සුදුසුකම් ලත් විදෙස් සේවා නිලධාරීන් පැත්තක… විදේශ සේවයට දේශපාලන පත්වීම්…!
February 7, 2025 at 7:48 pm | by emanisa.lk
විදේශයන්හී පිහිටි ශ්‍රී ලංකා දූත මණ්ඩලවලට සිදුකරනු ලබන දේශපාලන පත්වීම් සම්බන්ධව ශ්‍රී ලංකා විදේශ සේවා සංගමය දැඩි කනස්සල්ල පළ කරයි.
නිවේදනයක් නිකුත් කරමින් එම සංගමය පෙන්වා දෙනුයේ වෘත්තිමයභාවයේ, කුසලතා මත පදනම්ව පත් කිරීමේ සහ රාජ්‍ය තාන්ත්‍රික ප්‍රවීණතාවේ පිළිගත් සම්මතයන් නොසලකා හරිමින් විදේශයන්හී පිහිටි ශ්‍රී ලංකා දූත මණ්ඩලවල ප්‍රධානී ඇතුළු ධුර රැසකට ශ්‍රී ලංකා විදේශ සේවයෙන් බැහැරව මෑතකදි පත්කිරීම් සිදුකර ඇති බවය.
ගෝලීය වේදිකාවේ ශ්‍රී ලංකාව නියෝජනය කිරීම සඳහා සිය වෘත්තිය ජීවිතය කැප කළ අත්දැකීම් බහුල, ඉහළ සුදුසුකම්වලින් යුත් වෘත්තිමය විදේශ සේවා නිලධාරීන් නොසලකා හැර කරන ලද මෙම පත්වීම් සම්බන්ධව ශ්‍රී ලංකා විදේශ සේවා සංගමය සිය දැඩි කළකිරීම පළ කරනු ඇති බවත් එහි සඳහන් ව ඇත.
ශ්‍රී ලංකා විදේශ සේවය යනු රටේ විදේශ ප්‍රතිපත්තිය ක්‍රියාත්මක කිරීමටත් රටේ ජාතික අභිලාෂයන් ආරක්ෂා කිරීමටත් විශේෂයෙන් පුහුණුව ලැබූ විශේෂිත සේවයක් බවත් දේශපාලන පත්වීම් වෙනුවෙන් එවන් වෘත්තිය රාජ්‍ය ත්‍රාන්ත්‍රික නිලධාරීන් නොසලකා හැරීම ආයතනික අවංකභාවය දුර්වල කිරීමක් වන අතරම රාජ්‍ය තාන්ත්‍රික ස්ථාවරත්වය ද අනතුරේ හෙළිමක් බවද එම සංගමය පවසයි.
