්සේලා ලබා ගන්නා බව පැවසූ උන්වහන්සේ සියලුම විහාරස්ථානවල ආදායම එක අරමුදලකට බැර කළ යුතු බව ද කියා සිටියහ.

 

ගෝඨාභය රාජපක්ෂ ඉවත් කිරීමට දායක වූ සියලු දෙනාට මැරෙන්න මොහොතක් තබා හෝ ඒ පිළිබඳ පසුතැවීමට සිදුවනු ඇතැයි හිටපු අමාත්‍ය මහින්දානන්ද අලුත්ගමගේ පවසයි.

ඔහු වැනි රාජ්‍ය නායකයෙකු ඉතිහාසයේ කිසිම දිනක සොයා ගත නොහැකි බවයි, හිටපු අමාත්‍යවරයා ප්‍රකාශ කළේ.

එදා ජනාධිපති මන්දිරය වැටලූ අවස්ථාවේ ජනාධිපතිවරයා එක නියෝගයක් ලබා දුන්නේ නම් අරගලයට පැමිණි 500-1000ක් වෙඩි කා මිය යනු ඇතැයි ද මහින්දානන්ද අලුත්ගමගේ සඳහන් කළේය.

අද වන විටත් ජනතාව එය අවබෝධ කරගෙන ඇති බවත් අරගලයට නායකත්වය දුන් ජවිපෙ සහ පෙරටුගාමීන් පසුගියදා හයිඩ් පිටියේ පැවැත්වූ ජන රැලියට තුන් සියයක් සොයා ගැනීමට නොහැකි වූ බවත් හෙතෙම පෙන්වා දුන්නේය.

මේ වන වට ලෝකයේ වැඩිි⁣යෙන් ම හිඟා කන රට ලංකාව බව ෆීල්ඩ් මාර්ෂල් සජබ සභාපති සරත් ෆොන්සේකා පවසයි.

ඉස්සර වේලක් තෝර මාළු කෑව ද දැන් මිල අධික නිසා තමන්ට ලින්නා මාළු කෑමට සිදුව ඇතැයි ද හෙතෙම චෝදනා කරයි.

දැන් තමන්ට තෝර මාළු කෑමට නොහැකි බවත් ජනතාවට තුන් වේල කන්නට නොහැකි බවත් ෆීල්ඩ් මාර්ෂල් ෆොන්සේකා සඳහන් කරයි.

මේ රට විනාශ කළේ දේශපාලකයින් බවට ද හෙතෙම චෝදනා කළේය.

ඉදිරියේ දී නව දේශපාලන බලවේගයක් බිහිකරන බව පාර්ලිමේන්තු මන්ත්‍රී පාඨලී චම්පික රණවක පවසයි.

ඔහු පෙන්වාදෙන්නේ, සියලු දේශපාලන පක්ෂවල සහය ඇතිව එම නව බලවේගය බිහි කරන බවය.

බදුල්ල ප්‍රදේශයේ පැවැති උත්සවයකට එක්වෙමින් පාඨලී චම්පික රණවක මෙම අදහස් පළ කළේය.

“පාර්ලිමේන්තුවේ බලය පාවිච්චි කරලා පොහොට්ටු රාජපක්ෂවරු නැවත බලය අල්ලන්න යනවා.

ඒක ඒ අය කරගන්න යන බරපතළ වරදක්. ඔවුන් දැන් දේශපාලනයෙන් සමුගෙන යා යුතු මොහොත. පොහොට්ටුව නෙමෙයි රාජපක්ෂවරු.

පොහොට්ටුව තමන් කළ වැරදි දැකලා ප්‍රතිසංවිධානය විය යුතු මොහොත. ඒ දෙකම කරන්නේ නැති අය අනාගතයේදී දේශපාලන වශයෙන් අතුගෑවිලා යයි.”

අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු වන වසන්ත මුදලිගේ දින 90ක් රඳවා ගෙන ප්‍රශ්න කිරීමට  ආරක්ෂක අමාත්‍යංශය අනුමැතිය ලබා දී තිබේ

ඊයේ කොළඹ පැවැති විරෝධතා පා ගමනක් අතරතුර පළා යමින් සිටි වසන්ත මුදලිගේ අත්අඩංගුවට පත්විය.

ඔහුට ඒ වන විටත් අධිකරණය වරෙන්තු නිකුත් කර තිබිණි.