කෙරවලපිටිය යුගදනවි බලාගාරය හිමි සමාගමේ රජය සතු කොටස් අමෙරිකානු සමාගමක් වෙත පැවරීමට අමාත්‍ය මණ්ඩලය විසින් ගෙන තිබෙන තීරණය සහ ගෑස් සැපයීමේ ඒකාධිකාරය අදාළ අමෙරිකානු සමාගම වෙත පැවරීමට ගෙන තිබෙන තීරණය බලරහිත කිරීමේ නියෝගයක් නිකුත් කරන්නැයි ඉල්ලා සමගි ජන බලවේගයේ මහලේකම් පාර්ලිමේන්තු මන්ත්‍රී රංජිත් මද්දුම බණ්ඩාර, ශ්‍රේෂ්ඨාධිකරණයට මූලික අයිතිවාසිකම් පෙත්සමක් ඉදිරිපත් කර තිබේ.

එහි වගඋත්තරකරුවන් ලෙස අග්‍රාමාත්‍ය මහින්ද රාජපක්ෂ ඇතුළු අමාත්‍ය මණ්ඩල සාමාජිකයින්, යුගදනවි බලාගාරය හිමි වෙස්ට් කෝස්ට් පවර් ප්‍රයිවට් ලිමිටඩ්, එම සමාගමේ කොටස් පවරනු ලැබූ ඇමරිකානු සමාගම වන නිව් ෆෝට්රස් එනර්ජි සමාගම, නීතිපතිවරයා ඇතුළු පිරිසක් නම් කර තිබේ.

පෙත්සම්කරුවන් කියා සිටින්නේ කෙරවලපිටිය යුගදනවි බලාගාරය අයත් සමාගමේ ශ්‍රී ලංකා රජයට අයත් කොටස්වලින් සියයට 40 ක් වගඋත්තරකාර අමෙරිකානු සමාගම වෙත පැවරීමට අමාත්‍ය මණ්ඩලය ගනු ලැබූ තීරණය යුක්ති සහගත නොවන බවය. එම තීරණය ගැනීමට පෙර ජාතික ආර්ථිකය හා ජාතික ආරක්ෂාව වැනි කරුණු කෙරෙහි අවධානය යොමු කිරීමට වග උත්තරකාර අමාත්‍ය මණ්ඩලය අසමත් වී ඇති බවද ඔහු චෝදනා කරති.

එමෙන්ම අදාළ කොටස් පැවරීමේ ක්‍රියාවලිය හරහා මෙරට ගෑස් නිෂ්පාදනයේ ඒකාධිකාරය වගඋත්තරකාර අමෙරිකානු සමාගම වෙත පවරා දී තිබෙන බව පෙන්වා දෙන පෙත්සම්කරු එම කොටස් පැවරීමේ දී විධිමත් ටෙන්ඩර් පටිපාටි අනුගමනය කර නොමැති බවද සඳහන් කළේය. මේ හරහා අදාළ කොටස් පැවරීමේ ක්‍රියාවලිය තුළ පවතින පාරදෘශ්‍යභාවය පිළිබඳව බරපතළ ගැටලු මතුවී තිබෙන බව ඔහු පෙන්වා දෙයි.

එබැවින් අමාත්‍ය මණ්ඩලය විසින් කිසිදු සාධාරණ කරුණු අධ්‍යයනයකින් තොරව අදාළ කොටස් පැවරීමට ගනු ලැබූ තීරණය තුළින් රටේ මහ ජනතාවගේ මූලික අයිතීන් උල්ලංඝනය වන බවට තීන්දුවක් ලබාදෙන ලෙස පෙත්සම්කරු ශ්‍රේෂ්ඨාධිකරණයෙන් ඉල්ලා සිටී. එමෙන්ම යුගදනවි බලාගාරයේ සතු රජයේ කොටස් පැවරීමට අමාත්‍ය මණ්ඩලය ලැබූ තීරණය බලරහිත කිරීමේ ආඥාවක් නිකුත් කරන ඔහු අධිකරණයෙන් ඉල්ලා සිටියේය.

මේ අතර යුගදනවි බලාගාරයේ කොටස් ඇමරිකානු සමාගමට පැවරීමට සහ ගෑස් එකාධිකාරය එම සමාගම වෙත පැවරීම අභියෝගයට ලක් කරමින් තවත් පෙත්සමක් අභියාචනාධිකරණයට ඉදිරිපත් කර තිබේ. ජාතික හිමිකම් සංවිධානයේ සභාපති පූජ්‍ය බෙංගමුවේ නාලක හිමි, වෛද්‍ය ගුණදාස අමරසේකර සහ වෛද්‍ය වසන්ත බණ්ඩාර ඇතුළු පිරිසක් විසින් එම පෙත්සම ඉදිරිපත් කළේය.

එහි වගඋත්තරකරුවන් ලෙස අග්‍රාමාත්‍ය මහින්ද රාජපක්ෂය ඇතුළු අමාත්‍ය මණ්ඩලයේ සාමාජිකයින් ඇතුළු පිරිසක් නම් කර තිබේ. පෙත්සම්කරුවන් කියා සිටින්නේ යුගදනවි බලාගාරයේ රජය සතු වූ කොටස් හා එල්එන්ජී ගෑස් ඒකාධිකාරය අමෙරිකානු සමාගම වෙත පැවරීමට අමාත්‍ය මණ්ඩලය ගෙන තිබෙන තීරණය නීතියට පටහැනි බවය. එබැවින් එම තීරණය බල රහිත කිරීමේ රිට් ආඥාවක් නිකුත් කරන ලෙසද පෙත්සම්කරුවන් අභියාචනාධිකරණයෙන් ඉල්ලා තිබේ.

ජනාධිපතිගේ පෞද්ගලික නීතිඥ මහත්වරුන් රටට නව ව්‍යවස්ථාවක් හදන බව ආරංචි යැයි ද එම ව්‍යවස්ථාව පාර්ලිමේන්තු තේරීම් කාරක සභාවකට දමා සියලු දෙනාගේ අදහස් විමසන්නැයි ඉල්ලා සිටින බව ද විපක්ෂයේ ප්‍රධාන සංවිධායක ලක්ෂ්මන් කිරිඇල්ල පවසයි.

විපක්ෂයේ ප්‍රධාන සංවිධායකවරයා පාර්ලිමේන්තුවේ දී අද (21) මෙම ඉල්ලීම කළේය.

විධායක ජනාධිපතිවරයා ආණ්ඩුවේ අයගෙන්වත් උපදෙස් ගන්නේ නැතැයි ද මොනවා වෙනවා දැයි කියා ඇමැතිවරු පවා දන්නේ නැතැයි ද ලක්ෂ්මන් කිරිඇල්ල චෝදනා කළේය.

“ඒ නිසා මේ සිදුවන දේවල වගකීම බාරගත යුත්තේ ජනාධිපතිවරයායි. නව ව්‍යවස්ථාවක් හදන විට ස්වාධීන කොමිෂන්වල ස්වාධීනත්වය ආරක්ෂා කරන්න. ස්වාධීන කොමිෂන්වලට නිදහස දුන්නේ නැත්නම් ජාත්‍යන්තරයේ ප්‍රසාදය ලැබෙන්නේ නැහැ.

තමා අසාර්ථක වී ඇති බව ජනාධිපති ම කියනවා. ඒකට හේතුව එතුමාමයි. එතුමා කිසිම කෙනෙක් එක්ක සංවාදයක් නැහැ. තනිව වැඩ කරලා ඔහු අමාරුවේ වැටිලා. දැන් ව්‍යවස්ථා හදන්නේ ජනාධිපතිගේ නඩුවලට පෙනී සිටි අයයි. මෙය විහිළුවක්

2015 වන විට පේරාදෙණිය විශ්වවිද්‍යාලයේ එජාපයට සම්බන්ධ ආචාර්යවරු 65ක් සිටි බව මහාචාර්ය එම්.ඕ.ඊ. ද සොයිසා පවසයි.

එහෙත් අද වන විට එම පිරිස 10 දක්වා වැටී ඇතැයි ද මහාචාර්යවරයා පෙන්වා දෙයි.

මේ සඳහා වගකිව යුත්තේ පක්ෂ නායකත්වය බවත් ඔවුන් කැඳවා තේ කෝප්පයක් ලබා දී කතා කිරීමට පවා පක්ෂය කටයුතු කළේ නැති බවත් මහාචාර්ය එම්.ඕ.ඊ. ද සොයිසා සඳහන් කරයි.

එජාප හමුවකට එකතු වෙමින් හෙතෙම මේ බව ප්‍රකාශ කළේය.

නිදහස් පක්ෂය ඇතුළු ආණ්ඩුව නියෝජනය කරන දේශපාලන පක්ෂ 11ක් යුගදනවි බලාගාරය සම්බන්ධයෙන් ඉල්ලා සිටි සාකච්ඡාව ජනාධිපතිවරයා විසින් ප්‍රතික්ෂේප කර නොමැති බව හිටපු ජනාධිපති මෛත්‍රීපාල සිරිසේන ප්‍රකාශ කරයි.

එහි දී සිදුව ඇත්තේ අදාළ ගැටලුව පිළිබඳ සාකච්ඡා කළ යුතු පාර්ශ්ව සහ නිලධාරීන් සමග එම පක්ෂ සාකච්ඡාවක් සඳහා යොමු කිරීම බවත් හෙතෙම පෙන්වා දෙයි.

ගොවි ජනතාව මුහුණ දී ඇති ප්‍රශ්නය කෙසේ හෝ විසඳිය යුතු බවත් නැනෝ තාක්ෂණික පොහොර මගින් හෝ එය විසඳේ නම් හොඳ බවත් මෛත්‍රීපාල සිරිසේන ප්‍රකාශ කළේය.

හෝමාගම, ගොඩගම ශ්‍රී ඛෙත්තාරාම විහාරස්ථානයේ රන්වැට විවෘත කිරීමේ අවස්ථාවට විපක්ෂ නායක සජිත් ප්‍රේමදාස සමග අද (20) එකතු වීමෙන් අනතුරුව මාධ්‍ය වෙත අදහස් දක්වමින් හිටපු ජනාධිපතිවරයා මේ ප්‍රකාශ කළේය.

කිසිදු ගුරුවරයෙකුගේ වැටුප් කප්පාදු කිරීමට ඉඩ නොතබන බව ගුරු – විදුහල්පති වෘත්තිය සමිති සංධානය පවසයි.

ලංකා ගුරු සේවා සංගමයේ ප්‍රධාන ලේකම් මහින්ද ජයසිංහ පැවසුවේ ලබන 21 වන දා පසු වර්ජනයේ නිරත වන ගුරුවරුන්ගේ වැටුප් අත්හිටුවන බවට වයඹ පළාත් ආණ්ඩුකාරවරයා කර ඇති ප්‍රකාශය ඉල්ලා අස්කර ගන්නා ලෙස ඔහුට බල කරන බවයි.

එවැනි බලයක් පළාත් ආණ්ඩුකාරවරයෙකුට නොමැති බව ද ලංකා ගුරු සේවා සංගමයේ ප්‍රධාන ලේකම්වරයා අවධාරණය කරයි.

 

රසායනික පොහොර භාවිතය තහනම් කරමින් නිකුත් කරනු ලැබූ ගැසට් නිවේදනය වැරදි උපදෙස් මත සිදුවූවක් බව කෘෂිකර්ම අමාත්‍යාංශයේ ලේකම් මහාචාර්ය උදිත් කේ. ජයසිංහ පවසයි.

මේ සම්බන්ධයෙන් ජනාධිපති ගෝඨාභය රාජපක්ෂ හෝ රජය හෝ විෂය භාර අමාත්‍යවරයා වගකිව යුතු නැති බවත්, ඉහළ දේශපාලනාධිකාරීන්ට උපදෙස් ලබාදීමේ දී එය නිවැරදි ආකාරයට කළ යුතුව ඇති බවත් ලේකම්වරයා සදහන් කළේය.

ජනාධිපතිවරයාගේ සෞභාග්‍යයේ දැක්ම ප්‍රතිපත්ති ප්‍රකාශය සකස් කිරීමට තමාද දායක වූ බව කී ලේකම්වරයා, ඔවුන්ට අවශ්‍ය වූයේ විෂ කෘෂි රසායනික පොහොර භාවිත කරන සංස්කෘතියක සිට විෂ රහිත ගුණත්වයෙන් ඉතා ඉහළ පැළෑටි පෝෂක භාවිතය හඳුන්වාදීම බව ද කීවේය.

එම නිසා, කෘෂිරසායනික භාවිත කිරීම තහනම් කරමින් ගැසට් නිවේදනයක් නිකුත් කරනවා වෙනුවට ඉහළ ගුණත්වයෙන් යුතු පරිසර හිතකාමී පැළෑටි පෝෂක ආනයනයට අවසර දිය යුතු යැයි ද ඔහු සඳහන් කළේය.
එම ගැසට් නිවේදනය එලෙස නිකුත් කර තිබුණේ නම් අද රටේ තත්ත්වය වඩාත් යහපත් එකක් වනු ඇති බව ද ඔහු සඳහන් කළේය.

වත්මන් තත්වය පිළිබදව ජනාධිපතිවරයා අමාත්‍යවරුන් පර්යේෂකයන් සහ පරිපාලකයන් සාකච්ඡා කළ බවත් වර්තමාන ගැටලුව විසඳිය යුතු බවට ද එහි දී සාකච්ඡා වූ බවත් හෙතෙම කීවේය. විෂ සහිත පොහොර වෙනුවට ඉහළ ප්‍රමිතියකින් යුතු ජෛව පොහොර භාවිත කළ යුතු බව ද ඔහු ප්‍රකාශ කළේය.

ලෝකවාසි බෞද්ධ ජනතාවට අතිශයින් වැදගත් පොහොය දිනයක් වන වප් පුර පසළොස්‌වක පොහොය දිනය අදට (20) යෙදී තිබේ.

වප් මාසය සම්මා සම්බුද්ධ ශාසන ඉතිහාසයේ චීවර මාසය ලෙස ද හඳුන්වනු ලබයි. සත්වන වස් කාලය ගතකිරීමට තව්තිසා දෙව්ලොවට වැඩම කළ බුදුන් වහන්සේ දෙව්ලොවින් නික්ම දඹදිව සංකස්සපුරයට වැඩම කර මහා පෙළහර පාමින් වැඩ සිටියේ අද වැනි පොහෝ දිනකය.

සැරියුත් හිමියන් ප්‍රඥාලාභී භික්‍ෂූන් අතර අග්‍රස්ථානය ලැබීම, කල්ප ලක්‍ෂයකින් මතුයෙහි බුදුවීමට සිටින මෛත්‍රී බෝසතාණන් ගෞතම බුදුරදුන්ගේ ශාසනයෙහි පැවිදි වීම, අනුලා දේවිය ඇතුළු කුල කතුන් සසුන්ගත කිරීමට සංඝමිත්තා තෙරණිය ඇතුළු භික්‍ෂුණී සංඝයාත්, ජය ශ්‍රී මහා බෝධියේ දක්‍ෂිණ ශාඛාවත් ලක්දිවට වැඩමවා ගැනීමට අනුබුදු මිහිඳු හිමියන්ගේ නියමයෙන් දෙවනපෑතිස් රජුගේ සංදේශයත් තුටු පඬුරුත් රැ‍ගෙන අරිට්ඨ කුමරු ප්‍රමුඛ රාජකීය දූත පිරිස දඹදිව සැලලුප් නුවර ධර්මාශෝක රජු හමුවීමට පිටත්කොට යවන ලද්දේ ද වප් පෝ දායි.

මහාරිෂ්ඨ මහ රහතන් වහන්සේ විසින් ලංකා ශාසන ඉතිහාසයේ අමරණීය සිද්ධියක් වන විනය පිටකය සංඝායනා කිරීම වැනි ඉතා වැදගත් සිදුවීම් රැසක් වප් පුර පසළොස්වක පෝය දින දී සිදු වී ඇත

එළඹෙන 21 වෙනිදා පාසල් විවෘත කිරීමට ගත් තීන්දුව දේශපාලන පක්ෂයක තීන්දුවක් බව ගුරු විදුහපල්පති වැටුප් විෂමතාවට එරෙහිව ජාතික එකමුතුවේ කැඳවුම්කරු උලපනේ සුමංගල හිමි පවසයි.

25 වෙනිදා පාසල් යාමට ගත් තීන්දුව පැහැදිලිව ම දේශපාලන පක්ෂ දෙකක තීන්දුවක් බව එහිමියෝ ප්‍රකාශ කරති.

පළමු වැන්න පොදුජන පෙරමුණේ ද දෙවැන්න ජනතා විමුක්ති පෙරමුණේ සහ පෙරටුගාමී සමාජවාදී පක්ෂයේ තීන්දුව බව සුමංගල හිමි සඳහන් කරයි.

දේශපාලන පක්ෂවලට සිය සටන දිය කිරීමට ඉඩ නොදෙන බවත් දිගට ම වර්ජනයෙහි නිරත වන බවත් එහිමියෝ වැඩි දුරටත් ප්‍රකාශ කරති.